നിര്ഭയ കേസ് പ്രതികള്ക്ക് മാപ്പ് നല്കണം; നിര്ഭയയുടെ അമ്മ സോണിയ ഗാന്ധിയുടെ മാതൃക പിന്തുടരണമെന്ന് മുതിര്ന്ന അഭിഭാഷക ഇന്ദിര ജെയ്സിങ്
ഡല്ഹിയില് കൂട്ടബലാല്സംഗത്തിനിരയായി കൊല്ലപ്പെട്ട നിര്ഭയ കേസ് പ്രതികള്ക്ക് മാപ്പ് നല്കണമെന്ന് നിര്ഭയയുടെ മാതാവ് ആശാദേവിയോട് മുതിര്ന്ന അഭിഭാഷക ഇന്ദിരാ ജെയ്സിങ്. ട്വിറ്ററിലൂടെയായിരുന്നു അവരുടെ ആവശ്യം. പ്രതികളുടെ വധശിക്ഷ നീട്ടിവെച്ച കോടതി ഉത്തരവില് ആശാദേവി നിരാശ പ്രകടിപ്പിച്ച വാര്ത്ത റീ ട്വീറ്റ് ചെയ്ത്ക്കൊണ്ടായിരുന്നു ഇന്ദിരാ ജെയ്സിങിന്റെ പോസ്റ്റ്.
നിര്ഭയയുടെ അമ്മ സോണിയ ഗാന്ധിയുടെ മാതൃക പിന്തുടരണമെന്ന് മുതിര്ന്ന അഭിഭാഷക ഇന്ദിര ജെയ്സിങ് പറഞ്ഞു. ആശാദേവിയുടെ വേദന മനസിലാക്കുന്നു. അവരോട് സോണിയ ഗാന്ധിയെ മാതൃകയാക്കാനാണ് ആവശ്യപ്പെടുന്നത്. നിര്ഭയ കേസ് പ്രതികളുടെ വധശിക്ഷ വൈകുന്നതില് പ്രതിഷേധവുമായി നിര്ഭയയുടെ അമ്മ ആശാദേവി രംഗത്തെത്തിയ സാഹചര്യത്തിലാണ് മുതിര്ന്ന അഭിഭാഷക ഇന്ദിര ജെയ്സിങ്ങിന്െറ പരാമര്ശം.
രാജീവ് ഗാന്ധി വധക്കേസ് പ്രതിയായ നളിനിയോട് സോണിയ ക്ഷമിച്ചു. അവരെ തൂക്കികൊല്ലണമെന്ന ആഗ്രഹം സോണിയക്കില്ലായിരുന്നു. ഞങ്ങള് നിങ്ങളോടൊപ്പമുണ്ട് പക്ഷേ വധശിക്ഷക്ക് എതിരാണെന്ന് ഇന്ദിര ജെയ്സിങ് ട്വീറ്റ് ചെയ്തു.
അതേസമയം, ഇന്ദിര ജെയ്സിങ്ങിന് മറുപടിയുമായി നിര്ഭയയുടെ അമ്മ ആശാദേവിയും രംഗത്തെത്തി. തനിക്ക് ഇത്തരം ഉപദേശം തരാന് ഇന്ദിര ജെയ്സിങ് ആരാണെന്ന് അവര് ചോദിച്ചു. രാജ്യം മുഴുവന് നിര്ഭയ കേസ് പ്രതികളെ തൂക്കിലേറ്റണമെന്നാണ് ആഗ്രഹിക്കുന്നതെന്നും അവര് പറഞ്ഞു.
ഫെബ്രുവരി ഒന്നിന് നിര്ഭയ കേസ് പ്രതികളെ തൂക്കിലേറ്റാന് കോടതി മരണവാറണ്ട് പുറപ്പെടുവിച്ചിരുന്നു. കേസിലെ പ്രതികളായ വിനയ്, അക്ഷയ്, പവന്, മുകേഷ് എന്നിവരെയാണ് വധശിക്ഷക്ക് വിധേയരാക്കുന്നത്. ജനുവരി 22ന് വധശിക്ഷ നടപ്പാക്കാനാണ് നേരത്തെ നിശ്ചയിച്ചിരുന്നതെങ്കിലും പ്രതികള് തിരുത്തല് ഹരജിയുമായി മുന്നോട്ട് പോയതോടെ ഇത് നീളുകയായിരുന്നു.
https://www.facebook.com/Malayalivartha
