ദക്ഷിണ ബംഗാള്‍ ഉള്‍ക്കടലില്‍ തെക്ക് കിഴക്കന്‍ ശ്രീലങ്കയോട് ചേര്‍ന്നുള്ള സമുദ്ര ഭാഗത്ത് വ്യാഴാഴ്ചയോട് കൂടി ന്യൂനമര്‍ദം രൂപപ്പെടാന്‍ സാധ്യതയുണ്ടെന്ന് കേന്ദ്ര കാലാവസ്ഥാ നിരീക്ഷണ കേന്ദ്രം. ഇത് കേരളത്തില്‍ മഴയ്ക്ക് കാരണമാകുമെന്നും നിര്‍ദ്ദേശമുണ്ട്. ഈ മാസം 29, 30 തിയതികളിലും മെയ് ഒന്നിനും സംസ്ഥാനത്ത് വ്യാപകമായി മഴയുണ്ടാകുമെന്നുമാണ് കാലാവസ്ഥാ നിരീക്ഷണകേന്ദ്രം നിര്‍ദ്ദേശിച്ചിരിക്കുന്നത്.

വ്യാഴാഴ്ച രാത്രി 11.30 വരെ തീരത്ത് രണ്ട് മീറ്റര്‍ ഉയരത്തില്‍ തിരയടിക്കാനും സാധ്യതയുണ്ട്. ഒരാഴ്ച്ചയായി കേരളത്തില്‍ പരക്കെ വേനല്‍ മഴ ലഭിച്ചിരുന്നു. പിന്നാലെ ന്യൂനമര്‍ദ്ദം കൂടി എത്തുമ്ബോഴേക്കും ജലദൗര്‍ലഭ്യത്തിന് പരിഹാരമാകുമെന്നാണ് വിലയിരുത്തുന്നത്.

ശ്രീലങ്കയില്‍ ഉണ്ടായ ന്യൂനമര്‍ദ്ദം ചുഴലിക്കാറ്റായി മാറിയാല്‍ 'ഫാനി' എന്ന പേരാണ് നല്‍കുക. ഓഖി എന്ന പേര് നല്‍കിയ ബംഗ്ലാദേശ് തന്നെയാണ് ഈ പേരും നല്‍കിയിരിക്കുന്നത്. ഈ സാഹചര്യത്തില്‍ 27 മുതല്‍ മത്സ്യബന്ധനത്തിന് വിലക്ക് നല്‍കിയിട്ടുണ്ട്. ഇന്ത്യന്‍ മഹാസമുദ്രത്തിന്റെ തെക്കുപടിഞ്ഞാറന്‍ മേഖലയിലും ബംഗാള്‍ ഉള്‍ക്കടലിലും തമിഴ്‌നാട് തീരത്തും മത്സ്യബന്ധനത്തിന് പോകരുതെന്നാണ് നിര്‍ദ്ദേശം. കടലില്‍ പോയ മത്സ്യബന്ധന തൊഴിലാളികള്‍ 27ന് പുലര്‍ച്ചെ 12യോടെ തന്നെ അടുത്തുള്ള തീരത്തെത്തണമെന്നാണ് നിര്‍ദ്ദേശം.