കെ.പി.സി.സി ജനറൽ സെക്രട്ടറിയും മുൻ എം.എൽ.എയുമായ വി. ബലറാം (72) അന്തരിച്ചു. ഏറെ നാളായി ചികിത്സയിലായിരുന്നു. തൃശൂരിലെ സ്വകാര്യ ആശുപത്രിയിലായിരുന്നു അന്ത്യം.

വടക്കാഞ്ചേരി മണ്ഡലത്തിൽ നിന്ന് വിജയിച്ചാണ്​ 10ാം നിയമസഭയിൽ വി. ബലറാം എത്തിയത്​. 11ാം നിയമസഭയിലേക്ക് വീണ്ടും തെരഞ്ഞെടുക്കപ്പെട്ട അദ്ദേഹം, കെ. മുരളീധരന്​ മത്സരിക്കാനായി എം.എൽ.എ സ്ഥാനം 2004 ഫെബ്രുവരി 20ന് രാജിവെച്ചു. കെ. കരുണാകരൻ കോൺഗ്രസുമായി തെറ്റി ഡിഐസി രൂപവത്​കരിച്ചപ്പോൾ അതിനൊപ്പം പോയ നേതാക്കളിൽ ഒരാളാണ്​. പിന്നീട് കരുണാകരനുമായി അകന്ന ശേഷം വീണ്ടും കോൺഗ്രസിലേക്ക് തിരിച്ചെത്തി.

എംഎൽഎ സ്ഥാനം രാജിവച്ച ശേഷം കോഴിക്കോട് ലോക്‌സഭ മണ്ഡലത്തിൽ നിന്ന് ജനവിധി തേടിയെങ്കിലും ജയിക്കാനായില്ല.എ.കെ.ആന്റണി മന്ത്രിസഭയിൽ അംഗമായ കെ.മുരളീധരന് മത്സരിക്കാൻ വേണ്ടിയാണ് 2004 ൽ ബലറാം എംഎൽഎ സ്ഥാനം രാജിവച്ചത്. എന്നാൽ, ഉപതിരഞ്ഞെടുപ്പിൽ കെ.മുരളീധരൻ പരാജയപ്പെട്ടു

നിയമസഭാ സമിതി ചെയർമാൻ (2001-2004), കൊച്ചിൻ അഗ്രികൾച്ചറൽ ബാങ്ക് പ്രസിഡന്‍റ്, കേരള ഖാദി ഗ്രാമവ്യവസായ ബോർഡ് ചെയർമാൻ, എ.ഐ.സി.സി അംഗം, തൃശൂർ ഡി.സി.സി ജനറൽ സെക്രട്ടറി, കെ.എസ്.യു സംസ്ഥാന ജനറൽ സെക്രട്ടറി എന്നീ പദവികൾ വഹിച്ചിട്ടുണ്ട്.

രാമൻ നായർ- വെല്ലൂർ ചിന്നമ്മു അമ്മ ദമ്പതികളുടെ മകനായി 1947 നവംബർ 10നാണ് ജനനം. ഭാര്യ: ഡോ. കാഞ്ചനമാല. രണ്ട് മക്കൾ . വിദേശത്തുള്ള മക്കൾ എത്തിയതിനു ശേഷമായിരിക്കും സംസ്‌കാര ചടങ്ങുകൾ നടക്കുക