ഫേസ്ബുക്കിൽ പേര് വെളിപ്പെടുത്താതെ 'ജീവിക്കാൻ കൊതിയുള്ള ഒരാൾ' എന്ന ഐഡിയിൽ വന്ന കുറിപ്പ് ഏവരെയും വിഷമിപ്പിക്കുകയാണ്. സ്വന്തം കണ്ണിൽ കോൽ ഇരിക്കവേ മറ്റുള്ളവരുടെ കണ്ണിലെ കരട് എടുക്കാൻ നടക്കുന്നവരെ സൂചിപ്പിക്കുകക്കൂടി ചെയ്യുകയാണ് ഈ ഫേസ്ബുക് കുറിപ്പ്. കൈയിൽ വെള്ളപ്പാണ്ടുള്ള ഇദ്ദേഹം പെണ്ണ് കാണാൻ പോയപ്പോൾ നാണമില്ലേ നിങ്ങൾക്ക് കല്യാണം ആലോചിക്കാൻ എന്ന് പെണ്ണ് ചോദിച്ചതു തന്നെ ഏറെ ദുഃഖിപ്പിച്ചു. വെള്ളപ്പാണ്ട് ഉള്ളതിനാൽ തനിക്കു നേരിട്ട പല അനുഭവങ്ങളിൽ ഒന്ന് മാത്രം ആണിത്. തന്നെ മറ്റുള്ളവർ കളിയാക്കുന്ന ഒറ്റപ്പെടുത്തുന്ന ഈ രോഗത്തിൽ നിന്നും രക്ഷപ്പെടാൻ എന്തെങ്കിലും വഴിയുണ്ടോയെന്നും ഇദ്ദേഹം ചോദിക്കുന്നു. ഒരു ഫേസ്ബുക് ഗ്രുപ്പിലൂടെയാണ് തന്റെ പരിഭവങ്ങൾ അദ്ദേഹം പങ്ക് വച്ചത്.

30 വയസുള്ള ഈ ചെറുപ്പക്കാരൻ നേരിട്ട അവഗണനകൾ ചെറുതല്ല. മറ്റുള്ളവരെ പോലെ സന്തോഷിക്കാൻ ആകുന്നില്ലയെന്നും മാനസികമായ വിഷമങ്ങൾ ഇതിൻറെ പേരിൽ നേരിടുന്നതായും യുവാവ് തുറന്നു പറയുന്നു. താൻ പങ്കെടുത്ത ഇന്റർവ്യൂകളിലും കൈയുടെ പ്രശ്നം ബാധിച്ചിട്ടുണ്ട്. ഈ രോഗം മറ്റുള്ളവർക്ക് പകരില്ല എന്ന് ഡോക്ടർ ഉറപ്പു നൽകിയിട്ടുണ്ടെന്നും കുറിപ്പിൽ പറയുന്നു. ചില കാര്യങ്ങളെ കുറവായി കണ്ടു മറ്റുള്ളവരെ തഴയുകയും ആക്ഷേപിക്കുകയും ചെയ്യുന്നവർക്ക് നേരെയുള്ള ചോദ്യമായി മാറിയിരിക്കുകയാണ് ഈ കുറിപ്പ്.

ഫെയ്സ്ബുക്ക് കുറിപ്പ് വായിക്കാം: ഹലോ ജി എൻ പി സി സുഹൃത്തക്കളെ, എന്നെ ഗ്രുപ്പിൽ ഉൾപെടുത്തിയതിനു ഇതിന്റെ ചുമതല ഉള്ളവർക്ക് നന്ദി രേഖപ്പെടുത്തുന്നു. ഈ ഗ്രുപ്പിനേക്കാൾ വലിയ ഒരു ഗ്രൂപ്പും ഇല്ല എന്ന് അറിയാം , എന്റെ കാര്യത്തിലേക്ക് വരാം, 30 വയസ് ഉള്ള ഒരു ചെറുപ്പക്കാരൻ ആണ് ഞാൻ, മറ്റുള്ള ചെറുപ്പക്കാരെ പോലേ സന്തോഷിക്കാൻ കഴിഞ്ഞിട്ടില്ല ,എന്റെ രണ്ട് കൈയിലും കാലിലും വെള്ള പാണ്ട് ആണ്, ഇത് മൂലം എനിക്ക് പല മാനസിക വിഷമം ഉണ്ടാകുന്നു, ഒരു മനുഷ്യനേയും അറിഞ്ഞ് കൊണ്ട് ദ്രോഹിച്ചിട്ടില്ല, കുറേ മരുന്നുകൾ കഴിച്ചു എന്നല്ലാതെ ഒരു മാറ്റവും ഇല്ല ചികിൽസിച്ച് ചികിൽസിച്ച് കടക്കാരൻ ആയി ഞാൻ, കല്യാണം കഴിക്കാൻ വീട്ടുകാർ നിർബന്ധിച്ചു അന്ന് ആ പെൺകുട്ടി ചോദിച്ചു. നിങ്ങൾക്ക് നാണം ഇല്ലേ കല്യാണം ആലോചിക്കാൻ എന്ന്, അതോടെ കൂടി വിവാഹം എന്ന സ്വപ്നം നിലച്ചു, ജീവിതത്തിൽ ഒറ്റ പെട്ട ഒരാൾ ആണ് ഞാൻ, ഈ രോഗം ആർക്കും പകരില്ല 'ഇനി കൂടത്തില്ല എന്ന് ഉറപ്പ് Dr പറഞ്ഞു ,, ഇന്റർവ്യനു ചെന്നാലും കൈയുടെ പ്രശ്നം കൊണ്ട് അവര് പിന്നെ അറിയിക്കാം എന്നു പറയും ,, ഈ ഗ്രൂപ്പിൽ എനിക്ക് ഒരു ആശ്വാസം കിട്ടാൻ വേണ്ടിയാ പറയുന്നത,,,, , ഈ രോഗം മാറാൻ എന്തെലും വഴി ഉണ്ടോ ' എന്തെങ്കിലും കളർ ചെയ്യാനോ മറ്റോ വഴി ഉണ്ടോ ,, എന്തെങ്കിലും മറുപടി തരണം പ്ലീസ്....