വി.എസ്. അച്യുതാനന്ദന്‍ പാര്‍ട്ടി വിരുദ്ധനാണെന്ന് പിണറായി വിജയന്, പുച്ഛിച്ചു തള്ളുന്നുവെന്ന് വിഎസ്
വി.എസ്. അച്യുതാനന്ദന്‍ പാര്‍ട്ടി വിരുദ്ധനാണെന്ന് സംസ്ഥാന സെക്രട്ടറി പിണറായി വിജയന്. പിണറായിയുടെ വാക്കുകളെ പുച്ഛിച്ചു തള്ളുന്നുവെന്ന് പറഞ്ഞ് വിഎസും രംഗത്ത് വന്നു. ഈ അമ്പരപ്പിക്കുന്ന സ്ഥിതിവിശേഷത്തിനിടെ, സി.പി.എം സംസ്ഥാന സമ്മേളനത്തിന് ഇന്ന് തുടക്കമാവും. വി.എസിനെ കടുത്ത വാക്കുകളില്‍ ആക്രമിച്ചു കൊണ്ടുള്ള പിണറായിയുടെ വാര്‍ത്താസമ്മേളനവും, രണ്ടും കല്പിച്ചുള്ള വി.എസിന്റെ തിരിച്ചടിയും സമ്മേളനത്തെ കൈവിട്ടു പോവുന്ന അവസ്ഥയിലാണ് എത്തിച്ചിരിക്കുന്നത്.
സിപിഎം സംസ്ഥാന സെക്രട്ടേറിയറ്റ് തീരുമാനത്തിനെതിരെയും പാര്‍ട്ടി സെക്രട്ടറി പിണറായി വിജയനെതിരെയും പൊട്ടിത്തെറിച്ചാണ് വി.എസ്. അച്യുതാനന്ദന്‍ രംഗത്തെത്തിയത്. പിണറായി വിജയനെ അയാള്‍ എന്നു വിളിച്ച വിഎസ്, സെക്രട്ടേറിയറ്റിന്റെ നിലപാടുകളെ അര്‍ഹിക്കുന്ന അവജ്ഞയോടെ തള്ളിക്കളയുന്നുവെന്ന് പറഞ്ഞു. താന്‍ കത്തു നല്‍കിയത് പൊളിറ്റ് ബ്യൂറോയ്ക്കാണ്, മറുപടി പറയേണ്ടതും അവരാണ് -വി.എസ്. പറഞ്ഞു.
അപ്രതീക്ഷിതമായിട്ടാണ് സംസ്ഥാന സമ്മേളനത്തിന്റെ ഗതിയെ മാറ്റിമറിച്ചു കൊണ്ട് തലേന്ന് പിണറായിയും വി.എസും ഏറ്റുമുട്ടിയത്. സംസ്ഥാന നേതൃത്വത്തെ പ്രതിക്കൂട്ടില്‍ കയറ്റി വി.എസ്, അഖിലേന്ത്യാ ജനറല്‍ സെക്രട്ടറിക്ക് നല്‍കിയ കുറിപ്പ് ഒരു പത്രത്തില്‍ അതേ പടി പ്രത്യക്ഷപ്പെട്ടത് വി.എസിനെതിരായ മൂര്‍ച്ചയേറിയ ആയുധമാക്കാന്‍ സംസ്ഥാന നേതൃത്വം തീരുമാനിക്കുകയായിരുന്നു. പതിനേഴ് വര്‍ഷക്കാലം പാര്‍ട്ടിയെ നയിച്ച പിണറായി വിജയന് സെക്രട്ടറി സ്ഥാനം ഒഴിയുന്നതോടൊപ്പം, പാര്‍ട്ടിയുടെ ഏറ്റവും ജനസമ്മതനായ നേതാവ് വി.എസ്. അച്യുതാനന്ദന്‍ പാര്‍ട്ടി സംസ്ഥാന കമ്മിറ്റിയില്‍ നിന്ന് പുറത്താവുമോ എന്ന ചോദ്യമാണ് ഇപ്പോള്‍ ഉയരുന്നത്.
ഇതുവരെ ഒരു സമ്മേളനത്തിലും ഇത്തരം ഒരു അവസ്ഥ ഉണ്ടായിട്ടില്ല. കൂട്ടത്തോടെയുള്ള വെട്ടിനിരത്തല്‍ നടന്ന പാലക്കാട് സമ്മേളനത്തിലോ, വിഭാഗീയത നിറഞ്ഞാടിയ മലപ്പുറം സമ്മേളനത്തിലോ ഇത്തരമൊരു പ്രക്ഷുബ്ധാവസ്ഥ ഒരിക്കലും ഉണ്ടായിട്ടില്ല.
ഇരുപത്തിയേഴ് വര്‍ഷങ്ങള്‍ക്ക് ശേഷമാണ് പുന്നപ്ര വയലാറിന്റെ മണ്ണില്‍ പാര്‍ട്ടി സംസ്ഥാന സമ്മേളനമെത്തുന്നത്. 1988 ലായിരുന്നു ഒടുവില്‍ ആലപ്പുഴയില്‍ സമ്മേളനം നടന്നത്. അന്ന് വി.എസ്. അച്യുതാനന്ദനായിരുന്നു സംസ്ഥാന സെക്രട്ടറി. വിട്ടുവീഴ്ചയില്ലാത്ത കര്‍ക്കശക്കാരനായ ഉരുക്കു മനുഷ്യനായി അന്ന് പാര്‍ട്ടിയെ നയിച്ചിരുന്ന അച്യുതാനന്ദന്‍ സമ്മേളനം വീണ്ടും ആലപ്പുഴയിലെത്തുമ്പോള്‍ വിചാരണയും വിധി തീര്‍പ്പും നേരിടുന്ന റിബല്‍ പരിവേഷത്തിലാണ്. 1964ല്‍ കമ്മ്യൂണിസ്റ്റ് പാര്‍ട്ടി പിളര്‍ന്ന് സി.പി.എം രൂപം കൊണ്ട ശേഷമുള്ള ആദ്യ സംസ്ഥാന സമ്മേളനം ആലപ്പുഴയിലായിരുന്നു. അതിന്റെ അന്‍പതാം വാര്‍ഷികത്തിലാണ് സമ്മേളനം വീണ്ടും ഇതേ മണ്ണിലെത്തിയത്.
പതിനേഴ് വര്‍ഷം ഉരുക്കുമുഷ്ടിയോടെ പാര്‍ട്ടിയെ നയിച്ച പിണറായി വിജയന് സെക്രട്ടറി സ്ഥാനം ഒഴിയുമ്പോള്‍ പാര്‍ട്ടിയുടെ ചരിത്രത്തിലെ സംഭവബഹുലമായ ഒരു യുഗത്തിന് തിരശീല വീഴുകയാണ്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
