ഈ ഒരൊറ്റ തീരുമാനം കൊണ്ട് ജോസ് കെ മാണി തന്റെ രാഷ്ട്രീയ തന്ത്രജ്ഞതയാണ് തെളിയിച്ചത്. എല്ലാവരെയും അമ്പരിപ്പിച്ചുകൊണ്ട് അഡ്വ. ജോസ് ടോമിനെ സ്ഥാനാര്‍ത്ഥിയാക്കിയതിലൂടെ രാഷ്ട്രീയ നയതന്ത്രത്തില്‍ അഗ്രഗണ്യനാണ് താനെന്ന് ജോസ് കെ.മാണി തെളിയിച്ചു. മാണി ശൈലിയെ ഓര്‍മ്മിപ്പിക്കുന്ന അപ്രതീക്ഷിത തീരുമാനം എടുത്തുകൊണ്ട് വിമര്‍ശകരുടെ മുഴുവന്‍ വാ അടപ്പിക്കാന്‍ ജോസ് കെ.മാണിക്ക് കഴിഞ്ഞു. കെ.എം മാണിയുടെ എക്കാലത്തെയും വിശ്വസ്തനായ ജോസ് ടോമിനെ സ്ഥാനാര്‍ത്ഥി ആക്കിയതിലൂടെ കേരളാ കോണ്‍ഗ്രസ്സ് രാഷ്ട്രീയത്തില്‍ കൃത്യമായ സന്ദേശമാണ് ജോസ് കെ.മാണി നല്‍കിയത്. ജോസ് കെ.മാണി എടുത്ത തീരുമാനം കേരളാ കോണ്‍ഗ്രസ്സിനും യു.ഡി.എഫിനും ഒരുപോലെ ശോഭപകരുന്നതാണ് എന്നതാണ് യു.ഡി.എഫ് നേതൃത്വത്തിന്റെ വിലയിരുത്തല്‍. ജോസ് ടോമിന്റെ സ്ഥാനാര്‍ത്ഥിത്തത്തോട് പി.ജെ ജോസഫ് ഉയര്‍ത്തിയ വിയോജിപ്പുകളെ യു.ഡി.എഫ് നേതൃത്വം തള്ളിയതോടെ ജോസ് കെ.മാണിക്ക് ഒരിക്കല്‍ക്കൂടി രാഷ്ട്രീയ നീക്കങ്ങളില്‍ മേല്‍ക്കൈ നേടാനായി. സ്ഥാനാര്‍ത്ഥി നിര്‍ണ്ണയം യു.ഡി.എഫ് നേതൃത്വത്തിന് അനായാസമാക്കാനും ജോസ് കെ.മാണിയുടെ നീക്കങ്ങള്‍ സഹായിച്ചു. അനാവശ്യ വിവാദങ്ങളും വിമര്‍ശനങ്ങളും ഉയര്‍ത്തിയ പി.ജെ ജോസഫിന് കനത്ത പ്രഹരമാണ് ജോസ് കെ.മാണിയുടെ സമര്‍ത്ഥമായ നീക്കം.

ദീര്‍ഘകാലത്തെ രാഷ്ട്രീയ പ്രവര്‍ത്തനം കൊണ്ട് പാലായുടെ സാമൂഹ്യരംഗത്ത് നിറസാനിധ്യമാണ് കേരളാ കോണ്‍ഗ്രസ്സ് സംസ്ഥാന ജനറല്‍ സെക്രട്ടറി അഡ്വ. ജോസ് ടോം പുലിക്കുന്നേല്‍. 1969 ല്‍ 8ാം ക്ലാസ്സ് വിദ്യാത്ഥിയായിരിക്കുമ്പോള്‍ കെ.എം മാണി സാറാണ് ജോസ് ടോമിനെ കെ.എസ്.സിയിലൂടെ വിദ്യാര്‍ത്ഥി രാഷ്ട്രീയത്തിലേക്ക് കൈപിടിച്ച് കൊണ്ടുവരുന്നത്. അരുവിത്തുറ സെന്റ് ജോര്‍ജ് കോളേജ് യൂണിയന്‍ ചെയര്‍മാന്‍, പാലാ സെന്റ് തോമസ് കോളേജ് യൂണിയന്‍ ജനറല്‍ സെക്രട്ടറി, 1980 ല്‍ അവിഭക്ത കേരള സര്‍വ്വകലാശായ യൂണിയന്‍ ജനറല്‍ സെക്രട്ടറി എന്നീ നിലകളില്‍ പ്രവര്‍ത്തിച്ചിട്ടുണ്ട്..

കേരള യൂത്ത് ഫ്രണ്ട് സംസ്ഥാന ജനല്‍ സെക്രട്ടറിയായിരുന്ന ജോസ് ടോം വിദ്യാര്‍ത്ഥി യുവജന പ്രസ്ഥാനങ്ങളുടെ സംസ്ഥാന നേതൃനിരയില്‍ ശ്രദ്ധേയനായിരുന്നു. കാലടി കോളേജില്‍ നിന്നും നിന്നും എ.കോം പാസ്സായ ജോസ് ടോം തിരുവനന്തപുരം ലോ കോളേജില്‍ നിന്നും നിയമപഠനവും പൂര്‍ത്തിയാക്കി 1991 ല്‍ കോട്ടയം ജില്ലാ കൗണ്‍സിലില്‍ പാലാ ഡിവിഷനെ പ്രതിനിധീകരിച്ച് മെമ്പറായി. 1984 മുതല്‍ 1992 വരെ മഹാത്മാഗാന്ധി യൂണിവേഴ്‌സിറ്റി സെനറ്റ് മെമ്പറായിരുന്നു. മീനച്ചില്‍ ഗ്രാമപഞ്ചായത്ത് അംഗം, മീനച്ചില്‍ സര്‍വ്വീസ് സഹകരണ ബാങ്ക്, കോട്ടയം ജില്ലാ സഹകണ ബാങ്ക് ഭരണസമിതി അംഗം എന്നീ നിലകളില്‍ പാലായുടെ പൊതുരംഗത്ത് വ്യക്തിമുദ്ര പതിപ്പിച്ച നേതാവാണ് ജോസ് ടോം.