തദ്ദേശഭരണ സ്ഥാപനങ്ങളിലേക്ക് നടന്ന ഉപതെരഞ്ഞെടുപ്പുകളില്‍ വിചിത്രമായ സഖ്യങ്ങളും വിജയങ്ങളും പരാജയങ്ങളും സംഭവിച്ചു. കാസര്‍കോട് ബേഡകം പഞ്ചായത്തില്‍ കോണ്‍ഗ്രസ് സ്ഥാനാര്‍ത്ഥിയെ നിര്‍ത്താതെ ബി.ജെ.പിയെ സഹായിച്ചെങ്കിലും എല്‍.ഡി.എഫ് 399 വോട്ടിന് വിജയിച്ചു. പഞ്ചായത്തിലെ നാലാം വാര്‍ഡില്‍ ബിജെപി സ്ഥാനാര്‍ത്ഥി കവിതയെ 399 വോട്ടിനാണ് എല്‍ഡിഎഫ് സ്ഥാനാര്‍ത്ഥി എ.ടി സരസ്വതി തോല്‍പിച്ചത്. യുഡിഎഫ് സ്ഥാനാര്‍ത്ഥിയെ മന:പൂര്‍വം നിര്‍ത്താഞ്ഞതാണെന്ന് എല്‍.ഡി.എഫ് ആരോപിച്ചു. കഴിഞ്ഞതവണത്തെ വിജയി എല്‍ഡിഎഫിലെ കൃപാജ്യോതി സര്‍ക്കാര്‍ ജോലി കിട്ടി രാജിവെച്ച ഒഴിവിലായിരുന്നു തെരഞ്ഞെടുപ്പ്. ലോക്‌സഭാ തെരഞ്ഞെടുപ്പിലും യു.ഡി.എഫിന് ബി.ജെ.പിയുമായി അവിശുദ്ധ സഖ്യം ഉണ്ടായിരുന്നെന്നും എല്‍.ഡി.എഫ് ആരോപിച്ചു.

അതേസമയം തിരുവനന്തപുരം കാരോട് പഞ്ചായത്തിലെ കാന്തള്ളൂര്‍ വാര്‍ഡില്‍ നടന്ന ഉപതിരഞ്ഞെടുപ്പില്‍ സി പി എം വോട്ടുകള്‍ ബി ജെ പി യ്ക്ക് മറിച്ചതായി ആരോപണം ഉയര്‍ന്നു. അവിടെ ബി ജെ പി സ്ഥാനാര്‍ത്ഥി വിജയിച്ചു. കഴിഞ്ഞ 14 വര്‍ഷമായി സി.പി.എം സിറ്റിംഗ് സീറ്റില്‍ സി.പി.എമ്മിലെ സൗമ്യയ്ക്ക് 65 വോട്ട് മാത്രമാണ് ലഭിച്ചത്. കോണ്‍ഗ്രസിലെ സത്യരാജ് 488 വോട്ടുകള്‍ പിടിച്ചപ്പോള്‍ ബിജെപിയിലെ പ്രമോദ് 511 വോട്ടുകള്‍ നേടി വിജയിച്ചു. എല്‍.ഡി.എഫ് ഭരി്ക്കുന്ന പഞ്ചയത്തില്‍ തുല്യമാണ് കക്ഷിനില. കോണ്‍ഗ്രസ് മെമ്പര്‍ ജയിച്ചാല്‍ പഞ്ചായത്ത് ഭരണം കോണ്‍ഗ്രസിന് ലഭിയ്ക്കുമായിരുന്നു. അതിനാലാണ് 14 വര്‍ഷം സിറ്റിംഗ് വാര്‍ഡായിരുന്ന കാന്തള്ളുരില്‍ സി.പി.എം ബി.ജെ.പിക്ക് വോട്ട് മറിച്ചത്.

ബാലുശേരി കോട്ടൂര്‍ പഞ്ചായത്ത് 17ാം വാര്‍ഡ് ഉപതെരഞ്ഞെടുപ്പില്‍ എല്‍ഡിഎഫ് സ്ഥാനാര്‍ത്ഥി സിപിഎമ്മിലെ വി കെ അനിത വിജയിച്ചു. 255 വോട്ടുകളുടെ ഭൂരിപക്ഷത്തിലാണ് വിജയം. പോള്‍ ചെയ്ത 1114 വോട്ടില്‍ അനിതയ്ക്ക് 668 വോട്ടും യുഡിഎഫ് സ്വതന്ത്ര സ്ഥാനാര്‍ത്ഥി സുജ പറക്കുന്നത്തിന് 413 വോട്ടും ലഭിച്ചു. ബിജെപി സ്ഥാനാര്‍ത്ഥി കണ്ടപ്പാട്ടില്‍ശോഭനയ്ക്ക് 33 വോട്ടും ലഭിച്ചു. ബിജെപിയുടെ വോട്ട് കഴിഞ്ഞ തവണത്തേക്കാളും കുറഞ്ഞു. 2015ലെ തെരഞ്ഞെടുപ്പില്‍ 269 വോട്ടിനാണ് സിപിഎം ഈ വാര്‍ഡില്‍ വിജയിച്ചത്. തിരുവനന്തപുരം കണിയാപുരം ഡിവിഷന്‍ ഉപതെരഞ്ഞെടുപ്പില്‍ യുഡിഎഫ് സ്ഥാനാര്‍ഥി കുന്നുംപുറം വാഹിദ് 1056 വോട്ടിന്റെ ഭൂരിപക്ഷം നേടി വിജയിച്ചു.

തിരുവനന്തപുരം ജില്ലാ പഞ്ചായത്ത് മണമ്പൂര്‍ ഡിവിഷനില്‍ എല്‍.ഡി.എഫിന് ചരിത്ര വിജയം. 13406 വോട്ടുകള്‍ നേടിയാണ് എല്‍.ഡി.എഫിന്റെ നേട്ടം. ഉപതെരഞ്ഞെടുപ്പിന്റെ വോട്ടെണ്ണല്‍ പൂര്‍ത്തിയായപ്പോള്‍ 1921 വോട്ടിന്റെ ലീഡോടെ എല്‍.ഡി.എഫ് സ്ഥാനാര്‍ത്ഥി അഡ്വ.എസ്.ഷാജഹാന്‍ വിജയിച്ചു. സി.പി.എം തിരുവനന്തപുരം ജില്ലാ കമ്മിറ്റി അംഗമാണ് എസ്.ഷാജഹാന്‍.എല്‍.ഡി.എഫ്: 13406, യു.ഡി.എഫ്:11485, ബി.ജെ.പി: 7361 എന്നിങ്ങനെയാണ് വോട്ട് നില. തിരുവനന്തപുരം ജില്ലാപ്പഞ്ചായത്തംഗമായിരുന്ന സി.പി.എമ്മിലെ എസ്.കൃഷ്ണന്‍കുട്ടിയുടെ നിര്യാണത്തെ തുടര്‍ന്നാണ് ഇവിടെ ഉപതെരഞ്ഞെടുപ്പ് വേണ്ടി വന്നത്. ആറ് പഞ്ചായത്തുകളിലെ 60 വാര്‍ഡുകളാണ് മണമ്പൂര്‍ ഡിവിഷനിലുള്ളത്. വെട്ടൂരിലെ 14ഉം മണമ്പൂരിലെ 16ഉം ഉള്‍പ്പെടെ മുഴുവന്‍ വാര്‍ഡുകളും ചെറുന്നിയൂരില്‍ മൂന്ന്, നാല് ഒഴികെയുള്ള 12 വാര്‍ഡുകളും ഒറ്റൂരിലെ 13ല്‍ ഒമ്പത് വാര്‍ഡുകളും കരവാരത്തെ ഒന്ന്, രണ്ട്, അഞ്ച്, 17, 18, നാവായിക്കുളത്തെ 11, 12, 14, 15 വാര്‍ഡുകളും ചേര്‍ന്നതാണ് മണമ്പൂര്‍ ഡിവിഷന്‍. കഴിഞ്ഞ തിരഞ്ഞെടുപ്പില്‍ എസ്.കൃഷ്ണന്‍കുട്ടി 1200 വോട്ടുകള്‍ക്കാണ് വിജയിച്ചത്. കഴിഞ്ഞ തവണത്തേതിനേക്കാള്‍ 700 ലധികം വോട്ടുകള്‍ കൂടുതല്‍ നേടി തകര്‍പ്പന്‍ വിജയമാണ് കരസ്ഥമാക്കിയത് യു.ഡി.എഫിന് കഴിഞ്ഞ തവണത്തേക്കാള്‍ വോട്ട് കുറയുകയും ചെയ്തു.