പ്രസിദ്ധമായ അമ്പലപ്പുഴ പാല്പ്പായസമെന്ന പേരില് വ്യാജ പാല്പ്പായസം വിറ്റുവന്ന ബേക്കറിക്കെതിരെ തിരുവിതാംകൂര് ദേവസ്വം ബോര്ഡ് നിയമനടപടിക്ക്
04 SEPTEMBER 2019 05:09 PM IST
മലയാളി വാര്ത്ത
ആദ്യം പാല്പ്പായസം നല്കാന് വിസമ്മതിച്ച ബേക്കറി ജീവനക്കാര് പിന്നീട് 175 രൂപ വില ഈടാക്കി പായസം നല്കി. ഇക്കാര്യം സംബന്ധിച്ച് വിജിലന്സും പരിശോധന നടത്തി തട്ടിപ്പ് മനസ്സിലാക്കി. തുടര്ന്ന് വിഷയം ദേവസ്വം ബോര്ഡിന്റെ ശ്രദ്ധയില്പ്പെടുത്തുകയായിരുന്നു. തിരുവിതാംകൂര് ദേവസ്വം ബോര്ഡിന്റെ അമ്പലപ്പു!ഴ ക്ഷേത്രത്തില് തയ്യാറാക്കി ക്ഷേത്രത്തിലെ കൗണ്ടറിലൂടെ മാത്രം ഭക്തര്ക്ക് വിതരണം ചെയ്ത് വരുന്ന ചരിത്രപ്രസിദ്ധമായ അമ്പലപ്പുഴ പാല്പായസം വ്യാജമായി നിര്മ്മിച്ച് , ഭക്തരെ തെറ്റിദ്ധരിപ്പിച്ച് ബേക്കറിയിലൂടെ വില്പ്പന നടത്തിയ തിരുവല്ല തോംസണ് ബേക്കറി ഉടമക്കെതിരെ നിയമനടപടി സ്വീകരിക്കാന് ഹരിപ്പാട് ഡെപ്യൂട്ടി ദേവസ്വം കമ്മീഷണറെ ചുമതലപ്പെടുത്തിയതായി ദേവസ്വം പ്രസിഡന്റ് എ.പത്മകുമാര് അറിയിച്ചു.
ഇതനുസരിച്ച് ആലപ്പുഴ എസ്പിക്കും അമ്പലപ്പുഴ പൊലീസ് സ്റ്റേഷനിലും ദേവസ്വം ബോര്ഡ് പരാതി നല്കിയതായി ഡെപ്യൂട്ടി കമ്മീഷണര് പറഞ്ഞു. 500മില്ലിലിറ്റര് അമ്പലപ്പുഴപാല്പ്പായസം എന്ന പേരില് 175 രൂപ വാങ്ങിയാണ് ബേക്കറി ജീവനക്കാര് വില്പ്പന തകൃതിയാക്കിയിരുന്നത്. കൂടാതെ സ്വകാര്യ ബേക്കറിയില് അമ്പലപ്പുഴ പാല്പ്പായസ വില്പ്പന എന്ന് തരത്തില് വാര്ത്തകള് സോഷ്യല് മീഡിയയിലൂടെയും വാട്സ് അപ് സന്ദേശങ്ങള് വഴിയും വ്യാപകമായ പ്രചരിപ്പിക്കുകയും ചെയ്തിട്ടുണ്ട്. ഇത്തരക്കാര്ക്കെതിരെയും നിയമനടപടി സ്വീകരിക്കാനും ദേവസ്വം ബോര്ഡ് തീരുമാനിച്ചിരിക്കുകയാണ്. തിരുവിതാംകൂര് ദേവസ്വംബോര്ഡിന്റെ വരുമാനങ്ങളിലൊന്നായ അമ്പലപ്പുഴപാല്പ്പായസ വില്പ്പനയെ തകര്ക്കാനും അമ്പലപ്പുഴ ശ്രീകൃഷ്ണ സ്വാമി ക്ഷേത്രത്തിന്റെ പ്രസിദ്ധി്ക്ക് കോട്ടം വരുത്താനുമുള്ള ചിലകേന്ദ്രങ്ങളില് നിന്നുള്ള ഗൂഢനീക്കമാണ് ഇത്തരം പ്രവര്ത്തനങ്ങള്ക്ക് പിന്നിലെന്ന് സംശയിക്കേണ്ടിയിരിക്കുന്നുവെന്ന് ദേവസ്വം ബോര്ഡ് പ്രസിഡന്റ് പറഞ്ഞു.
ചെമ്പകശ്ശേരി രാജാവാണ് അമ്പലപ്പുഴ പാല്പ്പായസം ഉണ്ടാക്കാന് കാരണക്കാരന്. ഒരിക്കല് അദ്ദേഹം സൈനികച്ചെലവിനും മറ്റുമായി ആനപ്രാമ്പല് സ്വദേശിയായ ഒരു തമിഴ് ബ്രാഹ്മണനോടു കുറെ നെല്ല് വായ്പ വാങ്ങി. മുതലും കൂട്ടുപലിശയും ചേര്ന്ന് അതു മുപ്പത്തിയാറായിരം പറയായി വര്ധിച്ചു. രാജാവിനോട് കടബാദ്ധ്യത തീര്ക്കാന് പലപ്രാവശ്യം ബ്രാഹ്മണന് അപേക്ഷിച്ചിട്ടും ഫലമുണ്ടായില്ല. ഒരു ദിവസം രാജാവു ക്ഷേത്രദര്ശനത്തിനു വന്നപ്പോള് 'എന്റെ കടം തീര്ക്കാതെ തേവരാണെ അകത്തു കടക്കരുത്' എന്നു ബ്രാഹ്മണന് വിളിച്ചുപറഞ്ഞു. സത്യസന്ധനായ രാജാവു വിഷമിച്ചു. ബുദ്ധിമാനായ മന്ത്രി വിവരമറിഞ്ഞ് അവശ്യംവേണ്ട നെല്ല് നാട്ടുകാരില് നിന്നു കടംവാങ്ങി കിഴക്കേനടയിലുള്ള ആനക്കൊട്ടിലില് അളന്നുകൂട്ടിച്ചു. ഉച്ചശീവേലിക്കു മുന്പ് നെല്ലു സ്ഥലത്തുനിന്നും മാറ്റുന്നതിനു ബ്രാഹ്മണനെ മന്ത്രി നിര്ബന്ധിച്ചു. മന്ത്രിയുടെ രഹസ്യമായ ആജ്ഞ ഉണ്ടായിരുന്നതിനാല് ബ്രാഹ്മണനു ചുമട്ടുകാരെയോ വള്ളക്കാരെയോ ലഭിച്ചില്ല. ഉച്ചശീവേലിക്കു സമയമടുത്തിട്ടും നെല്ലു മാറ്റാന് നിവൃത്തിയില്ലാതെവന്നപ്പോള് ആ ബ്രാഹ്മണന് പശ്ചാത്താപവിവശനായി. ആ നെല്ലു മുഴുവന് അതിന്റെ പലിശകൊണ്ടു നിത്യേന ശ്രീകൃഷ്ണസ്വാമിക്കു പാല്പ്പായസ നിവേദ്യം നടത്തുന്നതിനു വഴിപാടായി അര്പ്പിച്ചു. അങ്ങനെയാണ് ചരിത്രപ്രസിദ്ധമായ അമ്പലപ്പുഴപാല്പ്പായസം ഉണ്ടായത്.
അപ്പപ്പോഴുള്ള വാര്ത്തയറിയാന് ഞങ്ങളുടെ ഫേസ്ബുക്ക് പേജ് LIKE ചെയ്യുക
https://www.facebook.com/Malayalivartha
https://www.facebook.com/Malayalivartha
