തിരുവനന്തപുരം പൂജപ്പുര സെൻട്രൽ ജയിലിലെ സുഹൃത്തിനെ വിയ്യൂരിലെ അതി സുരക്ഷാ ജയിലിലേക്ക് ക്ഷണിച്ചുകൊണ്ട് ഒരു തടവുപുള്ളി എഴുതിയ കത്താണ് ഇപ്പോൾ താരം . തടവുകാർക്കിടയിൽ ഹിറ്റാണ് വിയ്യൂർ ജയിൽ. സുരക്ഷ കുറച്ച് കടുകട്ടിയാണെങ്കിലും അവിടത്തെ സ്വാതന്ത്ര്യമാണ് തടവുകാരെ വിയ്യൂർ ജയിൽ പ്രിയപ്പെട്ടതാക്കുന്നത്. അതിനാലാണ് വിയ്യൂരിൽ എത്തപ്പെടുന്ന തടവുപുള്ളികൾ മറ്റ് ജയിലുകളിൽ കഴിയുന്നവരെകൂടി അങ്ങോട്ട് ക്ഷണിക്കുന്നതും. ഈ കത്തും അത്തരത്തിൽ ഒരു സുഹൃത്തിനെ വിയ്യൂർ ജയിലിലേക്ക് ക്ഷണിക്കുന്നതാണ് .വിയ്യൂർ അതിസുരക്ഷാ ജയിൽ പ്രവർത്തനമാരംഭിച്ച ശേഷം അവിടത്തെ സൗകര്യങ്ങളും സ്വാതന്ത്ര്യവും വിവരിച്ച് തടവുകാരായ നിരവധി പേരാണ് കണ്ണൂർ, പൂജപ്പുര സെൻട്രൽ ജയിലുകളിലെ സുഹൃത്തുക്കൾക്ക് കത്ത് അയയ്ക്കുന്നത്. തടവുകാർക്കുള്ള കത്തുകൾ ജയിൽ ഉദ്യോഗസ്ഥർ പൊട്ടിച്ച് വായിച്ച് നോക്കിയശേഷമേ നൽകാറുളളൂവെന്നതിനാൽ വിയ്യൂരിലേക്ക് ക്ഷണം ലഭിച്ച വിവരം തടവുകാർ പലരും അറിയുന്നില്ല. ഒരു റിസോട്ടിന്റെതായ പല സൗകര്യങ്ങളും ഇവിടെ ലഭിക്കുന്നു എന്നതാണ് തടവുകാരുടെ പ്രിയപ്പെട്ട ജയിലായി വിയ്യൂർ സെൻട്രൽ ജയിൽ മാറാൻ കാരണം.

''അളിയാ നീ എത്രയും പെട്ടെന്ന് ഇവിടേക്ക് വരണം. അടിപൊളിയാണ്. ഫൈവ് സ്റ്റാർ ഹോട്ടലിനേക്കാൾ മുടിഞ്ഞ സൗകര്യമാ ഇവിടെ. അതി സുരക്ഷയെന്നൊക്കെ കേട്ടപ്പോ ആദ്യം ഞെട്ടിയെങ്കിലും സ്വർഗമാ ബ്രോ സ്വർഗം. വിലകൂടിയ ടൈലുകൾ പതിച്ച അറ്റാച്ച്ഡ് മുറികൾ, ആഹാരം കഴിക്കാൻ ഡൈനിംഗ് ടേബിളുകൾ, വാഷ് ബേസിൻ, കഴിക്കാനോ പ്രാഥമിക കൃത്യങ്ങൾക്കോ ക്യൂനിൽക്കേണ്ട. ഉറങ്ങാൻ കട്ടിൽ. വീട്ടിൽപോലുമില്ലാത്ത എല്ലാ സൗകര്യങ്ങളുമുണ്ട്. പുലർച്ചെ യോഗ, വൈകുന്നേരം കായിക പരിശീലനം. ഫുട്‌‌ബോളുൾപ്പെടെ കളികൾ. വിശാലമായ ലൈബ്രറി. അവിടത്തെപ്പോലെ ആരുടെയും ക്രോസും മുറയുമൊന്നുമില്ല. റൂമെല്ലാം കാലി. എല്ലാവരും ഹാപ്പിയാണ്. നീ കൂടി വന്നാൽ നമുക്ക് ഇവിടെ അടിച്ചുപൊളിക്കാം'. ഇങ്ങനെയായിരുന്നു വൈറലായി കൊണ്ടിരിക്കുന്ന കത്തിലെ വാക്കുകൾ.

അതിനുമാത്രമെന്താ വിയ്യൂർ ജയിലിൽ പ്രത്യേകത എന്ന് എല്ലാവരും അമ്പരന്നേക്കാം.സുരക്ഷയിൽ മാത്രമല്ല സൗകര്യങ്ങളിലും വിയ്യൂർ ജയിൽ മുന്നിലാണ് . വിദേശങ്ങളിലേതുപോലെ വിശാലമായ സെൽമുറികളിൽ നൂതന സൗകര്യങ്ങൾ. നല്ല വൃത്തിയും വെടിപ്പും. നല്ല വെളിച്ചവും വായുസഞ്ചാരവുമുള്ള മുറികൾ. എപ്പോഴും തുറന്ന് വിട്ടിരിക്കുന്നതിനാൽ ഒരു ജയിലിന്റെ പ്രതീതി തീരെയില്ല . ജോലി ചെയ്യണമെന്ന് നിർബന്ധമില്ല. വേണമെങ്കിൽ മാത്രം ജോലി ചെയ്താൽ മതി.

എൻ.ഐ.എ കേസുകളിൽപ്പെട്ടവരെയും കുഴപ്പക്കാരെയും വധശിക്ഷയ്ക്ക് വിധിക്കപ്പെട്ടവരെയുമൊക്കെയാണ് വിയ്യൂരിലെ അതി സുരക്ഷാ ജയിലേക്ക് കൊണ്ടുവരുന്നത് . ചെറിയ ചെറിയ കുറ്റങ്ങൾ ചെയ്യുന്ന തടവുകാർക്ക് അവിടേക്ക് പ്രവേശനമില്ല. ആലുവ കൂട്ടക്കൊലക്കേസിലെ ആന്റണി, റിപ്പർ ജയാനന്ദൻ, ആട് ആന്റണി തുടങ്ങി 19 വധശിക്ഷക്കാരും കണ്ടക്ടർ കൊലപാതകക്കേസിൽ ജീവപര്യന്തം ശിക്ഷിക്കപ്പെട്ട ഡിവൈ.എസ്.പി ഷാജിയുൾപ്പെടെ ഉള്ളവർ വിയ്യൂർ ജയിലിലെ അന്തേവാസികളാണ്.

തീവ്രവാദി ആക്രമണങ്ങളും അട്ടിമറി ശ്രമങ്ങളും പ്രതിരോധിക്കാൻ സാധിക്കുന്ന അത്യാധുനിക സുരക്ഷാ സംവിധാനങ്ങൾ, തടവുകാർ തമ്മിൽ ആശയ വിനിമയത്തിനോ കൂടിക്കാഴ്ചയ്ക്കോ കഴിയാത്തവിധമുള്ള സിംഗിൾ സെല്ലുകൾ, തടവറകൾ തുരക്കാതിരിക്കാൻ അതി ശക്തിയുള്ള ഇരട്ടഭിത്തി,ഫുൾബോഡി സ്കാനർ, ബാഗേജ് സ്കാനർ, ബയോ മെട്രിക് വെരിഫിക്കേഷൻ, 15 മീറ്റർ ഉയരത്തിൽ നാല് നൈറ്റ് വിഷൻ വാച്ച് ടവർ, ഹൈ ബീം സെർച്ച് ലൈറ്റ്, 250 ലേറെ സി.സി. ടിവി കാമറകൾ, സദാ സായുധ കാവൽ, ട്രാൻസ്ജെൻഡറുകൾക്ക് പ്രത്യേക ബ്ലോക്ക്, ഹൈഡ്രോളിക് ഗേറ്റുകൾ, തടവുകാരെ പരിശോധിക്കാൻ ഹാന്റ് ഹെൽഡ് മെറ്റൽ ഡിറ്റക്ടർ , ഡോർ ഫ്രെയിം ഡിറ്റക്ടർ, മിനി തിയേറ്ററുൾപ്പെടെയുള്ള ആശുപത്രി സൗകര്യം, ടെലി മെഡിസിൻ, അതീവ സുരക്ഷക്ക് കമാൻഡോകൾ എന്നിവയാണ് വിയ്യൂർ ജയിലിലെ റിസോർട്ടിനെ വെല്ലും സൗകര്യങ്ങൾ.
നിലവിൽ 370 തടവുകാർ ആണ് വിയ്യൂർ ജയിലിൽ ഉള്ളത്.