അധിക സുരക്ഷ ഉറപ്പ് വരുത്തിയിട്ടും കാമറ കണ്ണുകളിൽപെടാതെ ശ്രീ പത്മനാഭ സ്വാമി ക്ഷേത്രത്തിന് സമീപം അജ്ഞാത ഡ്രോണ്‍ പറന്നതായി പോലീസ് വ്യക്തമാക്കി. ക്ഷേത്രത്തിന്റെ വടക്കേ നടയ്ക്ക് സമീപവും തെക്കേ നടയ്ക്ക് സമീപവുമാണ് ഡ്രോണ്‍ പറന്നത് എന്നാണ് പോലീസ് പറയുന്നത്. ഇന്നലെ രാത്രി പത്തരയോടെയാണ് ഡ്രോണ്‍ പൊലീസിന്റെ ശ്രദ്ധയില്‍പ്പെട്ടത്.

സ്ഥലത്ത് പരിശോധന നടത്തിയ പൊലീസ് അന്വേഷണം ആരംഭിച്ചു കഴിഞ്ഞു . ദൃശ്യങ്ങള്‍ പൊലീസിന്റെ സിസിടിവി കാമറയില്‍ പതിഞ്ഞിട്ടില്ല എന്നതിനാൽ തന്നെ ആശങ്ക വർധിപ്പിക്കുന്നു. ഇതേതുടർന്ന് തിരുവനന്തപുരം വിമാന താവളത്തിൽ റഡാർ വഴി അന്വേഷിക്കാൻ പോലീസ് വിവരം നൽകിയിട്ടുണ്ട്.

അതേസമയം മാസങ്ങള്‍ക്ക് മുമ്ബ് സെക്രട്ടറിയേറ്റുള്‍പ്പടെ നഗരത്തിലെ തന്ത്രപ്രധാന ഭാഗങ്ങളില്‍ ഡ്രോണ്‍ പറന്നത് ആശങ്ക പരത്തിയിരുന്നു. ഇതേതുടര്‍ന്ന് നിരവധി ഡ്രോണുകള്‍ പൊലീസ് കസ്റ്റഡിയില്‍ എടുത്ത് പരിശോധന നടത്തിയെങ്കിലും അജ്ഞാത ഡ്രോണിനെയോ ഉടമയെയോ ഇതുവരെ കണ്ടെത്താനായിട്ടില്ല.