ചന്ദ്രബോസ് വധക്കേസിലെ പ്രതി മുഹമ്മദ് നിസാമിന് ഇടക്കാല ജാമ്യം. ഏഴു ദിവസത്തേക്കാണ് നിസാമിന് ഇടക്കാല ജാമ്യം അനുവദിച്ചിരിക്കുന്നത്. മൂന്നു ലക്ഷം രൂപയുടെ ബോണ്ട്, രണ്ട് ആള്‍ ജാമ്യവും, ദിവസവും പോലീസ് സ്‌റ്റേഷനില്‍ ഒപ്പിടണം തുടങ്ങിയ വ്യവസ്ഥകളോടെയാണ് ജാമ്യം. ഇക്കഴിഞ്ഞ ജനുവരിയില്‍ അഞ്ചു ദിവസവും അമ്മയെ കാണാന്‍ നിസാമിന് പ്രത്യേക ഇളവുകള്‍ കോടതി അനുവദിച്ചിരുന്നു.

2016 ജനുവരി 21 നായിരുന്നു തൃശ്ശൂര്‍ ജില്ലാ അഡീഷണല്‍ സെഷന്‍സ് കോടതി നിസാമിന് ശിക്ഷ വിധിച്ചത്. മദ്യലഹരിയിലായിരുന്ന നിസാം, പുഴക്കല്‍ ശോഭാ സിറ്റിയിലെ സെക്യൂരിറ്റി ജീവനക്കാരനായ ചന്ദ്രബോസിനെ, തന്റെ കാറിടിച്ച് കൊലപ്പെടുത്തുകയായിരുന്നു. തന്റെ വാഹനം വന്നപ്പോള്‍ ഗേറ്റ് തുറന്നു കൊടുക്കാത്തത്തില്‍, പ്രതിഷേധിച്ച് ആദ്യം സെക്യൂരിറ്റി ജീവനക്കാരനായ ചന്ദ്രബോസിനെ മര്‍ദ്ദിക്കുകയും, പിന്നീട് തന്റെ ആഡംബര വാഹനം കൊണ്ട് ഇടിച്ചു വീഴ്ത്തുകയായിരുന്നു.
വിചാരണവേളയില്‍, മുഖ്യ സാക്ഷി അനൂപ് കൂറുമാറിയ എങ്കിലും നിസാമിന് എതിരെയുള്ള ശക്തമായ പോലീസ് തെളിവുകളുടെ അടിസ്ഥാനത്തില്‍ കോടതി ശിക്ഷ വിധിക്കുകയായിരുന്നു. ജീവപര്യന്തം തടവും 80 ലക്ഷം രൂപ പിഴയടയ്ക്കാനും, മറ്റ് വകുപ്പുകള്‍ പ്രകാരം 24 വര്‍ഷം തടവും ആയിരുന്നു ശിക്ഷ. ശിക്ഷകള്‍ പ്രത്യേകം അനുഭവിക്കണമെന്നും പിഴയില്‍ 50 ലക്ഷം രൂപ ചന്ദ്ര ബോസിന്റെ കുടുംബത്തിന് നല്‍കണമെന്നായിരുന്നു കോടതിവിധി.