ആര്‍ക്കും ആരുടേയും സ്വാതന്ത്ര്യം നിഷേധിക്കാന്‍ അധികാരമില്ലാത്ത നാടാണ് നമ്മുടേത്. എന്നാലോ, എല്ലാ സ്വാതന്ത്ര്യങ്ങള്‍ക്കും പരിധിയുണ്ട് താനും. രാഷ്ട്രീയക്കാർ സാധാരണ സമരം നടത്തിയാല്‍ ആ നാട്ടില്‍ അന്ന് പിന്നെ ആര്‍ക്കും വലിയ സ്വാതന്ത്ര്യം ഒന്നും ഉണ്ടാകാറ് പതിവില്ല. അതിപ്പോള്‍ ഹാര്‍ത്താലോ മാര്‍ച്ചോ ധര്‍ണയോ ഉപരോധമോ എന്തുമാകട്ടെ, നാടടക്കം പാര്‍ട്ടിക്കാര്‍ അങ്ങ് കയ്യടക്കുകയായിരുന്നു പതിവ്.

ഇപ്പോഴിതാ പണികിട്ടിയിരിക്കുകയാണ് എ ശബരിനാഥൻ എംഎൽഎക്ക്. വഴി തടയൽ കേസിൽ തുടർച്ചയായി കോടതിയിൽ ഹാജരാകാത്ത അരുവിക്കര നിയോജക മണ്ഡലം എം എൽ എ ശബരിനാഥന് അറസ്റ്റ് വാറണ്ട്. തിരുവന്തപുരം അഡീഷണൽ ചീഫ് ജുഡീഷ്യൽ മജിസ്‌ട്രേട്ട് കോടതിയാണ് അറസ്റ്റ് വാറണ്ട് ഉത്തരവ് പുറപ്പെടുവിച്ചത്. എം എൽ എ അടക്കം പന്ത്രണ്ട് പ്രതികളെ അറസ്റ്റ് ചെയ്യാൻ പൂജപ്പുര സർക്കിൾ ഇൻസ്പെക്ടറോടാണ് മജിസ്ട്രേട്ട് ജയകൃഷ്ണൻ ഉത്തരവിട്ടത്.

2016 ലാണ് കേസിനാസ്പദമായ സംഭവം നടന്നത്. കോൺഗ്രസ് നേതാക്കളും പ്രവർത്തകരുമായ ശബരിനാഥൻ , വിൻസന്റ് , കരകുളം കൃഷ്ണപിള്ള , സതീഷ് കുമാർ , ഹരികുമാർ , ഷൈൻ ലാൽ , അനിൽകുമാർ , രാജേഷ് , ദീപു , അനന്തു ശേഖർ , ജയേഷ് ചന്ദ്രൻ , ജയശ്രീ എന്നിവരാണ് കേസിലെ ഒന്നു മുതൽ പന്ത്രണ്ടു വരെയുള്ള പ്രതികൾ.

പൂജപ്പുര ജംഗ്ഷന് സമീപം പ്രതികൾ ന്യായവിരോധമായി സംഘം ചേർന്ന് പൊതുവഴി തടഞ്ഞ് അതു വഴിയുള്ള വാഹന ഗതാഗതത്തിനും കാൽനട യാത്രക്കാർക്കും സഞ്ചാര സ്വാതന്ത്ര്യം നിഷേധിച്ചുവെന്നും ന്യായവിരോധമായ ജനക്കൂട്ടം പിരിഞ്ഞു പോകണമെന്ന പോലീസിന്റെ ന്യായമായ അജ്ഞയെ ധിക്കരിച്ചു പ്രവർത്തിച്ചുവെന്നുമാണ് കേസ്. 2017 ജനുവരി 13 നാണ് പൂജപ്പുര പോലീസ് കേസിൽ കുറ്റപത്രം സമർപ്പിച്ചത്.

സമാന രീതിയിൽ മുൻപ് ദേവസ്വം -സഹകരണ വകുപ്പ് മന്ത്രി കടകംപള്ളി സുരേന്ദ്രനെതിരെയും തിരുവനന്തപുരം അഡീഷണൽ ചീഫ് ജുഡീഷ്യൽ മജിസ്‌ട്രേട്ട് കോടതി ജാമ്യമില്ലാ അറസ്റ്റ് വാറണ്ട് പുറപ്പെടുവിച്ചിരുന്നു. 2012 ലാണ് കേസിനാസ്പദമായ സംഭവം നടന്നത്. പൂജപ്പുര ജംഗ്ഷന് മുന്നിലുള്ള പബ്ലിക് റോഡിൽ നേതാക്കളുടെ നേതൃത്വത്തിൽ ന്യായവിരോധമായി സംഘം ചേർന്ന് കാൽനടയാത്രക്കാർക്കും വാഹന ഗതാഗതത്തിനും തടസ്സം സൃഷ്ടിച്ച് ജനങ്ങൾക്ക് ഭരണഘടന വിഭാവനം ചെയ്ത സഞ്ചാര സ്വാതന്ത്ര്യം തടസ്സപ്പെടുത്തിയെന്നും നിയമവിരുദ്ധമായ ജനക്കൂട്ടം പിരിഞ്ഞു പോകണമെന്ന പോലീസിന്റെ ന്യായമായ ആജ്ഞയെ ധിക്കരിച്ച് വഴിതടയൽ തുർന്നുവെന്നുമാണ് കേസ്. 2013 മാർച്ച് 25നാണ് പൂജപ്പുര പോലീസ് കേസിൽ കുറ്റപത്രം സമർപ്പിച്ചത്. കടകംപള്ളി സുരേന്ദ്രൻ , ആനാവൂർ നാഗപ്പൻ , പുത്തൻകട വിജയൻ , ഗോപൻ , ബിജു , എസ്. പുഷ്പലത , ദീപക് , ഉണ്ണി എന്ന ഉണ്ണികൃഷ്ണൻ , രാജശേഖരൻ നായർ , പാപ്പച്ചൻ , എ.എ. റഷീദ് , മുൻ എം എൽ എ ശിവൻകുട്ടി , കോലിയക്കോട് കൃഷ്ണൻ നായർ , മീനാംബിക , പത്മകുമാർ എന്നിവരാണ് ഈ കേസിൽ ഒന്നു മുതൽ പതിനഞ്ച് വരെയുള്ള പ്രതികൾ.