മമ്മൂട്ടിയുടെ ബ്രഹ്മാണ്ഡചിത്രം എന്ന് വിശേഷിപ്പിക്കുന്ന മാമാങ്കം എന്ന ചിത്രം തുടക്കത്തിലേ വിവാദത്തിൽ. ചിത്രത്തിന്റെ ആദ്യ തിരക്കഥാകൃത്ത് സജീവ് പിള്ളയാണ് സിനിമക്കെതിരെ രംഗത്തെത്തിയത്.

മാമാങ്കം എന്ന പേരിൽ സജീവ് പിള്ളയുടെ നോവൽ പുറത്തിറങ്ങി. സിനിമയായി സാഷാത്കരിക്കുവാൻ താൻ തയാറാക്കിയ തിരക്കഥയുടെ മൂലകൃതിയാണ് ഇത്. ഞാൻ ജീവിതം കൊടുത്ത എന്റെ സിനിമയിൽ നിന്ന് എന്നെ ചതിയിലൂടെയും വഞ്ചനയിലൂടെയും പുറത്താക്കുമ്പോൾ, യഥാർത്ഥ സൃഷ്ടിയെ അറിയാൻ ആ നോവൽ മാത്രമാണ് പോംവഴി.

" മാമാങ്കം സിനിമയുമായി ബന്ധപ്പെട്ട് ഇതുവരേയും വിചാരണ നടന്നിട്ടില്ലെന്ന് സജീവ് പിള്ള പറയുന്നു. തെളിവുകൾ പരിഗണിച്ച് തുടങ്ങിയിട്ടില്ല. സിനിമക്ക് താല്കാലിക നിരോധനം കിട്ടിയില്ല എന്നത് മാത്രം ശരിയാണ്. 50 കോടിക്ക് മേൽ മുടക്കി എന്ന് അവകാശപ്പെടുന്ന പ്രൊജക്ടിനാണ് മറ്റെന്തിനോക്കാളും ഇപ്പോൾ പ്രാധന്യം എന്നുള്ള നിഗമനത്തിന്റെ അടിസ്ഥാനത്തിലാണ്, മറ്റ് കാര്യങ്ങൾ വിചാരണയിൽ പരിഗണിക്കാം എന്ന് കോടതി പറഞ്ഞിട്ടുള്ളത്. എന്തായാലും അപ്പീൽ പോയിട്ടുണ്ട്. വിചാരണ വേണ്ടതാണെന്ന് കോടതി കൃത്യമായും വ്യക്തമാക്കിയിട്ടും ഉണ്ട്. താല്കാലിക നിരോധനമാണ് കോടതി അനുവദിക്കാതിരുന്നത്. പൂർണ്ണമായ വിചാരണക്കും തെളിവുകളുടെ പരിഗണനക്കും ശേഷം അവസാനം നീതി ലഭിക്കും എന്ന് തന്നെയാണ് എന്റെ വിശ്വാസം.

ഈ കരാറിന്റെ തന്നെ സാധുത ചോദ്യം ചെയ്തും സ്ക്രിപ്ടിന്റെ ഉടമസ്ഥാവകാശത്തെയും അതിൽ നിന്ന് ഒരിക്കലും വിട്ട് പോകാത്ത സൃഷ്ടികർത്താവിന്റെ പേര് നീക്കിയതിനേക്കുറിച്ചും സ്ക്രിപ്ടാകെ വികലമാക്കിയതിനെക്കുറിച്ചും ഉള്ള വിഷയങ്ങൾ കോടതിയുടെ പരിഗണനയിലാണ്.

രണ്ടര മണിക്കൂർ ഷൂട്ടിംഗ് സ്ക്രിപ്ട് ആയിരുന്നില്ല താൻ തയ്യാറാക്കിയതെന്ന് അദ്ദേഹം പറഞ്ഞു. "രണ്ട് പാർട്ടായി ചെയ്യാനിരുന്ന വലിയ ഒരു സിനിമയുടെ സ്ക്രിപ്ടായിരുന്നു. അതിൽ സാധാരണ കാണാറില്ലാത്തത്രയും വിശദാംശങ്ങളും ഉണ്ടായിരുന്നു. കലാസംവിധാനത്തിനും മറ്റ് ഘടകങ്ങൾക്കും, അഭിനയം ഉൾപ്പടെ, സഹായകമാകുമെന്നുള്ള കണക്ക് കൂട്ടലിലാണ് അത്രയും വിശദവിവരങ്ങൾ ഉൾപ്പെടുത്തിയതും. അതാത് മേഖലകളിൽ പ്രവർത്തിച്ച ടെക്നീഷ്യൻമാരോട് ചോദിച്ചാൽ അവർ അതേക്കുറിച്ച് പറയുകയും ചെയ്യും. അതിനെയൊക്കെ വാ തോരാതെ പുകഴ്ത്തിയവരാണ് ഇപ്പോൾ ഇങ്ങനെ പറയുന്നത് എന്നതിൽ പ്രത്യേകിച്ച് അത്ഭുതവുമില്ല. ഈ നോവൽ എന്നു നിങ്ങൾ പറയുന്ന സ്ക്രിപ്ടിനെ പുകഴ്ത്തിയ അനേകരിൽ രണ്ടുപേരാണ് മമ്മൂട്ടിയും റസൂൽ പൂക്കുട്ടിയും.

ഒറ്റ പാർട്ട് മതി എന്ന തീരുമാനത്തിന് ശേഷം ഞാൻ തന്നെ രണ്ടേമുക്കാൽ മണിക്കൂർ ആക്കി കുറച്ച സ്ക്രിപ്ടും കൈയിലുണ്ടാവില്ലേ? ഓരോ ഷെഡ്യൂളിനും ഷൂട്ടിംഗ് സ്ക്രിപ്ടും സ്റ്റോറീ ബോഡും തയറാക്കിയതും കൈയിൽ കാണില്ലേ?

പ്രൊഡ്യൂസർ കഥ കേൾക്കുക മാത്രമല്ല, സ്ക്രിപ്ട് വായിച്ചിട്ടുമാണ് ഇതിലേക്ക് വരുന്നത്. പ്രൊഡ്യൂസർ എന്നോട് മാത്രമല്ല, പലരോടും പറഞ്ഞിട്ടുള്ളത് ഇരുപത്തിയഞ്ചിലേറേ തവണ വായിച്ചെന്നും,. ഓരോ വരിയും കാണാതാറിയാമെന്നും ഒക്കെയാണ്.

മൊത്തം ലാഭത്തിന്റെ മൂന്ന് ശതമാനം കൂടെ തരാമെന്ന് പറഞ്ഞണ് കരാർ വച്ചത്. അതുകൊണ്ടാണ്, ഞാൻ അത് സമ്മതിച്ചത്. ഞാൻ സംവിധാനം ചെയ്യുന്നത് കൊണ്ടും പ്രൊഫിറ്റ് ഷെയർ ഉള്ളത് കൊണ്ടും മാത്രമായിരുന്നു അതിന് ഞാൻ നിന്നത്. പക്ഷേ തന്ത്രപരമായി അതിൽ പെർഫോമൻസ് ബോണസ് എന്ന് ഞാനറിയാതെ ഒളിപ്പിച്ചു. പണത്തിന്റെ കണക്കുകൾ പറഞ്ഞ്, ഈ വലിയ ചതിയെ പുകമൂടി ന്യായീകരിക്കാൻ ശ്രമിക്കുകയാണ് ഇപ്പോൾ.

മംഗലാപുരത്ത് ആദ്യഷെഡ്യൂൾ തുടങ്ങുമ്പോൾ, കൃത്യമായ പ്ലാനിങ്ങോടുകൂടി കാര്യങ്ങൾ പോവുകയായിരുന്നു. ഇന്ത്യയിലെ ഏറ്റവും മികച്ച നിരയിൽ പെടുന്ന സാങ്കേതിക വിദഗ്ദരായിരുന്നു ഒപ്പം. സ്റ്റോറീബോഡും ആക്ഷന് ലൈവ് പ്രിവിസും.

എന്നാൽ പ്രൊഡ്യൂസറിനൊപ്പമുള്ള ടീമിന്റെ ഇടപെടലും പ്രായോഗികമായ അറിവില്ലാത്തത് മൂലം അവർ അടിച്ചേല്പിച്ച വ്യവസ്ഥകൾ കാരണവും ഇടതവില്ലാതെ ഷൂട്ട് ചെയ്യേണ്ടി വന്നു. അത് മാത്രമായിരുന്നു ബജറ്റ് കൂടുവാനുള്ള കാരണം.

ഇപ്പോൾ പെരുപ്പിച്ച് കാണിക്കുന്ന, ഈ അഞ്ച് കോടിയിൽ മമ്മൂക്കയുള്ളവരുടെയും ടെക്നീഷ്യരുടേയും ശമ്പളവും അഡ്വാൻസുകളും ഉണ്ട്. കൃത്യമായ കണക്കുകൾ പരിശോധിക്കേണ്ടതും ആണ്.

സെറ്റിനെ കുറിച്ചും സിനിമയുടെ വലിപ്പത്തെകുറിച്ചും ക്ലൈമാക്സിനെ കുറിച്ചും ഉള്ള പുതിയ നിബന്ധനകൾ ഞാൻ അംഗീകരിക്കാതിരുന്നത് പ്രശ്നങ്ങൾ രൂക്ഷമാക്കി.

പടം നടക്കാൻ വേണ്ടി വിട്ടൂവീഴ്ചകൾ ചെയ്യണം എന്ന് എല്ലായിടത്ത് നിന്നും സമ്മർദ്ദം വന്നപ്പോഴാണ്, എക്സിക്യൂഷന് ഒരാളെ കൂടി വയ്ക്കാം എന്ന നിർദ്ദേശം ഞാൻ സമ്മതിക്കുന്നത്. അപ്പോഴും എല്ലാ ക്രിയേറ്റീവ് ഡിസിഷനും എന്റേത് തന്നെയായിരിക്കും എന്നാണ് ഉറപ്പ്. കാര്യങ്ങൾ എല്ലാം പരിഹരിച്ചു എന്ന് അസോസിയേഷനുകൾ പറഞ്ഞു പിരിഞ്ഞതാണ്. എന്നാൽ അന്നു വൈകുന്നേരം ഞാൻ അറിയുന്നത്, പ്രായോഗികമായി ഞാൻ എന്റെ പ്രൊജക്ടിൽ നിന്ന് പുറത്തായി എന്നാണ്. അവിടെ നിങ്ങൾ വിജയിച്ചു.

നിങ്ങൾ രേഖാമുലം ധ്രുവന് സമ്മതം കൊടുത്തിട്ടാണ് അയാൾ വേറൊരു പടത്തിലേക്ക് പോയത്. ധ്രുവൻ ചെയ്ത് തെറ്റ് താൻ ഒപ്പിട്ട കരാറിന്റെ പകർപ്പ് ചോദിച്ചതാണ്. പകർപ്പ് കൊടുക്കാൻ തയാറാകാതിരുന്നപ്പോൾ, കരാറിന്റെ ഇമേജ് ഫോണിലെടുക്കാൻ ശ്രമിച്ചു. അത് കൈയാങ്കളിയിലേക്ക് എത്തുമെന്നായി.

അങ്ങനെ ഒരോരുത്തരെയായി മാറ്റി. എനിക്കൊഴികെ ആർക്കും ഒപ്പിട്ട കരാറിന്റെ കോപ്പി പോലും കിട്ടിയിരുന്നില്ല. ആർക്കും കരാറിന്റെ പകർപ്പ് കൊടുക്കാത്തത് വളരെ വിചിത്രമായി തന്നെ നിൽക്കുന്നു. രണ്ടാമത് പടം തുടങ്ങുമ്പോൾ പലരുടേയും കാലാവധി കഴിഞ്ഞിട്ടുമുണ്ടായിരുന്നില്ല.

ഞാൻ ആദ്യമായി ഷൂട്ട് ചെയ്ത് തുടങ്ങിയ പേഴ്സണൽ സിനിമയാണ് പെൺകൊടി. പെൺകൊടി ഷൂട്ട് ചെയ്ത്തത് യശ്ശശരീരനായ ശ്രീ എം.ജെ.രാധാകൃഷ്ണനാണ്.

ആയുസ്സിന്റെ കാൽഭാഗം എടുത്തിട്ടും പൂർത്തിയാകാത്ത ഒരു ഷൂട്ടിങ് സ്ക്രിപ്ടിനെ നിങ്ങൾ പരിഹസിക്കുന്നു. ആ വാക്കുകൾക്ക് പിന്നിലെ ധാർഷ്ട്യത്തിൽ അടങ്ങിയിരിക്കുന്ന സംസ്കാരമില്ലായ്മയെക്കുറിച്ച് ഞാൻ ഒന്നും പറയുന്നില്ല. ജീവിതം ക്രിയേറ്റീവ് ആയ ശ്രമങ്ങൾക്ക് വേണ്ടി കൊടുക്കുന്നത് ഒരു തമാശയായി ഞാൻ കാണുന്നുമില്ല. മുഴുവൻ ശമ്പളം കൈപ്പറ്റി പടത്തിന് വേണ്ടി ഒരു വർഷത്തെ ജീവിതം കളയുന്നു എന്ന് പറയുന്ന നിങ്ങളെ പോലുള്ളവർക്ക് ഇതൊന്നും മനസ്സിലാവില്ല". സജീവ് പറഞ്ഞു.