കടയിൽ പരിശോധനക്കെത്തിയ ഉദ്യോഗസ്ഥർക്ക് നേരെ കയ്യേറ്റ ശ്രമം. കൂടാതെ വധ ഭീഷണിയും. ഹരിപ്പാടാണ് സംഭവം നടക്കുന്നത്. പ്ലാസ്റ്റിക്ക് നിരോധനത്തിന് ശേഷം വ്യാപാര സ്ഥാപനത്തിൽ പരിശോധനക്ക് വന്ന ഉദ്യോഗസ്ഥർക്കും നഗരസഭ അധികൃതർക്കും നേരെയാണ് കയ്യേറ്റ ശ്രമം ഉണ്ടായത്. കടയുടമയുടെ ബന്ധു അസഭ്യം പറയുകയും കൈയ്യേറ്റം നടത്താൻ ശ്രമിക്കുകയും ചെയ്യുകയായിരുന്നു.

കഴിഞ്ഞ ദിവസം രാവിലെയാണ് സംഭവം നടക്കുന്നത്. ഹെൽത്ത് ഇൻസ്പപക്ടർ, നഗരസഭ അധികൃതർ എന്നിവർ പരിശോധനക്കെത്തിയപ്പോൾ ഹരിപ്പാട് സുബ്രഹ്മണ്യസ്വാമി ക്ഷേത്രത്തിന് സമീപം പച്ചമരുന്ന് വില്‍പ്പന നടത്തുന്ന സ്ഥാപന ഉടമയുടെ ബന്ധുവാണ് ഉദ്യോഗസ്ഥരെ വെല്ലുവിളിക്കുകയും ഭീഷണിപ്പെടുത്തുകയും ചെയ്തത്.

പ്ലാസ്റ്റിക് ബാഗുകളും മറ്റും നിരോധിച്ച ശേഷം പരിശോധനക്കെത്തിയവർ ബാഗുകൾ പിടിച്ചെടുത്തതിരുന്നു. ഇതേത്തുടർന്നാണ് കടയില്‍ കയറിയാൽ വെട്ടുമെന്നും നഗരസഭ അധികൃതരും ഉദ്യോഗസ്ഥരും അവരുടെ പണി ഒഫീസിൽ ചെയ്താൽ മതിയെന്നും കടയിൽ കയറിയാൽ വിവരമറിയുമെന്നും ഇയാൾ ഭീഷണി മുഴക്കുന്നത്.. ഒടുവിൽ സ്ഥലത്ത് പൊലീസ് എത്തി പ്രശ്നം പരിഹരിക്കുകയായിരുന്നു . ഹെൽത്ത് ഇൻസ്പപക്ടർ കടയുടമക്കെതിരെ ഹരിപ്പാട് പൊലീസിൽ പരാതി നൽകുകയും ചെയ്തു.