മണ്ഡലകാലത്ത് ഭക്തരെ പൊലീസ് നിയന്ത്രണത്തിലുള്ള ബുക്കിംഗിലൂടെ മലചവിട്ടാന്‍ തീരുമാനിച്ചതിന് പിന്നില്‍ ആക്ടിവിസ്റ്റുകളെയും യുവതികളെയും സന്നിധാനത്ത് എത്തിക്കാനുള്ള ശ്രമമാണെന്ന് ഭക്തജനങ്ങള്‍ക്ക് ആശങ്ക. ഇക്കാര്യം ശബരിമല കര്‍മസമിതി അടക്കം പരിശോധിച്ചുവരുകയാണ്. ബുക്കിംഗ് വഴി ആക്ടീവിസ്റ്റുകളടക്കമുള്ള യുവതികള്‍ ദര്‍ശനത്തിനെത്തിയാല്‍ അവരെ എളുപ്പത്തില്‍ സന്നിധാനത്ത് എത്തിക്കാന്‍ പൊലീസിനാകും. യുവതീപ്രവേശന വിധി സംബന്ധിച്ച നിയമപോരാട്ടം ഇപ്പോഴും സുപ്രീംകോടതിയില്‍ തുടരുകയാണ്. അതിനാല്‍ യുവതികള്‍ സന്നിധാനത്തെത്തി ദര്‍ശനം നടത്തിയതിന്റെ തെളിവ് ഓണ്‍ലൈന്‍ ക്യൂ ബുക്കിംഗിലൂടെ ശേഖരിച്ച് കോടതിക്ക് മുന്നിലെത്തിക്കാന്‍ സര്‍ക്കാരിന് കഴിയും.

കഴിഞ്ഞ മണ്ഡലകാലത്ത് ഇരുട്ടിന്റെ മറവില്‍ രണ്ട് ആക്ടിവിസ്റ്റുകളെ കയറ്റിയ സര്‍ക്കാര്‍, നേര്‍വഴിക്ക് ആചാരലംഘനം നടത്താനുള്ള നീക്കങ്ങളിലെല്ലാം പരാജയപ്പെട്ടിരുന്നു. അതിനാല്‍ ഇത്തവണ വ്യക്തമായി ആസൂത്രണം നടത്തി ആചാരലംഘനത്തിന് സുഗമമായ വഴിയൊരുക്കുന്നതിനുള്ള മാര്‍ഗങ്ങള്‍ ഒരുക്കുന്നതിന്റെ ഭാഗമായാണ് പൊലീസിന് എല്ലാനിയന്ത്രണവും നല്‍കുന്നതെന്ന് ഭക്കതര്‍ക്ക് ആശങ്കയുണ്ട്. പുതിയ ബുക്കിംഗ് സംവിധാനം അയ്യപ്പഭക്തരുടെ മലകയറ്റം പോലീസ് നിയന്ത്രണത്തിലാക്കുക എന്ന ലക്ഷ്യത്തോടെയാണെന്ന ശബരിമല കര്‍മസമിതിയുടെ അടക്കം ആശങ്ക പരിഹരിക്കപ്പെടേണ്ടതുണ്ട്.

ഓരോ വര്‍ഷവും ഭക്തജനപ്രവാഹം വര്‍ദ്ധിക്കുന്നതിനെ തുടര്‍ന്ന് തിരക്ക് നിയന്ത്രിക്കുന്നതിനായി 2011-12 ലാണ് പൊലീസ് വെര്‍ച്വല്‍ ക്യൂ സംവിധാനം ഏര്‍പ്പെടുത്തിയത്. ആദ്യമെത്തുന്നവര്‍ക്ക് ആദ്യ ദര്‍ശനത്തിനായി ഓണ്‍ലൈന്‍ വഴി സമയം ബുക്ക് ചെയ്തുകൊണ്ടുള്ള ക്യൂ സംവിധാനമാണിത്. വെര്‍ച്വല്‍ ക്യൂവിലൂടെ ഭക്തരെ മരക്കൂട്ടത്തു നിന്ന് ചന്ദ്രാനന്ദന്‍ റോഡ് വഴി നടപ്പന്തിലിലെത്തിച്ച് അവിടെ നിന്നാണ് പതിനെട്ടാംപടി സന്നിധാനത്ത് എത്തിച്ചിരുന്നത്. ഈ മണ്ഡലകാലത്ത് വെര്‍ച്വല്‍ ക്യൂ കൂടാതെ സാധാരണ ക്യൂ അഥവാ സ്വാമി ക്യൂ ബുക്കിംഗ് കൂടി ഏര്‍പ്പെടുത്തിയിരിക്കുകയാണ്. മരക്കൂട്ടത്ത് നിന്ന് ശരംകുത്തി വഴി നടപ്പന്തലിലെത്തുന്ന പരമ്പരാഗത പാതയിലൂടെയാണ് പുതിയ ക്യൂ. പമ്പയില്‍ നിന്ന് സന്നിധാനത്തേക്കുള്ള ഇരുവഴികളും പൊലീസ് ബുക്കിംഗിലൂടെ നിയന്ത്രിക്കുമ്പോള്‍, ബുക്കിംഗ് ഇല്ലാതെ എത്തുന്ന സാധാരണ ഭക്തര്‍ക്ക് ദര്‍ശനം അന്യമാകുമോ എന്ന ആശങ്കയുണ്ട്.

എല്ലാവഴികളും പൊലീസ് നിയന്ത്രണത്തിലും അധികാരത്തിലും ആയാല്‍ തീര്‍ത്ഥാടകരുടെ എണ്ണത്തിലും നിയന്ത്രണം ഏര്‍പ്പെടുത്തേണ്ടിവരും. ഭക്തരുടെ സൗകര്യത്തിനായി നടതുറക്കുന്ന ദിവസങ്ങളുടെ എണ്ണം കൂട്ടേണ്ടിവരും. അങ്ങനെ വര്‍ഷം മുഴുവന്‍ നട തുറക്കണമെന്ന ആവശ്യമുയര്‍ന്നേക്കും. അതിലൂടെ ശബരിമലയെ സാധാരാണ ക്ഷേത്രമാക്കുകയും സുപ്രീംകോടതിയുടെ യുവതീപ്രവേശനത്തിന് കൂടുതല്‍ സാധ്യതകള്‍ ഒരുക്കുകയുമാണ് സര്‍ക്കാരിന്റെ ലക്ഷ്യമെന്നും സംശയിക്കുന്നു. കഴിഞ്ഞ മണ്ഡലകാലം സന്നിധാനത്തും ശബരിമലയിലും പൊലീസ് രാജ് നടപ്പാക്കിയത് പോലെ ഇക്കുറിയും അതിനുള്ള മുന്നൊരുക്കങ്ങള്‍ ആരംഭിച്ചതിനാല്‍ ഭക്തജനങ്ങള്‍ ശക്തമായ പ്രതിരോധം തീര്‍ക്കുകയും പ്രതിഷേധം നടത്തുകയും ചെയ്യുമെന്ന കാര്യത്തില്‍ സംശയമില്ല.