ഓണനാളുകളില്‍ ശബരിമല ശ്രീ ധര്‍മ്മ ശാസ്താ ക്ഷേത്രത്തില്‍ പ്രത്യേക പൂജകള്‍ നടക്കും. ഇതിനായി ഈ മാസം ഒമ്പതിന് വൈകുന്നേരം അഞ്ചിന് നട തുറക്കും. ക്ഷേത്ര തന്ത്രി കണ്ഠരര് മഹേഷ് മോഹനരുടെ മുഖ്യകാര്‍മ്മികത്വത്തില്‍ ക്ഷേത്ര മേല്‍ശാന്തി വി.എന്‍.വാസുദേവന്‍ നമ്പൂതിരി ക്ഷേത്ര ശ്രീകോവില്‍ നട തുറന്ന് ദീപം തെളിക്കും. തുടര്‍ന്ന് ഉപദേവതാ ക്ഷേത്രങ്ങളിലെയും ശ്രീകോവില്‍ നടകള്‍ തുറന്ന് വിളക്കുകള്‍ തെളിക്കും.ശേഷം ക്ഷേത്ര തന്ത്രി കണ്ഠരര് മഹേഷ് മോഹനര് ഭക്തര്‍ക്ക് വിഭൂതി പ്രസാദം വിതരണം ചെയ്യും.പതിനെട്ടാം പടിക്ക് മുന്നിലെ ആഴിയില്‍ അഗ്‌നിപകര്‍ന്നതിനു ശേഷമെ, ഇരുമുടി കെട്ടേന്തി ശരണം വിളികളുമായി കാത്തുനില്‍ക്കുന്ന അയ്യപ്പഭക്തരെ പതിനെട്ടാം പടി കയറി ദര്‍ശനം നടത്താന്‍ അനുവദിക്കുകയുള്ളൂ.നട തുറക്കുന്ന ദിവസം പൂജകള്‍ ഒന്നും തന്നെയുണ്ടാവില്ല.

ഉത്രാടദിനമായ 10ന് പുലര്‍ച്ചെ അഞ്ചിന് മേല്‍ശാന്തി ക്ഷേത്രനട തുറക്കും.തുടര്‍ന്ന് നിര്‍മ്മാല്യവും നെയ്യഭിഷേകവും നടക്കും.5.15 ന് മഹാഗണപതി ഹോമം,രാവിലെ 7.30 ന് ഉഷപൂജ എന്നിവ ഉണ്ടാകും. തിരുവോണ ദിനത്തിലും പതിവ് പൂജകള്‍ നടക്കും. തിരുവോണത്തിന് ദര്‍ശനത്തിനെത്തുന്ന അയ്യപ്പഭക്തര്‍ക്ക് തിരുവിതാംകൂര്‍ ദേവസ്വം ബോര്‍ഡിന്റെ ആഭിമുഖ്യത്തില്‍ ഓണസദ്യ നല്‍കും. 13ന് രാത്രി 10 ന് ഹരിവരാസനം പാടി ക്ഷേത്ര ശ്രീകോവില്‍ നട അടയ്ക്കും. കന്നിമാസ പൂജകള്‍ക്കായി 16ന് ക്ഷേത്രനട വീണ്ടും തുറക്കും. ക്ഷേത്രനട തുറന്നിരിക്കുന്ന അഞ്ച് ദിവസങ്ങളില്‍ പതിവ് പൂജകള്‍ക്ക് പുറമെ നെയ്യഭിഷേകം,കളഭാഭിഷേകം,പടിപൂജ,പുഷ്പാഭിഷേകം എന്നിവയുണ്ടാകും