പ്രളയദുരിതാശ്വാസ ക്യാമ്പുകളില്‍ നിലവില്‍ താമസിക്കുന്നവര്‍ക്ക് ഓണക്കോടി വിതരണം ചെയ്യും. ഇതിനുള്ള തുക മുഖ്യമന്ത്രിയുടെ ദുരിതാശ്വാസനിധിയില്‍ നിന്ന് അനുവദിക്കുവാന്‍ മന്ത്രിസഭായോഗം തീരുമാനിച്ചു. ഇതിനുള്ള തുടര്‍ നടപടികള്‍ അതത് ജില്ലാ കലക്ടര്‍മാര്‍ സ്വീകരിക്കും. പ്രളയ ദുരിതാശ്വാസമായി ബന്ധപ്പെട്ട് സര്‍ക്കാര്‍ നിര്‍മിച്ചു നല്‍കിയ വീടുകളില്‍ ഈ ഓണക്കാലയളവില്‍ 'ഗൃഹപ്രവേശം' നടത്തും. ജില്ലാ ചുമതലയുള്ള മന്ത്രിമാരെയും ജനപ്രതിനിധികളെയും പങ്കെടുപ്പിച്ചാണ് ചടങ്ങ് നടത്തുക. 60 വയസ്സിനു മുകളില്‍ പ്രായമുള്ള പട്ടികവര്‍ഗ വിഭാഗക്കാര്‍ക്ക് സൗജന്യ ഓണക്കോടി നല്‍കും.

ജില്ലാ കോടതികളിലേയും കീഴ്‌കോടതികളിലേയും ഗവണ്‍മെന്റ് ലോ ഓഫീസര്‍മാരുടെ കണ്‍സോളിഡേറ്റഡ് മാസവേതനം വര്‍ധിപ്പക്കാനും മന്ത്രിസഭ തീരുമാനിച്ചു. ജില്ലാ ഗവ. പ്ലീഡര്‍ ആന്റ് പബ്ലിക് പ്രോസിക്യൂട്ടര്‍ 87,500, അഡീഷണല്‍ ഗവ. പ്ലീഡര്‍ ആന്റ് അഡീഷണല്‍ പബ്ലിക് പ്രോസിക്യൂട്ടര്‍ 75,000, അഡ്വക്കേറ്റ് ഫോര്‍ ഡൂയിംഗ് ഗവണ്‍മെന്റ് വര്‍ക്ക് 20,000 എന്നിങ്ങനെയാണ് വര്‍ധന.
താമരശ്ശേരി ജൂഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി രണ്ടിനെ മുന്‍സിഫ് മജിസ്‌ട്രേറ്റ് കോടതിയായി പരിവര്‍ത്തനം ചെയ്യും. ഇതിന്റെ ഭാഗമായി 11 തസ്തികകള്‍ ക്രമീകരിക്കും. വിജിലന്‍സ് ആന്റ് ആന്റി കറപ്ഷന്‍ ബ്യൂറോയിലെ ഓരോ റേഞ്ചിലും ഒന്നു വീതം നാല് ലീഗല്‍ അഡൈ്വസര്‍ തസ്തികകള്‍ സൃഷ്ടിക്കും. നിലവിലെ എട്ട് അഡീഷണല്‍ ലീഗല്‍ അഡൈ്വസര്‍ തസ്തികകള്‍ പബ്ലിക് പ്രോസിക്യൂട്ടര്‍ തസ്തികയാക്കി പുനര്‍നാമകരണം ചെയ്യാനും തീരുമാനിച്ചു.

തിരുവനന്തപുരം സര്‍ക്കാര്‍ ഡന്റല്‍ കോളജിന്റെ ഭാഗമായുള്ള ഡന്റല്‍ ലാബിന്റെ പ്രവര്‍ത്തനത്തിന് ഡന്റല്‍ മെക്കാനിക്ക് ഗ്രേഡ് ഒന്നില്‍ ഒരു തസ്തികയും ഡന്റല്‍ മെക്കാനിക്ക് ഗ്രേഡ് 2 ല്‍ 5 തസ്തികകളും കാഷ്വല്‍ സ്വീപ്പര്‍, സെക്യൂരിറ്റി വിഭാഗങ്ങളില്‍ രണ്ട് വീതം തസ്തികകളും സൃഷ്ടിക്കും. കണ്ണൂര്‍ ജില്ലയില്‍ കിന്‍ഫ്രയുടെ സ്ഥലമെടുപ്പ് ജോലികള്‍ നടത്താന്‍ സ്‌പെഷ്യല്‍ തഹസില്‍ദാര്‍ ലാന്റ് അക്വിസിഷന്റെ ഒരു യൂണിറ്റ് തുടങ്ങും. ഇതിന് 11 തസ്തികകള്‍ സൃഷ്ടിക്കും. സ്‌പെഷ്യല്‍ തഹസില്‍ദാര്‍-1, ജൂനിയര്‍ സൂപ്രണ്ട്/വാല്യൂവേഷന്‍ അസിസ്റ്റന്റ്-2, റവന്യൂ ഇന്‍സ്‌പെക്ടര്‍-2, സീനിയര്‍ ക്ലാര്‍ക്ക്/എസ്.വി.ഒ -2, ക്ലാര്‍ക്ക്/വില്ലേജ് അസിസ്റ്റന്റ്-2, സര്‍വെയര്‍-2 എന്നിങ്ങനെയാണ് 11 തസ്തികകള്‍.

അടിമാലി ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി രണ്ടിനെ മുന്‍സിഫ് മജിസ്‌ട്രേറ്റ് കോടതിയായി പരിവര്‍ത്തനം ചെയ്യും. കോട്ടക്കല്‍ വൈദ്യരത്‌നം പി.എസ്. വാരിയര്‍ ആയുര്‍വേദ മെഡിക്കല്‍ കോളജില്‍ ബാച്ചിലര്‍ ഓഫ് ആയുര്‍വേദിക് മെഡിസിന്‍ ആന്റ് സര്‍ജറി സീറ്റുകളുടെ എണ്ണം 50-ല്‍ നിന്നും 60 ആയി വര്‍ധിപ്പിക്കും. കേരള കൈത്തറി തൊഴിലാളി ക്ഷേമനിധി ബോര്‍ഡിലെ സ്ഥിരം ജീവനക്കാര്‍ക്ക് പത്താം ശമ്പള പരിഷ്‌കരണ ആനുകൂല്യങ്ങള്‍ അനുവദിക്കും. ദേശീയപാത അതോറിറ്റിക്കു വേണ്ടി രൂപീകരിച്ചിട്ടുള്ള 39 ലാന്റ് അക്വിസിഷന്‍ യൂണിറ്റുകള്‍ക്ക് 2020 മാര്‍ച്ച് 31 വരെ തുടര്‍ച്ചാനുമതി നല്‍കാനും മന്ത്രിസഭ തീരുമാനിച്ചു.