യൂണിവേഴ്‌സിറ്റി കോളജിലെ കത്തിക്കുത്തും പി.എസ്.സി പരീക്ഷയില്‍ എസ്.എഫ്.ഐ നേതാക്കള്‍ തട്ടിപ്പ് നടത്തിയതും പലരും ആയുധമാക്കുകയും സംഘടനയ്‌ക്കെതിരെ പ്രചരണം നടത്തുകയും ചെയ്തിട്ടും കണ്ണൂര്‍, കാലിക്കട്ട് സര്‍വകലാശാലയ്ക്ക് കീഴിലെ കോളജുകളിലെ യൂണിയന്‍ തെരഞ്ഞെടുപ്പില്‍ സംഘടനയ്ക്ക് വന്‍ വിജയം. കെ.എസ്.യു- എം.എസ്.എഫ് സഖ്യവും എ.ബി.വി.പിയുമാണ് എസ്.എഫ്.ഐക്കെതിരെ അണിനിരന്നത്. ഇവര്‍ പലയിടത്തും രഹസ്യമായും പരസ്യമായും അടവുകള്‍ പയറ്റിയെങ്കിലും പണി പാളി. കണ്ണൂര്‍ സര്‍വകലാശാലയ്ക്ക് കീഴില്‍ തെരഞ്ഞെടുപ്പ് നടന്ന 67 കോളജുകളില്‍ 55ലും എസ്എഫ്‌ഐ യൂണിയന്‍ വിജയിച്ചു. കലിക്കട്ടിലെ അരീക്കോട് സുല്ലമുസ്സലാം കോളേജില്‍ രണ്ട് പതിറ്റാണ്ടിന് ശേഷം എസ്എഫ്‌ഐ യൂണിയന്‍ അധികാരം തിരിച്ചുപിടിച്ചു. സംഘടനയ്‌ക്കെതിരെ എന്തെല്ലാം കുപ്രചരണങ്ങള്‍, ആരെല്ലാം അഴിച്ചുവിട്ടാലും വിദ്യാര്‍ത്ഥികള്‍ തങ്ങള്‍ക്കൊപ്പമാണെന്ന് തെരഞ്ഞെടുപ്പ് ഫലം തെളിയിക്കുന്നതായി എസ്.എഫ്.ഐ നേതാവ് സച്ചിന്‍ ദേവ് മലയാളി വാര്‍ത്തയോട് പറഞ്ഞു.

കണ്ണൂര്‍ ജില്ലയിലെ 41ല്‍ 34 കോളേജ് യൂണിയനുകളും കാസര്‍കോട്ടെ 21ല്‍ പതിനേഴും വയനാട്ടിലെ അഞ്ചില്‍ നാലും എസ്എഫ്‌ഐ യൂണിയന്‍ ഭരിക്കും. കണ്ണൂരിലെ 27 കോളേജുകളില്‍ എസ്എഫ്‌ഐക്ക് എതിരുണ്ടായില്ല. 36 യുയുസി സ്ഥാനത്തേക്ക് മത്സരം നടന്നില്ല. കണ്ണൂര്‍ ജില്ലയില്‍ 20ലും കാസര്‍കോട്ട് ആറിടത്തും വയനാട് ഒരു കോളേജിലും എസ്എഫ്‌ഐക്ക് എതിരാളികളുണ്ടായിരുന്നില്ല. കലിക്കട്ട് സര്‍വ്വകലാശാലക്ക് കീഴില്‍ തൃശൂര്‍ ജില്ലയിലെ 27 കോളജുകളില്‍ 25ലും എസ്എഫ്‌ഐ ഭരിക്കും. പാലേമാട് എസ് വി പി കെ കോളേജ്, കെ എം സി ടി കോളേജ് കുറ്റിപ്പുറം, സഫ കോളേജ് പൂക്കാട്ടിരി, മലബാര്‍ കോളജ് മാണൂര്‍ എന്നിവിടങ്ങളില്‍ എംഎസ്എഫ് - കെ.എസ്.യു സഖ്യത്തിന്റെ ഭരണമാണ് എസ്.എഫ്.ഐ അവസാനിപ്പിച്ചത്.

കോഴിക്കോട്ട് ജില്ലയിലെ കോളജുകളിലെ 84 യു.യു.സിമാരില്‍ 68 എണ്ണവും കണ്ണൂരിലെ 56ല്‍ 45ഉം കാസര്‍കോട്ട് 23ല്‍ 19ഉം വയനാട്ടില്‍ അഞ്ചില്‍ നാലും എസ്എഫ്‌ഐ വിജയിച്ചു. കാസര്‍കോട് ഗവ. കോളേജ്, മഞ്ചേശ്വരം ഗോവിന്ദപൈ, പനത്തടി സെന്റ് മേരീസ്, കണ്ണൂര്‍ കാരക്കുണ്ട് എംഎം നോളജ്, മുട്ടന്നൂര്‍ കോണ്‍കോഡ്, കൂത്തുപറമ്പ് നിര്‍മലഗിരി എന്നിവങ്ങളിലെ കെ.എസ്.യു- എം.എസ്.എഫ് ഭരണത്തിന് അറുതിവരുത്തുകയും ചെയ്തു. മഞ്ചേശ്വം ഗോവിന്ദപൈ കോളേജില്‍ എബിവിപിയെയും മറ്റിടങ്ങളില്‍ കെഎസ്.യു എംഎസ്എഫ് സഖ്യത്തെയുമാണ് പരാജയപ്പെടുത്തിയത്.

ഒല്ലൂര്‍ ഗവ. ആര്‍ട്‌സ്ആന്‍ഡ് സയന്‍സ് കോളേജ്, കൊടുങ്ങല്ലൂര്‍ ഐഎച്ച് ആര്‍ഡി കോളേജ് എന്നിവ എബിവിപിയില്‍ നിന്നും പൊയ്യ എയിംസ് ലോകോളേജ് കെഎസ്യുവില്‍നിന്നും പിടിച്ചെടുത്തു. അഞ്ചിടത്ത് എസ്എഫ്‌ഐക്ക് എതിരില്ലായിരുന്നു. വയനാട് തെരഞ്ഞെടുപ്പ് നടന്ന 13 കോളേജുകളില്‍ ഒമ്പതിലും എസ്എഫ്‌ഐ വിജയിച്ചു. 20 യുയുസിമാരില്‍ 15 ഉംനേടി. പാലക്കാട് തെരഞ്ഞെടുപ്പ് നടന്ന 38ല്‍ 30ലും വിജയിച്ചു. 43 യുയുസിമാരും എസ്എഫ്‌ഐ പ്രതിനിധികള്‍. പത്തോളം കോളേജുകളില്‍ എതിരുണ്ടായില്ല. മലപ്പുറം ജില്ലയില്‍ 25 കോളേജുകളില്‍ മികച്ച വിജയം നേടി. 40 യുയുസിമാരും എസ്എഫ്‌ഐക്കാണ്. കോഴിക്കോട് തെരഞ്ഞെടുപ്പ് നടന്ന 50ല്‍ 36 ഉം എസ്എഫ്‌ഐക്കാണ്.