ഷെയിൻ നിഗത്തിന്റെ കാര്യത്തിൽ തീരുമാനം നീളും; അമ്മയുടെ ഭാരവാഹികളിൽ ഒരു വലിയ വിഭാഗത്തിന് 'കോൺഫിഡൻസ്' ഇല്ല; ഷെയിൻ ഉറപ്പു നൽകിയാലും അനുസരിക്കാൻ സാധ്യതയില്ലെന്ന് അമ്മയിലെ ഒരു വിഭാഗം ഭാരവാഹികൾ
ഷെയിൻ നിഗത്തിന്റെ കാര്യത്തിൽ തീരുമാനം നീളുമെന്ന് സൂചന. അമ്മയുടെ ഭാരവാഹികളിൽ ഒരു വലിയ വിഭാഗത്തിന് ഷെയിനിന്റെ കാര്യത്തിൽ 'കോൺഫിഡൻസ്' ഇല്ലാത്തതാണ് കാരണം.
ഷെയിൻ ഉറപ്പു നൽകിയാലും അനുസരിക്കാൻ സാധ്യതയില്ലെന്നാണ് അമ്മയിലെ ഒരു വിഭാഗം ഭാരവാഹികൾ പറയുന്നത്. മുമ്പും ഇത്തരത്തിൽ ഷെയിൻ വാക്കുമാറ്റിയിട്ടുണ്ട്. അന്ന് ഉറപ്പ്നൽകിയ ഭാരവാഹികൾ മോശക്കാരായി മാറി. വിശ്വസനീയമായ ഉറപ്പ് ലഭിച്ചാൽ മാത്രമേ പ്രശ്നപരിഹാരം സാധിക്കുകയുള്ളു എന്ന നിലപാട് സ്വീകരിച്ചാൽ മതിയെന്നാണ് അമ്മയുടെ നേതൃത്വം പറയുന്നത്. നിർമ്മാതാക്കളുടെ സംഘടനയെ പിണക്കാൻ മോഹൻലാൽ ഉൾപ്പെടെയുള്ള താരങ്ങൾ തയ്യാറല്ല. ആദ്യം ഷെയിനുമായി സംസാരിച്ച് ഉറപ്പുവാങ്ങുക.അതിന് ശേഷം മാത്രം ചർച്ച മതിയെന്നാണ് അമ്മയുടെ തീരുമാനം.
ഇക്കാര്യം മോഹൻലാലുമായി അമ്മയുടെ ഭാരവാഹികൾ സംസാരിച്ചു. ഷെയിന്റെ കാര്യത്തിൽ കൂടുതൽ ചർച്ച വേണമെന്നാണ് അമ്മ ജനറൽ സെക്രട്ടറി ഇടവേള ബാബു പറഞ്ഞത്. ഷെയിന്റെ അമ്മ മോഹൻലാൽ ഉൾപ്പെടെയുള്ള നടൻമാരുമായി നടത്തിയ സംഭാഷണങ്ങൾക്ക് ശേഷമാണ് മോഹൻലാൽ ഇടപെട്ടത്. എന്നാൽ അമ്മ ചർച്ചക്ക് വിളിച്ചപ്പോൾ ഉത്തരേന്ത്യൻ കറക്കത്തിലായിരുന്ന ഷെയിൻ എത്തിയില്ല. അതോടെയാണ് അമ്മയുടെ ഭാരവാഹികൾ തെറ്റിയത്. തങ്ങൾ വിളിച്ചിട്ട് വരാത്തയാൾ എങ്ങനെയാണ് പൂർത്തിയാക്കാനുള്ള ചിത്രങ്ങൾ പൂർത്തിയാക്കുന്നത് എന്നാണ് അമ്മയുടെ ഭാരവാഹികൾ ചോദിച്ചത്. അതിലാണ് ചർച്ചകൾ വഴിമുട്ടിയത്.
എന്നാൽ അമ്മയുമായി നടത്തുന്ന ചർച്ചകളിൽ പ്രതീക്ഷയുണ്ടെന്നാണ് ഷെയിൻ പ്രതികരിച്ചത്. വിലക്ക് നീക്കുന്നത് സംബന്ധിച്ച് നടൻ സിദ്ധിഖിന്റെ ആലുവയിലെ വീട്ടിൽ നടത്തിയ ചർച്ചയിലാണ് ഷെയിൻ ഇത്തരത്തിൽ പറഞ്ഞത്. വിവാദങ്ങളെ തുടർന്ന് മുടങ്ങിയ വെയിൽ അടക്കമുള്ള മൂന്നു സിനിമകളും പൂർത്തിയാക്കുമെന്ന് ഷെയിൻ വ്യക്തമാക്കി.
ചിത്രങ്ങൾ പൂർത്തിയാക്കില്ലെന്ന് താൻ എവിടെയും പറഞ്ഞിട്ടില്ലെന്ന് ഷെയിൻ പറഞ്ഞു. ഉല്ലാസം എന്ന ചിത്രത്തിന്റെ നിർമ്മാതാക്കൾ സമർപ്പിച്ചത് വ്യാജകരാർ ആണ്. ഇക്കാര്യം ഇടവേള ബാബുവും സമ്മതിച്ചു. തർക്കത്തിലുള്ള സിനിമകൾ പൂർത്തിയാക്കിയ ശേഷം മാത്രമേ മറ്റ് കരാറുകൾ ഏറ്റെടുക്കാൻ പാടുള്ളുവെന്ന് ഇടവേള ബാബു ഷെയിനെ അറിയിച്ചിട്ടുണ്ട്.
ഷെയിന്റെ വാക്ക് വിശ്വസിക്കാൻ കഴിയുമോ എന്ന തർക്കത്തിലാണ് അമ്മയുടെ ഭാരവാഹികൾ. ഇതിലാണ് അവർക്ക് ആദ്യമായി തീർപ്പ് കിട്ടേണ്ടത്. അത്തരമാരു തീർപ്പ് കിട്ടിയാൽ മാത്രമേ ഷെയിൻ നിഗത്തെ അമ്മ സഹായിക്കുകയുള്ളു. അമ്മയുമായി ഉണ്ടാക്കുന്ന കരാർ ഷെയിൻ നിഷേധിച്ചാൽ സിനിമയിൽ നിന്നു തന്നെ ഷെയിന് പുറത്തുപോകേണ്ടിവരും. അന്നേരം അമ്മ ഇടപെടണമെന്നില്ല.
മോഹൻലാൽ ഷെയിന്റെ കാര്യത്തിൽ വ്യക്തമായ ഒരഭിപ്രായം ഇതുവരെയും പറഞ്ഞിട്ടില്ല. മോഹൻലാലിനെ ഷെയ്ൻ കണ്ടിട്ടില്ല. ഒരു നടനും ഇതിനുള്ള ധൈര്യം കാണിക്കില്ല.
https://www.facebook.com/Malayalivartha