സിറോ മലബാർ സഭയുടെ ലൗ ജിഹാദ് വിവാദത്തിനെതിരെ ഡി.വൈ.എഫ്‌.ഐ രംഗത്ത്. കേരളത്തിൽ ലൗ ജിഹാദ് ഉണ്ടെന്നതിന് തെളിവ് ഉണ്ടോ എന്ന അടിസ്ഥാനത്തിലാണ് പറയുന്നതെന്ന് സിറോ മലബാർ സഭാ നേതൃത്വം വ്യക്തമാക്കണമെന്ന് ഡി.വൈ.എഫ്.ഐ സംസ്ഥാന സെക്രട്ടറി എ.എ റഹിം ആവശ്യപ്പെട്ടു. ഉത്തരേന്ത്യയിൽ മത വിശ്വാസത്തിന്റെ പേരിൽ ചുട്ടെരിക്കപ്പെട്ട ക്രൈസ്തവ ദേവാലയങ്ങളെ എത്ര പെട്ടെന്നാണ് സഭാ നേതൃത്വം മറക്കുന്നതെന്നും റഹിം വ്യക്തമാക്കി.

കേരളത്തിൽ ലൗ ജിഹാദ് ഇല്ലെന്ന് പൊലീസ് മേധാവി വ്യക്തമാക്കി. എന്നിട്ടും എന്ത് സാഹചര്യത്തിലാണ് സഭ ലൗ ജിഹാദ് ആരോപണം ആവർത്തിക്കുന്നതെന്ന് വ്യക്തമാക്കണമെന്നും റഹിം കൂട്ടിച്ചേർത്തു. ലൗ ജിഹാദ് എന്നത് ആർ.എസ്.എസിന്റെ പ്രഖ്യാപിത അജണ്ടയാണെന്നും അദ്ദേഹം പറയുകയുണ്ടായി. ഇപ്പോൾ മുസ്ലിങ്ങളെയാണ് ആർ.എസ്.എസ് ലക്ഷ്യം വെക്കുന്നതെന്നും അദേഹം പറഞ്ഞു. അതിനാൽ ഇത്തരം പരാമർശങ്ങൾ ന്യൂനപക്ഷങ്ങളെ കൂടുതൽ വേട്ടയാടാൻ കാരണമാകുമെന്നും റഹിം പറഞ്ഞു.