ഈ വര്‍ഷം നടക്കാനിരിക്കുന്ന തദ്ദേശസ്വയംഭരണ തെരഞ്ഞെടുപ്പ് അട്ടിമറിക്കാന്‍ സി.പി.എമ്മിന്റെയും സര്‍ക്കാരിന്റെയും നേതൃത്വത്തില്‍ വന്‍ അട്ടിമറി നടക്കുന്നതായി റിപ്പോര്‍ട്ട്. ഇതിനായി 2015ലെ തദ്ദേശ തെരഞ്ഞെടുപ്പിലെ വോട്ടര്‍ പട്ടിക അടിസ്ഥാനമാക്കി കരട് പട്ടിക ജനുവരി 20നകം പ്രസിദ്ധീകരിക്കാന്‍ സംസ്ഥാന തെരഞ്ഞെടുപ്പ് കമ്മീഷന്‍ ഉത്തരവിട്ടു. ഇതോടെ ഒന്നോ അതിലധികമോ പ്രാവശ്യം തെരഞ്ഞെടുപ്പുകളില്‍ വോട്ടു ചെയ്ത ലക്ഷങ്ങള്‍ക്ക് വോട്ട് ചെയ്യാനാകാത്ത സ്ഥിതിയാകും. 2016ലെ അസംബ്ലി തെരഞ്ഞെടുപ്പിലും 2019ലെ പാര്‍ലമെന്റ് തെരഞ്ഞെടുപ്പിലും വോട്ടു ചെയ്ത നവാഗതരുള്‍പ്പെടെ വലിയൊരു വിഭാഗമായിരിക്കും പട്ടികയ്ക്ക് പുറത്താകുക. ഇതിനെതിരെ യു.ഡി.എഫ് തെരഞ്ഞെടുപ്പ് കമ്മീഷനെ സമീപിക്കാന്‍ ഒരുങ്ങുകയാണ്.

2016ല്‍ അഞ്ചു ലക്ഷത്തോളം പേരാണ് വോട്ടര്‍ പട്ടികയില്‍ വര്‍ധിച്ചത്. 2019ലെ പട്ടികയില്‍ 17 ലക്ഷത്തോളം പേര്‍ അധികമായി വര്‍ദ്ധിച്ചു. മരിച്ചവരെയും താമസം മാറിപ്പോയവരെയും മറ്റും ഒഴിവാക്കിയാണ് ഈ വര്‍ധന. ഇപ്പോള്‍ വോട്ടര്‍പട്ടികയില്‍ പേരുള്ള ലക്ഷങ്ങള്‍ക്ക് തദ്ദേശ തെരഞ്ഞെടുപ്പില്‍ വോട്ടു ചെയ്യാന്‍ രണ്ടാമതും അപേക്ഷ നല്‍കി, രേഖകളുമായി ഹിയറിംഗിന് ഹാജരായി കാത്തിരിക്കേണ്ടിവരും. 2020 ജനുവരി ഒന്നിന് 18 വയസ്സ് പൂര്‍ത്തിയായവര്‍ക്ക് അവസരമുള്ളതിനാല്‍ തിരക്ക് കൂടാനുള്ള എല്ലാ സാധ്യതയുണ്ട്. തൊട്ടു മുമ്പു നടന്ന പൊതു തെരഞ്ഞെടുപ്പിന്റെ വോട്ടര്‍ പട്ടിക അംഗീകരിച്ച് കരട് പ്രസിദ്ധീകരിച്ച് പുതുതായി 18 വയസ്സ് പൂര്‍ത്തീയാവുന്നവരെ ഉള്‍പ്പെടുത്തിയാല്‍ തീരാവുന്ന പ്രശ്‌നമാണ് തെരഞ്ഞെടുപ്പ് കമ്മീഷന്റെ പുതിയനിലപാടോടെ സങ്കീര്‍ണമാകുന്നത്.

കഴിഞ്ഞ നാല് വര്‍ഷമായി തദ്ദേശ സ്ഥാപനങ്ങളിലേക്ക് നടന്ന ഉപതെരഞ്ഞെടുപ്പുകളില്‍ കരടായി ഉപയോഗിച്ചത് 2015ലെ തദ്ദേശ തെരഞ്ഞെടുപ്പിലെ വോട്ടര്‍പട്ടികയാണെന്ന വിചിത്രവാദമാണ് തെരഞ്ഞെടുപ്പ് കമ്മീഷന്റെ ഉത്തരവില്‍ പറയുന്നത്. അഞ്ച് നിയമസഭാ ഉപതെരഞ്ഞെടുപ്പുകളിലും 2019 ജനുവരിയിലെ വോട്ടര്‍പട്ടികയാണ് ഉപയോഗിച്ചത്. ഉപതിരഞ്ഞെടുപ്പുകള്‍ പ്രഖ്യാപിച്ച ദിവസം വരെ വോട്ടര്‍പട്ടികയില്‍ പേര് ചേര്‍ക്കാനും അവസരം ലഭിച്ചിരുന്നു. അങ്ങനെയാണ് കോന്നിയില്‍ 3251ഉം മഞ്ചേശ്വരത്ത് 2693ഉം എറണാകുളത്ത് 2905ഉം അരൂരില്‍ 1962ഉം വട്ടിയൂര്‍കാവില്‍ 1969ഉം പുതിയ വോട്ടര്‍മാര്‍ക്ക് സമ്മതിദാന അവകാശം വിനിയോഗിക്കാനായത്.

ശനിയാഴ്ച തെരഞ്ഞെടുപ്പ് കമ്മീഷന്‍ പുറത്തിറക്കിയ ഉത്തരവില്‍ പറയുന്നത്, 2014ലെ ലോക്‌സഭ തെരഞ്ഞെടുപ്പിലെ വോട്ടര്‍പട്ടിക ഹൗസ് വേരിഫിക്കേഷനില്‍ കുറ്റമറ്റതാക്കി 2015ല്‍ പ്രസിദ്ധീകരിച്ച വോട്ടര്‍ പട്ടിക കരടായി ഇത്തവണത്തെ തദ്ദേശതെരഞ്ഞെടുപ്പില്‍ ഉപയോഗിക്കുന്നെന്നാണ്. 2016ലെ നിയമസഭാ തെരഞ്ഞെടുപ്പിലെ വോര്‍പട്ടികയിലുള്ളതിനേക്കാള്‍ 1616441 പേരാണ് 2019ലെ ലോക്‌സഭാ തെരഞ്ഞെടുപ്പ് വോട്ടര്‍പട്ടികയിലുള്ളത്. അവരെല്ലാം പുതുതായി അപേക്ഷിക്കേണ്ടിവരും. ഇത് ദുരിതം ഇരട്ടിയാകും. ഈമാസം 16നും 17നുമായി രാഷ്ട്രീയ പാര്‍ട്ടി പ്രതിനിധികളെ വിളിച്ചുകൂട്ടി തെരഞ്ഞെടുപ്പ് ഒരുക്കങ്ങളും വോട്ടര്‍ പട്ടിക പുതുക്കലുമായി ബന്ധപ്പെട്ട് ചര്‍ച്ച ചെയ്യും. അന്ന് പ്രശ്‌നം വിവാദമാകാനാണ് സാധ്യത.