കെ എം മാണിയില്ലെങ്കില് എന്ത് രണ്ടില... രണ്ടില ചിഹ്നം ലഭിക്കാന് കാലു പിടിക്കേണ്ടി വരും എന്ന പി.ജെ ജോസഫിന്റെ നിലപാടിനെ തകര്ത്തെറിഞ്ഞ് നിയുക്ത പാലാ സ്ഥാനാര്ത്ഥി ജോസ് ടോം
പാലായിലെ വലിയ ചിഹ്നം കെ.എം മാണിയാണെന്നായിരുന്നു യുഡിഎഫ് സ്ഥാനാര്ഥി ജോസ് ടോമിന്റെ പ്രതികരണം. കെ.എം മാണിയുടെ ചിത്രം മാത്രം മതി തിരഞ്ഞെടുപ്പില് വിജയിക്കാനെന്നും ജോസ് ടോം പറഞ്ഞു. ഇതോടെ രണ്ടില ചിഹ്നം അനുവദിക്കുന്നതു സംബന്ധിച്ച ജോസെഫിന്റെ പിടിവാശി വെറും ഓലപ്പാമ്പായി.
തിരഞ്ഞെടുപ്പില് ജോസ് കെ. മാണി പറയുന്ന ചിഹ്നത്തില് മത്സരിക്കുമെന്നും പാലായില് കെ.എം. മാണിയുടെ ചിത്രംവച്ച് മത്സരിച്ചാലും ജയം ഉറപ്പാണെന്നും ജോസ് ടോം പറഞ്ഞത് കൃത്യമായ സന്ദേശമാണ്. സ്ഥാനാര്ഥിയായി തന്നെ പരിഗണിക്കണമെന്ന് ഒരിടത്തും ആവശ്യപ്പെട്ടിട്ടില്ല. നിഷ ജോസ് കെ. മാണിയെ സ്ഥാനാര്ഥിയാക്കണമെന്നായിരുന്നു താനടക്കം ആവശ്യപ്പെട്ടത്.
രണ്ടില ചിഹ്നത്തില് മത്സരിക്കണമെന്ന് ഒരു വാശിയുമില്ല. രണ്ടില ചിഹ്നം ലഭിക്കാന് ആരുടെ മുന്നിലും തലകുനിക്കാന് പാര്ട്ടി തയ്യാറല്ല. കെ.എം മാണിയുടെ പിന്തുടര്ച്ച ആര്ക്കാണെന്ന് പാലായിലെ വോട്ടര്മാര് തീരുമാനിക്കും. അദ്ദേഹത്തിന്റെ ചെരുപ്പിന്റെ വാറഴിക്കാന് പോലും തനിക്ക് യോഗ്യതയില്ലെന്നും ജോസ് ടോം പറഞ്ഞു. ഇന്നിപ്പോള് പാലായുടെ മാസ്സ് ഡയലോഗാണ് കെ എം മാണിയാണ് തന്റെ ചിഹ്നമെന്ന ജോസ് ടോമിന്റെ വാക്കുകള്.
ചിഹ്നത്തിന്റെ കാര്യത്തില് ചില നിയമവശങ്ങള് ഉണ്ടെന്നും അത് പഠിച്ച ശേഷം തീരുമാനിക്കാമെന്നും പ്രതിപക്ഷ നേതാവ് രമേശ് ചെന്നിത്തലയും പറഞ്ഞു. ചിഹ്നത്തിന്റെ കാര്യത്തില് ആശങ്കകള് എത്രയും വേഗം പരിഹരിക്കുമന്ന് മുസ്ലീം ലീഗ് നേതാവ് പി.കെ.കുഞ്ഞാലിക്കുട്ടിയും പറഞ്ഞിരുന്നു. യു ഡി എഫിനെ വിശ്വാസത്തിലെടുത്തു ജോസ് കെ മാണിക്ക് തീരുമാനങ്ങളെടുക്കാന് കഴിഞ്ഞു എന്നതാണ് ജോസ് വിഭാഗത്തിന്റെ വിജയം. ഇനി പി ജെ ജോസഫിന് കാര്യങ്ങള് അത്ര എളുപ്പമാകാനിടയില്ല. യു ഡി എഫിനെ ക്ഷീണിപ്പിക്കുന്ന ഓരോ വിലപേശലും വിനയാകും എന്നതാണ് സ്ഥിതി.
ഇതിനിടെ പാലായില് ഇടത് മുന്നണിയ്ക്ക് റിബല് സ്ഥാനാര്ഥി ഉണ്ടാകുമെന്നുറപ്പായി. ഇടത് സ്ഥാനാര്ഥി മാണി സി കാപ്പനെതിരെ എന് സി പിയില് അന്തരിച്ച നേതാവ് ഉഴവൂര് വിജയനെ ബഹുമാനിക്കുന്ന വിഭാഗമാണ് സ്ഥാനാര്ഥിയെ നിര്ത്തുന്നത്. പ്രഖ്യാപനം തിങ്കളാഴ്ച ഉണ്ടാകുമെന്നാണ് സൂചന.
ഉഴവൂര് വിജയന്റെ മരണത്തിനുത്തരവാദി എന്ന നിലയില് എഫ് ഐ ആറില് പ്രതിചേര്ക്കപ്പെട്ട വ്യക്തി തന്നെയാണ് പാലായില് മാണി സി കാപ്പനെ എന് സി പി സ്ഥാനാര്ഥിയായി പ്രഖ്യാപിച്ചതെന്നാണ് ഏറ്റവും ദുഃഖകരമെന്നാണ് എന് സി പിയുടെ മുന് സംസ്ഥാന അധ്യക്ഷനായിരുന്ന അന്തരിച്ച നേതാവ് ഉഴവൂര് വിജയനെ അനുകൂലിക്കുന്നവരുടെ നേതാവ് പറഞ്ഞു.
നാമനിര്ദ്ദേശ പത്രിക സമര്പ്പിക്കു0മുമ്പ് അകാലത്തില് വിടപറഞ്ഞ തൊട്ടുമുമ്പുള്ള സംസ്ഥാന അധ്യക്ഷന് ഉഴവൂര് വിജയന് സ്വന്തം നേതാവും സ്വന്തം നിയോജക മണ്ഡലത്തില് ഉള്പ്പെട്ട വ്യക്തിയുമായിരുന്നിട്ടും അദ്ദേഹത്തിന്റെ ശവകുടീരത്തില് ഒരു പുഷ്പാര്ച്ചന നടത്താന് പോലും തയാറാകാതിരുന്ന എന് സി പി സ്ഥാനാര്ഥിയെ പിന്തുണയ്ക്കാനാകില്ലെന്നാണ് ഇവരുടെ നിലപാട്.
ഉഴവൂര് വിജയന്റെ മരണശേഷവും അദ്ദേഹത്തെ അവഹേളിക്കുന്ന തരത്തില് പ്രതികരിച്ചിട്ടുള്ള ഒരാളെ സ്ഥാനാര്ഥിയാക്കിയ പാര്ട്ടി തീരുമാനം അംഗീകരിക്കില്ലെന്നും ഇവര് പറയുന്നു. ഈ സാഹചര്യത്തില് മാണി സി കാപ്പനെതിരെ പാലായില് മുന് ഇടത് സ്ഥാനാര്ഥി കൂടിയായിരുന്ന ഉഴവൂര് വിജയന്റെ സ്മരണ നിലനിര്ത്തുംവിധം ഒരു സ്ഥാനാര്ഥിയെ നിര്ത്താനാണ് വിജയന് അനുകൂലികളുടെ നീക്കം. ചൊവ്വാഴ്ച സ്ഥാനാര്ഥി നാമനിര്ദ്ദേശ പത്രിക സമര്പ്പിക്കുമെന്നാണ് സൂചന.
https://www.facebook.com/Malayalivartha
