അമ്മ കാറില് ഉപേക്ഷിക്കപ്പെട്ട നിലയില് കിടക്കുന്നത് മാധ്യമങ്ങളിലൂടെ അറിഞ്ഞ മകന് തേടിയെത്തി!
അടിമാലി ടൗണിനു സമീപം ദേശിയപാതയോരത്ത് കെ എല് 12 സി 4868 എന്ന ആള്ട്ടോ കാറിലാണ് 55-കാരിയായ വീട്ടമ്മയെ കണ്ടെത്തിയത്. പാതയോരത്ത് വാഹനം രണ്ട് ദിവസമായി നിര്ത്തിയിട്ടിരിക്കുന്നത് ടൗണിലെ ഓട്ടോ റിക്ഷ ഡ്രൈവര്മാരുടെ ശ്രദ്ധയില്പ്പെട്ടിരുന്നു. വാഹനം പോകാതെ വരികയും വാഹനത്തിനുള്ളില് വീട്ടമ്മയെ കാണുകയും ചെയ്തതോടെ ഓട്ടോ റിക്ഷ ഡ്രൈവര്മാര് വിവരം അടിമാലി പൊലീസില് അറിയിക്കുകയായിരുന്നു.
ഒരു വശം തളര്ന്ന് പോയിട്ടുള്ള സ്ത്രീയാണ് കാറിനുള്ളില് ഉള്ളതെന്ന് മനസ്സിലായതിനെ തുടര്ന്നിവരെ അടിമാലി താലൂക്കാശുപത്രിയില് പ്രവേശിപ്പിക്കുകയും ചെയ്തു. വാഹനത്തിന്റെ താക്കോലും, വീട്ടമ്മയുടേതെന്ന് കരുതുന്ന വസ്ത്രങ്ങളും ചില ബാങ്കിടപാട് രേഖകളും കാറിനുള്ളില് ഉണ്ടായിരുന്നു.
വയനാട് സ്വദേശിനിയായ ലൈലാമണിയെയാണ് വാഹനത്തില് നിന്നും കണ്ടെത്തിയതെന്നാണ് വാഹനത്തിലുണ്ടായിരുന്ന രേഖകളില് നിന്നും ലഭിക്കുന്ന വിവരം. വാഹന നമ്പര് അടിസ്ഥാനമാക്കി നടത്തിയ അന്വേഷണത്തില് വീട്ടമ്മയുടെ ഭര്ത്താവ് വയനാട് സ്വദേശിയായ മാത്യുവാണെന്നാണ് പൊലീസ് നല്കുന്ന പ്രാഥമിക സൂചന.
അതേ സമയം താനും ഭര്ത്താവുമൊത്ത് കട്ടപ്പന ഇരട്ടയാറ്റിലുള്ള മകന്റെ വീട്ടിലേക്ക് പോകുകയായിരുന്നെന്നും അടിമാലിയില് എത്തിയപ്പോള് ഭര്ത്താവ് മൂത്രമൊഴിക്കാനായി കാറില് നിന്നും ഇറങ്ങി പോയതായും ചികത്സയില് കഴിയുന്ന വീട്ടമ്മ പറഞ്ഞു.സംഭവവുമായി ബന്ധപ്പെട്ട് അടിമാലി പൊലീസ് അന്വേഷണം തുടങ്ങി.
മാധ്യമങ്ങളിലൂടെ വിവരം അറിഞ്ഞ മകന് മഞ്ജിത് അടിമാലി പൊലീസ് സ്റ്റേഷനില് ഹാജരായി. ലൈലാമണിയെ ഉപേക്ഷിച്ചശേഷം ഭര്ത്താവ് മാത്യു മുങ്ങിയെന്നാണ് പ്രാഥമിക നിഗമനം.
https://www.facebook.com/Malayalivartha
