തലസ്ഥാനത്തെ ഷോപ്പിംഗ് മാളിലെ സ്ത്രീകളുടെ വസ്ത്രശാലയില്‍ ജീവനക്കാരനെ തൂങ്ങിമരിച്ച നിലയില്‍ കണ്ടെത്തിയ സംഭവത്തിൽ ആത്മഹത്യക്ക് കാരണം പ്രണയനൈരാശ്യമാകാമെന്ന സംശയത്തിൽ അന്വേഷണ സംഘം. പേട്ട ശ്രീലകത്തില്‍ പി. വിക്രമരാജിന്റെയും രജനിയുടെയും മകന്‍ വിഷ്ണുവാണ് (22) കഴിഞ്ഞ ​​ദിവസം രാത്രി 9.15 ഓടെ നഗരത്തിലെ ഒരു മാളില്‍ ജീവനൊടുക്കിയത്. ഒരു പെണ്‍കുട്ടിയുമായി വിഷ്ണു പ്രണയത്തിലായിരുന്നുവെന്നും ഇവര്‍ തമ്മിലുണ്ടായ പിണക്കമാണ് കടയിലെ ട്രയല്‍ റൂമിനുള്ളില്‍ ജീവനൊടുക്കാന്‍ വിഷ്ണുവിനെ പ്രേരിപ്പിച്ചതെന്നുമാണ് പൊലീസിന് ലഭിച്ചിരിക്കുന്ന പ്രാഥമിക സൂചന. സംഭവ സമയം വിഷ്ണുവും ഒപ്പം ജോലിചെയ്യുന്ന പെണ്‍കുട്ടിയും മാത്രമാണുണ്ടായിരുന്നത്.

കടയില്‍ വിഷ്‌ണുവും പെണ്‍കുട്ടിയും മാത്രമാണ് ജീവനക്കാരായുള്ളത്. കടയുടമ എറണാകുളം സ്വദേശിയാണ്. ഇന്നലെ കടയില്‍ തിരക്കില്ലാത്ത സമയത്ത് വിഷ്ണു ട്രയല്‍ റൂമിലേക്ക് കയറി വാതിലടച്ചു. ഏറെ നേരം കഴിഞ്ഞിട്ടും പുറത്തിറങ്ങാത്തതിനാല്‍ വാതിലില്‍ മുട്ടിവിളിച്ചു. വാതിൽ തുറക്കാത്തതിനാൽ ബലം പ്രയോഗിച്ച് തുറന്നപ്പോൾ ഷാളിൽ തൂങ്ങി നിൽക്കുന്ന യുവാവിനെയാണ് കണ്ടത്. പെൺകുട്ടിയുടെ നിലവിളി കേട്ട് ഓടിക്കൂടിയ ജനങ്ങൾ പോലീസിൽ അറിയിച്ചു. മാളിലെ CCTV കാമറകളും മറ്റും ഇന്ന് പരിശോധിക്കുമെന്ന് പോലീസ് അറിയിച്ചു. വഞ്ചിയൂര്‍ പൊലീസ് മേല്‍നടപടികള്‍ കൈക്കൊണ്ടശേഷം അന്വേഷണം ഊര്‍ജിതമാക്കിയതായി പൊലീസ് പറഞ്ഞു.

മാളില്‍ പ്രവര്‍ത്തിക്കുന്ന വിസ്മയ എന്ന വസ്ത്ര വ്യാപാര സ്ഥാപനത്തിലെ ജീവനക്കാരനായിരുന്നു വിഷ്ണു. വിഷ്ണു തൂങ്ങിനിൽക്കുന്ന കാഴ്ച കണ്ട സഹജീവനക്കാരി ബോധരഹിതായി വീണതോടെ പെൺകുട്ടിയെയും ആശുപത്രിയിൽ പ്രവേശിപ്പിച്ചിരുന്നു. ട്രയല്‍ റൂമിലേയ്ക്ക് കയറി വാതിലടച്ച വിഷ്ണു ഏറെ നേരം കഴിഞ്ഞിട്ടും പുറത്തിറങ്ങാത്തതിനാല്‍ വാതിലിൽ മുട്ടിവിളിച്ചുവെന്നും, തുറക്കാതെ വന്നതോടെ ബലം പ്രയോഗിച്ച്‌ വാതില്‍ തുറന്നപ്പോള്‍ ഷാളില്‍ കെട്ടിത്തൂങ്ങിയ നിലയില്‍ കാണുകയായിരുന്നുവെന്നാണ് പെണ്‍കുട്ടി പോലീസിന് നൽകിയ മൊഴി. പെണ്‍കുട്ടിയുടെ നിലവിളി കേട്ടാണ് ആള്‍ക്കാര്‍ ഓടിക്കൂടിയത്. വസ്ത്ര സ്ഥാപനം തുടങ്ങിയിട്ട് ഒരുമാസം മാത്രമേ തികഞ്ഞിരുന്നുള്ളു.