അഫ്​ഗാനെ 100 കടത്തിയില്ല... അഫ്ഗാനിസ്ഥാനെതിരായ മൂന്നാം ടി20യില്‍ വമ്പൻ ജയം സ്വന്തമാക്കി ഇന്ത്യ. മൂന്നാം പോരാട്ടത്തില്‍ ഇന്ത്യ 127 റണ്‍സിന്റെ ജയമാണ് നേടിയത്. ആദ്യം ബാറ്റ് ചെയ്ത ഇന്ത്യ നിശ്ചിത ഓവറില്‍ 7 വിക്കറ്റ് നഷ്ടത്തില്‍ 221 റണ്‍സ് എടുത്തു. ജയം തേടിയിറങ്ങിയ അഫ്ഗാനിസ്ഥാനെ 100 പോലും കടത്തിയില്ല. അവരുടെ പോരാട്ടം വെറും 14.1 ഓവറില്‍ വെറും 94 റണ്‍സില്‍ അവസാനിപ്പിക്കേണ്ടി വന്നു.

അഫ്ഗാനിസ്ഥാന്‍ മികച്ച രീതിയില്‍ കളി തുടങ്ങിയെങ്കിലും പൊടുന്നനെ തകര്‍ന്നു തരിപ്പണമായി. ഓപ്പണര്‍മാര്‍ 31 റണ്‍സ് ബോര്‍ഡില്‍ ചേര്‍ത്തപ്പോള്‍ പിരിഞ്ഞു. പിന്നീട് ഒരറ്റത്ത് വിക്കറ്റുകള്‍ തുരുതുരെ വീഴുകയായിരുന്നു. അക്ഷര്‍ പട്ടേല്‍ ഒരോവറില്‍ രണ്ട് വിക്കറ്റ് വീഴ്ത്തി. തൊട്ടടുത്ത തന്റെ ഓവറില്‍ താരത്തിന് രണ്ട് നിരാശകളുമുണ്ടായി. താരത്തിന്റെ പന്തില്‍ നൂര്‍ ഉള്‍ റഹ്മാന് രണ്ട് തവണ ജീവന്‍ തിരിച്ചു കിട്ടി. അക്ഷറിന്റെ പന്തില്‍ താരം നല്‍കിയ ക്യാച്ച് തിലക് വര്‍മ കൈവിട്ടുപോയി. പിന്നാലെ ഇതേ ഓവറിന്റെ മൂന്നാം പന്തില്‍ നൂറിനെ സ്റ്റംപിങ് ചെയ്തു പുറത്താക്കാനുള്ള അവസരം സഞ്ജുവും വിട്ടുകളഞ്ഞു. ഈ രണ്ട് നിരാശപ്പെടുത്തുന്ന ഫീല്‍ഡിങ് തെറ്റുകൾ മാറ്റി നിര്‍ത്തിയാല്‍ ബാറ്റിങിലും ബൗളിങിലും ഇന്ത്യ വളരെ മികവാണ് പുലർത്തിയത്.

മൂന്ന് വീതം വിക്കറ്റുകള്‍ വീഴ്ത്തിയ രവി ബിഷ്‌ണോയ്, നിതീഷ് കുമാര്‍ റെഡ്ഡി, 2 വിക്കറ്റെടുത്ത അക്ഷര്‍ പട്ടേല്‍, ഓരോ വിക്കറ്റെടുത്ത ജസ്പ്രിത് ബുംറ, യഷ് ഠാക്കൂര്‍ എന്നിവര്‍ ചേര്‍ന്നാണ് അഫ്ഗാനെ തകർത്തത്. ഇന്ത്യക്കായി പന്തെറിഞ്ഞ അഞ്ച് പേരും വിക്കറ്റുകള്‍ സ്വന്തമാക്കുകയായിരുന്നു. നിതീഷ് ഒറ്റ ഓവറില്‍ മൂന്ന് വിക്കറ്റുകളാണ് കൊയ്തത്. അക്ഷര്‍ ഒരോവറില്‍ 2 വിക്കറ്റും വീഴ്ത്തി. താരം 3 ഓവറില്‍ 9 റണ്‍സ് മാത്രമാണ് വഴങ്ങിയത്. ടൂർണമെന്റിലുടനീളം മികച്ച പ്രകടനം നടത്തിയ അഭിഷേക് ശർമയാണ് പ്ലെയർ ഓഫ്ദിമാച്ചും സീരിസും.
എന്നാൽ അഫ്ഗാന്‍ നിരയില്‍ 25 റണ്‍സെടുത്ത ക്യാപ്റ്റന്‍ ഇബ്രാഹിം സാദ്രാനാണ് 20 കടന്ന ഏക ബാറ്റര്‍.

അതേസമയം ഇന്ത്യൻ ക്രിക്കറ്റിൻ്റെ സൂപ്പർ താരവും മലയാളിയുടെ അഭിമാന താരവുമായി സഞ്ജു സാംസണിന് പുതിയ നേട്ടം കരസ്ഥമാക്കാനായി . ടി 20 ക്രിക്കറ്റിൽ 9000 റൺസ് പൂർത്തീകരിച്ചിരിക്കുകയാണ് സഞ്ജു സാംസൺ. 334 ഇന്നിങ്സുകളിൽ നിന്നാണ് സഞ്ജുവിൻ്റെ ഈ നേട്ടം. 9000 റൺസ് എന്ന നേട്ടം കൈവരിക്കുന്ന അഞ്ചാമത്തെ ഇന്ത്യൻ താരം കൂടിയാണ് സഞ്ജു സാംസൺ. ഇന്ത്യ അഫ്​ഗാൻ ടി 20 പരമ്പരയിലെ മൂന്നാമത്തേയും അവസാനത്തേയും മത്സരത്തിലാണ് സഞ്ജു സാസൺ 9000 റൺസ് എന്ന നേട്ടം കൈവരിക്കാനായത്.