കേരളത്തില്‍ സ്ത്രീ പീഡനക്കേസുകളുടെ എണ്ണത്തില്‍ വന്‍ വര്‍ദ്ധനവാണ് ഉണ്ടായിരിക്കുന്നതെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. മുന്‍ വര്‍ഷങ്ങളെ അപേക്ഷിച്ച് ഇക്കൊല്ലം നിരവധി കേസുകളാണ് രജിസ്റ്റര്‍ ചെയ്യപ്പെട്ടതെന്ന് കണക്കുകള്‍ സൂചിപ്പിക്കുന്നു. കഴിഞ്ഞ എട്ടു മാസങ്ങളില്‍ സംഭവിച്ചത് 2019 ജനുവരി മുതല്‍ ഓഗസ്റ്റ് വരെയുള്ള കണക്കുകളാണ് ഇപ്പോള്‍ ലഭ്യമായിരിക്കുന്നത്. ഈ എട്ടു മാസത്തിനിടെ 1537 സ്ത്രീപീഡന കേസുകളാണ് സംസ്ഥാനത്ത് രജിസ്റ്റര്‍ ചെയ്യപ്പെട്ടത്. 2017 വരെയുള്ള കണക്കുകള്‍ അനുസരിച്ച് സംസ്ഥാനത്ത് അതുവരെ രജിസ്റ്റര്‍ ചെയ്യപ്പെട്ട കേസുകളുടെ എണ്ണം ഒരുലക്ഷത്തി ഇരുപത്തിയെട്ടായിരമാണ്. രജിസ്റ്റര്‍ ചെയ്യപ്പെടുന്ന കേസുകളില്‍ അഞ്ച് ശതമാനം എണ്ണത്തില്‍ മാത്രമാണ് വിചാരണയും മറ്റ് കോടതി നടപടികളും യഥാസമയം ആരംഭിക്കുന്നതും പൂര്‍ത്തിയാക്കുന്നതും. കൂടാതെ ലൈംഗിക പീഡനക്കേസുകളില്‍ വൈദ്യ പരിശോധന നടത്താന്‍ ലാബ് ഉള്‍പ്പെടെയുള്ള സംവിധാനങ്ങളുടെ അഭാവവും സംസ്ഥാനത്ത് രൂക്ഷമാണ്. നാലായിരത്തിലധികം കേസുകളാണ് ഫോറന്‍സിക് ഫലം ലഭിക്കാത്തതു കാരണം വഴി മുട്ടിയത്. കുട്ടികള്‍ക്കെതിരായ ബലാത്സംഗ കേസുകളും അഞ്ചിരട്ടിയായി വര്‍ദ്ധിച്ചുവെന്ന് കണക്കുകള്‍ സാക്ഷ്യപ്പെടുത്തുന്നു. 2009ല്‍ കുട്ടികള്‍ക്കെതിരായ പീഡനകേസുകള്‍ 554 എണ്ണമായിരുന്നു. എന്നാല്‍, പിന്നീടുള്ള വര്‍ഷങ്ങളില്‍ എണ്ണം വര്‍ദ്ധിച്ചു. 2010ല്‍ 617 ഉം, 2011ല്‍ 1132 ഉം, 2012ല്‍ 1019 ഉം , 2013ല്‍ 1221 ഉം , 2014ല്‍ 1347 ഉം , 2015ല്‍ 1256 ഉം , 2016ല്‍ 1656 ഉം , 2017ല്‍ 2003 ഉം, 2018ല്‍ 2105 ഉം കേസുകളാണ് സംസ്ഥാനത്ത് രജിസ്റ്റര്‍ ചെയ്യപ്പെട്ടത്.

കേസുകളില്‍ വിചാരണ വൈകുന്നതും നിയമ നടപടികള്‍ എടുക്കാന്‍ വൈകുന്നതും കുറ്റകൃത്യങ്ങള്‍ വര്‍ധിക്കുന്നതിന് ഒരു കാരണമാണ്. കേസുകളില്‍ വേഗത്തില്‍ നിയമ നടപടികള്‍ എടുക്കുന്നതിന് ഫാസ്റ്റ്ട്രാക്ക് കോടതികള്‍ വേണമെന്ന് ആവശ്യം വര്‍ഷങ്ങളായി നിലനില്‍ക്കുകയാണ്. കേരളത്തില്‍ പ്രതിദിനം അഞ്ച് ബലാത്സംഗ കേസുകള്‍ റിപ്പോര്‍ട്ട് ചെയ്യുന്നുണ്ടെന്ന് കണക്കുകള്‍ വ്യക്തമാക്കുന്നു. ദേശീയതലത്തില്‍ ഒരു ദിവസം 90 ബലാത്സംഗങ്ങള്‍ എന്നാണ് ഔദ്യോഗിക കണക്ക്.