വര്ക്കല സര്ക്കാര് ബോയ്സ് ഹൈസ്കൂളില് യൂത്ത് ഫെസ്റ്റിവലിനിടെ, ദീപാവലി ആഘോഷങ്ങളുടെ ഭാഗമായി സ്കൂള് വളപ്പിനു പുറത്ത് വിദ്യാര്ത്ഥികള് പടക്കം പൊട്ടിച്ചെന്ന് കാണിച്ച് പോലീസില് പരാതി നല്കി പ്രിന്സിപ്പാള്; സ്കൂളില് എത്തിയ പോലീസിന്റെ ആക്രമണത്തില് വിദ്യാര്ത്ഥികള്ക്ക് പരിക്കേറ്റു: അഞ്ച് വിദ്യാര്ത്ഥികള് കസ്റ്റഡിയില്
വര്ക്കല സര്ക്കാര് ബോയ്സ് ഹൈസ്കൂളില് യൂത്ത് ഫെസ്റ്റിവലിനിടെ ഒരു സംഘം വിദ്യാര്ത്ഥികള് പടക്കം പൊട്ടിച്ചതിന് സ്കൂളില് അതിക്രമിച്ച് കയറി വിദ്യാര്ത്ഥികളെ തല്ലിചതച്ച് പോലീസ്. ദീപാവലി ആഘോഷങ്ങളുടെ ഭാഗമായി സ്കൂള് വളപ്പിനു പുറത്ത് വിദ്യാര്ത്ഥികള് പടക്കം പൊട്ടിച്ചിരുന്നു. അധ്യാപകര് പറഞ്ഞിട്ടും പടക്കം പൊട്ടിക്കുന്നത് നിര്ത്തിയില്ല എന്ന് കാട്ടി സ്കൂള് പ്രിന്സിപ്പല് പൊലീസിന് പരാതി നല്കിയിരുന്നു. ഇത് ലഭിച്ചതിനു ശേഷമാണ് വര്ക്കല എസ്.ഐ ബിനുവിന്റെ നേതൃത്വത്തില് പൊലീസ് സ്കൂളിലേക്ക് എത്തിയത്. പൊലീസിന്റെ ആക്രമണത്തില് പ്ലസ് ടു വിദ്യാര്ത്ഥിയായ സുധീഷിന് പരിക്കേറ്റിട്ടുണ്ട്. വിദ്യാര്ത്ഥി ഇപ്പോള് വര്ക്കല ശിവഗിരി ആശുപത്രിയില് ചികിത്സയിലാണ്.
കബഡി ടീമിലെ അംഗമായിരുന്ന സുധീഷ് അടുത്ത ദിവസം കബഡി ജില്ലാ മത്സരത്തില് പങ്കെടുക്കാന് പോകാനിരിക്കെയാണ് പൊലീസില് നിന്നും ആക്രമണം നേരിട്ടത്. സംഭവത്തെ തുടര്ന്ന് അഞ്ച് വിദ്യാര്ത്ഥികളെ പൊലീസ് കസ്റ്റഡിയില് എടുത്തിട്ടുമുണ്ട്. പൊലീസില് നിന്നും കുട്ടികള്ക്ക് മര്ദ്ദനം നേരിട്ടതിനെ തുടര്ന്ന് നാട്ടുകാരും കുട്ടികളുടെ മാതാപിതാക്കളും പ്രതിഷേധത്തിലാണ്. പോലീസ് സ്കൂള് വളപ്പുകളില് കയറി വിദ്യാര്ഥികളെ ഉപദ്രവിക്കാനോ മോശമായി പെരുമാറാനോ പാടില്ലെന്നുള്ള കര്ശന നിര്ദേശങ്ങള് നിലവിലിരിക്കെയാണ് പോലീസിന്റെ ഈ നടപടി. അതേ സമയം ഇക്കാര്യം പൊലീസ് നിഷേധിച്ചു. വിദ്യാര്ത്ഥികള് തങ്ങളെ ആക്രമിക്കാന് ശ്രമിച്ചുവെന്നും ഇതിനെ തുടര്ന്ന് തങ്ങള് വിദ്യാര്ത്ഥികള്ക്കെതിരെ ലാത്തി വീശുകയാണ് ചെയ്തതെന്നുമാണ് പൊലീസ് നല്കുന്ന വിശദീകരണം.
https://www.facebook.com/Malayalivartha
