പാലാ ഉപതെരഞ്ഞെടുപ്പ് അടുത്തിരിക്കെ പിണറായി സര്ക്കാരിനെതിരെ അതിരൂക്ഷവിമര്ശനവുമായി എന്.എസ്.എസ് ജനറല് സെക്രട്ടറി ജി. സുകുമാരന് നായര് രംഗത്ത്
പാലാ ഉപതെരഞ്ഞെടുപ്പ് അടുത്തിരിക്കെ പിണറായി സര്ക്കാരിനെതിരെ അതിരൂക്ഷവിമര്ശനവുമായി എന്.എസ്.എസ് ജനറല് സെക്രട്ടറി ജി. സുകുമാരന് നായര് രംഗത്ത്. എന്.എസ്.എസ് അടക്കമുള്ള മുന്നോക്കവിഭാഗങ്ങളിലെ പാവപ്പെട്ടവര്ക്ക് അര്ഹമായ സാമ്പത്തിക സഹായങ്ങള് നല്കാന് സര്ക്കാര് തയ്യാറാകുന്നില്ലെന്നും ഈ നടപടി അംഗീകരിക്കാന് ആവില്ലെന്നും ജനറല്സെക്രട്ടറി വ്യക്തമാക്കി. വിവിധ പദ്ധതികളിലൂടെ 35 കോടിയിലധികം രൂപയാണ് പ്രതിവര്ഷം മുന്നോക്ക വിഭാഗ കോര്പ്പറേഷന് സര്ക്കാര് നല്കേണ്ടത്. രണ്ട് സാമ്പത്തിക വര്ഷങ്ങളിലായി 17 കോടി രൂപ മാത്രമാണ് അനുവദിച്ചത്. ഈ അവഗണന ജനാധിപത്യ സര്ക്കാരിന് ചേര്ന്നതാണോ എന്ന് ഉത്തരവാദപ്പെട്ടവര് ആലോചിക്കണമെന്ന് സുകുമാരന് നായര് ആവശ്യപ്പെട്ടു.
മുന്നോക്കക്കാരില് സാമ്പത്തികമായി പിന്നാക്കം നില്ക്കുന്നവര്ക്കുള്ള അംബേദ്കര് സ്കോളര്ഷിപ്പ് പദ്ധതിക്കായി കേന്ദ്രസര്ക്കാര് 2016-17 കാലത്ത് സംസ്ഥാന സര്ക്കാരിന് അനുവദിച്ച രണ്ട് കോടി 48 ലക്ഷം രൂപ മുന്നോക്ക വികസന കോര്പറേഷന് കൈമാറാത്തതിനാല് ആ തുക അര്ഹതപ്പെട്ടവരുടെ കയ്യില് എത്തിക്കാനായിട്ടില്ല. കോര്പ്പറേഷന്റെ മറ്റ്് സാമ്പത്തിക സഹായങ്ങളും കൃത്യമായി വിതരണം ചെയ്യുന്നില്ലെന്ന് ധാരാളം പരാതികള് ലഭിച്ചിട്ടുണ്ട്. വീട് നന്നാക്കല് , വിദ്യാര്ത്ഥികള്ക്കുള്ള സ്കോളര്ഷിപ്പ്, കോച്ചിങ് അസിസ്ന്റ്സ്, സ്കില് ഡവലപ്മെന്റ് , പലിശ സബ്സിഡി എന്നീ വിഭാഗങ്ങളിലായി അനുവദിച്ച ഫണ്ട് കുറവാണ്. അതിനാല് അപേക്ഷ ക്ഷണിച്ച്, പട്ടിക തയാറാക്കിയെങ്കിലും തുക നല്കാന് കഴിയാത്ത അവസ്ഥയിലാണ് കോര്പറേഷനെന്നും സുകുമാരന് നായര് ചൂണ്ടിക്കാട്ടി.
മറ്റ് സമുദായ സംഘടനകളില് പെട്ടവര്ക്ക് അര്ഹമായ ആനുകൂല്യം കൃത്യമായി നല്കുമ്പോള് മുന്നോക്ക വികസന കോര്പ്പറേഷനോട് സര്ക്കാര് കാണിക്കുന്ന വിവേചനം അംഗീകരിക്കാനാവില്ല. കോര്പ്പറേഷന്റെ പ്രവര്ത്തനം അവസാനിപ്പിക്കേണ്ട നിലയിലേക്കാണ് സര്ക്കാര് കാര്യങ്ങള് എത്തിച്ചിരിക്കുന്നത്. ഇത് ഈ വിഭാഗത്തോടുള്ള കടുത്ത അവഗണനയാണെന്നും സുകുമാരന് നായര് ആരോപിച്ചു. ആര്. ബാലകൃഷ്ണപിള്ളയാണ് മുന്നോക്ക വികസന കോര്പ്പറേഷന് ചെയര്മാന്. അദ്ദേഹം എന്.എസ്.സുമായും സുകുമാരന് നായരുമായും അകല്ച്ചയിലാണ്. ശബരിമല യുവതീപ്രവേശനം നടപ്പാക്കുന്നതിന് മുന്നോടിയായി ലിംഗസമത്വം ആവശ്യപ്പെട്ട് എല്.ഡി.എഫ് നടത്തിയ വനിതാ മതിലിന് ബാലകൃഷ്ണപിള്ള പിന്തുണ നല്കിയതോടെയാണ് സുകുമാരന് നായര് എതിര്പ്പ് പ്രകടിപ്പിച്ചത്.
ചങ്ങനാശ്ശേരി, പാല, വാഴൂര്, കറുകച്ചാല് തുടങ്ങി കോട്ടയം ജില്ലയിലെ പല പ്രദേശങ്ങളിലും എന്.എസ്.എസിന് സ്വാധീനമുണ്ട്. മുന്നോക്ക കോര്പ്പറേഷനുള്ള ഫണ്ട് സര്ക്കാര് അനുവദിച്ചില്ലെങ്കില് അതിന്റെ പ്രതിഫലനം പാലാ ഉപതെരഞ്ഞെടുപ്പില് ഉണ്ടാകും. ശബരിമല യുവതീപ്രവേശനത്തോടെയാണ് സര്ക്കാരും എന്.എസ്.എസും അകലുന്നത്. സെക്രട്ടറി സുകുമാരന്നായര്ക്കെതിരെ മുഖ്യമന്ത്രി പിണറായി വിജയനും സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനും രൂക്ഷവിമര്ശനം നടത്തി. അതോടെ കാര്യങ്ങള് കൈവിട്ട് പോയി. പിന്നീട് കോടിയേരി അനുരഞ്ജന ചര്ച്ചയ്ക്ക് ശ്രമിച്ചെങ്കിലും സുകുമാരന് നായര് വഴങ്ങിയില്ല. സര്ക്കാര് വിശ്വാസികളെ വഞ്ചിച്ചെന്ന നിലപാടിലായിരുന്നു എന്.എസ്.എസ്. അതോടെയാണ് പാര്ലമെന്റ് തെരഞ്ഞെടുപ്പില് സി.പി.എമ്മും എല്.ഡി.എഫും വന് പരാജയം ഏറ്റ് വാങ്ങേണ്ടിവന്നത്. ആ നിലപാട് പാലായിലും എന്.എസ്.എസ് ആവര്ത്തിക്കാനാണ് സാധ്യത. അങ്ങനെയെങ്കില് സര്ക്കാരിന് വലിയ തിരിച്ചടിയാകും.
https://www.facebook.com/Malayalivartha
