ഗവണ്മെന്റ് പദ്ധതികളും ആനുകൂല്യങ്ങളും ഇനി വിരല്ത്തുമ്പില് - ജനത ആപ്പ് പുറത്തിറങ്ങി
ജനങ്ങളും ജനപ്രതിനിധികളും തമ്മിലുള്ള ബന്ധം സുദൃഢമാക്കുകയെന്ന ലക്ഷ്യത്തോടെ രൂപീകരിച്ച 'ജനത ആപ്പിന്റെ' ഔദ്യോഗിക ഉദ്ഘാടനം നിയമസഭാ സ്പീക്കര് പി. ശ്രീരാമകൃഷ്ണന് നിര്വ്വഹിച്ചു. 'ജനാധിപത്യത്തിന്റെ കാതലെന്നത് ജനങ്ങളുമായുള്ള ബന്ധം തുടര്ച്ചയായി കാത്തുസൂക്ഷിക്കുക എന്നതും ജനപ്രതിനിധികളുടെ പ്രവര്ത്തനങ്ങള് സുതാര്യമായി ജനങ്ങള്ക്കിടയില് എത്തുകയെന്നതുമാണ്. ജനപ്രതിനിധികള്ക്ക് അവരുടെ വൈവിധ്യമാര്ന്ന പ്രവര്ത്തനങ്ങള് പങ്കുവയ്ക്കാനും ജനങ്ങള്ക്ക് അവരുടെ ആശയങ്ങളും അഭിപ്രായങ്ങളും പരാതികളും അറിയിക്കാനുമുള്ള സംവിധാനം ജനത ആപ്പിലുണ്ട്. ഇതൊരു സാധാരണ ന്യൂസ് പോര്ട്ടലല്ല, മറിച്ച് ഓരോ ജനപ്രതിനിധിയുടെയും പ്രവര്ത്തനങ്ങള് വിശകലനം ചെയ്യാനും അവരുമായി നിരന്തരം ബന്ധം സ്ഥാപിക്കാനും സാധ്യമാക്കുന്നൊരു നവീന ഉദ്യമമാണിത്' സ്പീക്കര് വ്യക്തമാക്കി.
ജനത ആപ്പ് വഴി ജനക്ഷേമകരമായ ഗവണ്മെന്റ് പദ്ധതികളെയും ആനുകൂല്യങ്ങളെയും പറ്റി യഥാസമയം തന്നെ അറിയുവാനുള്ള സൗകര്യമുണ്ട്. ഇതോടൊപ്പം മറ്റനേകം അറിയിപ്പുകള്, വ്യത്യസ്ത വിഷയങ്ങളെക്കുറിച്ചുള്ള ആര്ട്ടിക്കിളുകള് തുടങ്ങിയവയും ലഭ്യമാണ്. കൂടാതെ വിദ്യാര്ത്ഥികള്ക്കും സ്വയംസംരംഭകര്ക്കും പ്രയോജനകരമായ പദ്ധതികള്, പരിശീലന പരിപാടികള്, മത്സരങ്ങള് തുടങ്ങിയവയെക്കുറിച്ചുള്ള വിവരങ്ങള് കേരള സ്റ്റാര്ട്ടപ് മിഷന്റെ ആഭിമുഖ്യത്തില് 'സ്റ്റാര്ട്ടപ്പ്' എന്ന കാറ്റഗറിയില്ക്കൂടി പ്രസിദ്ധീകരിച്ചുവരുന്നു. തിരുവനന്തപുരം ടെക്നോപാര്ക്കില് പ്രവര്ത്തിക്കുന്ന ഇനോമെട്രിക്സ് ടെക്നോളജി സിസ്റ്റംസ് എന്ന സ്ഥാപനമാണ് ജനത ആപ്പ് വികസിപ്പിച്ചത്.
'ജനാധിപത്യം വിരല്ത്തുമ്പില്' എന്ന ആപ്തവാക്യം പോലെ ഭരണ പ്രക്രിയയില് പൊതുജനങ്ങളുടെ പങ്കാളിത്തം വര്ദ്ധിപ്പിച്ച് കൂടുതല് സുതാര്യവും കാര്യക്ഷമവുമാക്കുക എന്ന മഹത്തായ ലക്ഷ്യം മുന്നിര്ത്തിയാണ് ആപ്പിന്റെ പ്രവര്ത്തനം. ആന്ഡ്രോയ്ഡ് ഉപഭോക്താക്കള്ക്കു നിലവില് ഗൂഗിള് പ്ലേ സ്റ്റോറില് നിന്നും ജനത ആപ്പ് ഡൌണ്ലോഡ് ചെയ്യാവുന്നതാണ്. ഐ.ഒ.എസ് വേര്ഷന് ഉടന് തന്നെ ആപ്പ് സ്റ്റോറില് ലഭ്യമാക്കുമെന്ന് കമ്പനി അറിയിച്ചു.
https://www.facebook.com/Malayalivartha
