പച്ചക്കറിയുടെയും അവശ്യസാധനങ്ങളുടെയും വിലക്കയറ്റം: ദോശയും ഓംലെറ്റും നല്‍കി ഹോട്ടലുകാരുടെ വ്യത്യസ്ത സമരം!
സാമ്പാറില്ലാത്ത ദോശയും, സാവള ഇല്ലാത്ത ഓംലെറ്റും വിതരണം ചെയ്ത് വിലക്കയറ്റത്തിനെതിരെ ഹോട്ടലുകാരുടെ വ്യത്യസ്ത സമരം. 12-ാം തീയതി ഉച്ചകഴിഞ്ഞ് 3.30-നാണ് കോട്ടയം ഹെഡ് പോസ്റ്റ് ഓഫിസിനു മുന്നില്‍ ധര്‍ണ നടത്താനുദ്ദേശിക്കുന്നത്.
വിലക്കയറ്റം മൂലം ഹോട്ടല്‍ മേഖലയ്ക്കു പിടിച്ചുനില്‍ക്കാനാവാത്ത സാഹചര്യം വന്നതിനാലാണ് വ്യത്യസ്ത പ്രതിഷേധസമരം നടത്താനൊരുങ്ങുന്നതെന്ന് സമരത്തിന് നേതൃത്വം നല്കുന്ന ഹോട്ടല്‍ ആന്‍ഡ് റസ്റ്ററന്റ് അസോസിയേഷന്‍ പറഞ്ഞു.
വിലക്കയറ്റത്തിനും അനധികൃത കച്ചവടസ്ഥാപനങ്ങള്‍ക്കുമെതിരായാണ് പ്രതിഷേധം. പച്ചക്കറിയുടെയും അവശ്യസാധനങ്ങളുടെയും വില വര്‍ധനവിനെതിരായ പ്രതിഷേധത്തിന്റെ ഭാഗമായി ദോശയ്‌ക്കൊപ്പം സാമ്പര്‍ ഉണ്ടാകില്ല. ഓംലെറ്റില്‍ സവാളയും ഒഴിവാക്കും.
ഹോട്ടല്‍ ആന്‍ഡ് റസ്റ്ററന്റ് മേഖലയെ തകര്‍ക്കുന്ന വിലക്കയറ്റം പിടിച്ചു നിര്‍ത്താന്‍ സര്‍ക്കാരിന്റെ ഇടപെടല്‍ ഉണ്ടാകണമെന്നാവശ്യപ്പെട്ടാണ് ധര്‍ണ.
ഹോട്ടല്‍ ആന്‍ഡ് റസ്റ്ററന്റ് അസോസിയേഷന്‍ ജില്ലാ കമ്മിറ്റി നടത്തുന്ന ധര്‍ണ ജില്ലാ പഞ്ചായത്ത് പ്രസിഡന്റ് സെബാസ്റ്റ്യന്‍ കുളത്തിങ്കല്‍ ഉദ്ഘാടനം ചെയ്യും. ഹോട്ടല്‍ അസോസിയേഷന്‍ സംസ്ഥാന വര്‍ക്കിംഗ് പ്രസിഡന്റ് പ്രസാദ് ആനന്ദഭവന്‍, ജില്ലാ പ്രസിഡന്റ് കെ.കെ. ഫിലിപ്പുകുട്ടി, ജില്ലാ സെക്രട്ടറി എന്‍. പ്രതീഷ്, സംസ്ഥാന സെക്രട്ടറി മുഹമ്മദ് ഷെറീഫ്, ജില്ലാ ട്രഷറര്‍ പി.എസ്. ശശിധരന്‍, ജില്ലാ വര്‍ക്കിംഗ് പ്രസിഡന്റ് ആര്‍.സി. നായര്‍, ജില്ലാ വൈസ്പ്രസിഡന്റ് സി.ടി. സുകുമാരന്‍നായര്‍, അന്‍സാരി പത്തനാട് എന്നിവര്‍ നേതൃത്വം നല്‍കും.
https://www.facebook.com/Malayalivartha
