വിവാദവ്യവസായിയും അഞ്ചു ലക്ഷം രൂപയുടെ പാമ്പും തോലുകൊണ്ടുണ്ടാക്കിയ ഷൂസു കൊണ്ട് നിര്‍ദ്ദനനായ ഒരാളെ ചവിട്ടികൊല്ലുകയും ചെയ്ത നിഷാമിനെ സഹായിക്കാന്‍ സംസ്ഥാന ഭരണ നേതൃത്വത്തിലെ വിശ്വസ്തനായ എംഎല്‍ എ രംഗത്ത്. സംസ്ഥാനത്തെ എ ഗ്രൂപ്പ് നേതാക്കളുടെ ട്രഷറിയാണ് ഈ എംഎല്‍എ. എ ഗ്രൂപ്പ് നേതാക്കള്‍ക്ക് വേണ്ടി സംസ്ഥാനത്തിന് അകത്തും പുറത്തും നിന്നും പണം സംഘടിപ്പിക്കുകയാണ് എംഎല്‍എയുടെ പ്രധാന ഹോബി. ആഭ്യന്തര മന്ത്രി രമേശ് ചെന്നിത്തല എംഎല്‍എയുടെ എതിര്‍പക്ഷത്തായതിനാല്‍ ഒരുപക്ഷേ നിഷാമിന് കൊലക്കയര്‍ പ്രതീക്ഷിക്കാം. അതോ രമേശ് ചെന്നിത്തലയും അദ്ദേഹത്തെ സഹായിക്കാനെത്തുമോ എന്ന് കണ്ടറിയണം.
എറണാകുളം ജില്ലയിലെ എംഎല്‍എ തന്റെ ഗ്രൂപ്പ് നേതാവായ തൃശൂര്‍ ജില്ലയിലെ എംഎല്‍എയെ ജയിലിലേക്കയച്ച് നിഷാമിന്റെ സുഖസൗകര്യം ഉറപ്പു വരുത്തിയിരുന്നു. കോണ്‍ഗ്രസ് നേതാക്കള്‍ക്ക് പണം മാത്രമല്ല, മറ്റ് പലതും മുഹമ്മദ് നിഷാം നല്‍കാറുണ്ടെന്ന് അണിയറയില്‍ വര്‍ത്തമാനമുണ്ട്. നിയമസഭ കൂടുമ്പോള്‍ കോണ്‍ഗ്രസ് നേതാക്കളുടെ കള്ളക്കളികള്‍ തുറന്നു പറയാമെന്നാണ് പ്രതിപക്ഷ എംഎല്‍എയായ ബാബു എം പാലിശേരിയുടെ ഉറപ്പ്. പ്രതിപക്ഷവും സമ്മര്‍ദ്ദങ്ങളില്‍ അകപ്പെടാന്‍ സാധ്യതയുള്ളതിനാല്‍ അവരുടെ ഗീര്‍വാണങ്ങള്‍ തത്കാലം വിശ്വസിക്കാന്‍ കഴിയില്ല.
മരിച്ച സെക്യൂരിറ്റി ഉദ്യോഗസ്ഥന്‍ ചന്ദ്രബോസിന്റെ മൊഴി പോലീസ് രേഖപ്പെടുത്താതിരുന്നതിനു പിന്നിലും തൃക്കാക്കരയപ്പനുമായി ബന്ധപ്പെട്ട എംഎല്‍എയാണെന്ന് അറിയുന്നു, തിരുവഞ്ചൂര്‍ രാധാകൃഷ്ണനും ഉമ്മന്‍ചാണ്ടിയും പോലീസ് വകുപ്പ് ഭരിച്ചിരുന്ന കാലത്ത് എംഎല്‍എയാണ് പോലീസ് ഭരണം നിയന്ത്രിച്ചിരുന്നത്. ആഭ്യന്തരമന്ത്രി മാറിയെങ്കിലും ഭരണതലത്തില്‍ നിര്‍ണായസ്വാധീനമുള്ള എംഎല്‍എ പോലീസില്‍ വേണ്ടത്ര ഇടപെടല്‍ നടത്തിയിരുന്നു എന്നാണ് അറിയുന്നത്. എറണാകുളം-തൃശൂര്‍ ജില്ലകളിലെ പോലീസ് എംഎല്‍എ പറഞ്ഞാല്‍ അനങ്ങില്ലെന്നാണ് കേള്‍ക്കുന്നത്.ചന്ദ്രബോസിന്റെ മൊഴിയെടുക്കാത്ത പശ്ചാത്തലത്തില്‍ നിര്‍ണായകമായ തെളിവുകള്‍ ലഭിക്കാതിരുന്നാല്‍ നിഷാം നിയമത്തിന്റെ കുരുക്കില്‍ നിന്നും രക്ഷപ്പെടാന്‍ സാധ്യതയുണ്ട്.
യഥാര്‍ത്ഥത്തില്‍ നിഷാമിന്റെ കാര്യത്തില്‍ മാധ്യമങ്ങള്‍ ശക്തമായ നിലപാട് സ്വീകരിച്ചില്ലായിരുന്നെങ്കില്‍ നിഷാം എന്നേ രക്ഷപ്പെടുമായിരുന്നു. ഫലത്തില്‍ പ്രതിപക്ഷത്തിന്റെ റോളാണ് മാധ്യമങ്ങള്‍ ഏറ്റെടുത്തത്.
യുഡിഎഫിന്റെ മുഖ്യ വരുമാന സ്രോതസ്സാണ് നിഷാം എന്നും അറിയുന്നു. 5000 കോടിയിലേറെയാണ് നിഷാമിന്റെ കണക്കാക്കപ്പെട്ട സ്വത്ത്. അതിലൊരു അംശം എറിഞ്ഞു വേണമെങ്കിലും രക്ഷപ്പെടാന്‍ നിഷാം ശ്രമിച്ചേക്കാം. കോണ്‍ഗ്രസിലെ എ ഗ്രൂപ്പുകാര്‍ക്കാണ് നിഷാമിനെ രക്ഷപ്പെടുത്തണമെന്ന് വാശിയുള്ളത്. അവര്‍ അക്കാര്യത്തില്‍ വിജയിക്കുമോ ഇല്ലെയോ എന്ന് കണ്ടറിയണം. ഏതായാലും പണത്തിനു മീതെ പരുന്തും പറക്കില്ല എന്ന കവിവചനം ഇപ്പോഴും പ്രസക്തമാണെന്ന് ഓര്‍ത്താല്‍ മതി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha