അനധികൃതമായി ഓടുന്ന വണ്ടി എന്ന് ആരോപിച്ച് പ്രതിശ്രുത വരന്‍ സഞ്ചരിച്ച വാഹനം മോട്ടോര്‍ വാഹനവകുപ്പ് ഉദ്യോഗസ്ഥര്‍ തടഞ്ഞു. മനസമ്മതത്തിനു പോകുകയായിരുന്ന യുവാവിന്റെ വാഹനമാണ് മോട്ടോർ വകുപ്പ് ഉദ്യോഗസ്ഥർ തടഞ്ഞത്. ഒടുവിൽ തുടര്‍ന്നുള്ള നടപടികള്‍ നീണ്ടുപോയതോടെ മനസമ്മതത്തിന് നിശ്ചയിച്ച മുഹൂര്‍ത്തവും തെറ്റി. മനസമ്മതത്തിനായി വരനും ബന്ധുക്കളും സഞ്ചരിച്ച ഇന്നോവ കാറാണ് മോട്ടര്‍ വാഹന വകുപ്പ് എന്‍ഫോഴ്സ്മെന്റ് സ്‌ക്വാഡ് പിടികൂടിയത്. വരന്‍ സഞ്ചരിച്ച വാഹനം കള്ളടാക്‌സിയായി ഓടുന്നതാണെന്ന് പരാതി ലഭിച്ചിട്ടുണ്ടെന്ന് ചൂണ്ടിക്കാട്ടിയാണ് ഉദ്യോഗസ്ഥർ വാഹനം തടഞ്ഞത്.

എഴുകുംവയല്‍ കാക്കനാട് സ്വദേശി റെനിറ്റിന്റെ മനസമ്മതം രാജാക്കാട് ക്രിസ്തുരാജ പള്ളിയില്‍ ഇന്ന് രാവിലെ 11.30-നാണ് നിശ്ചയിച്ചിരുന്നത്. രാജാക്കാട് സ്വദേശിനിയായ പെണ്‍കുട്ടിയാണ് വധു. കുമളി-മൂന്നാര്‍ സംസ്ഥാന പാതയിലൂടെയുള്ള യാത്രക്കിടെയാണ് മോട്ടര്‍ വാഹന വകുപ്പ് വരന്‍ സഞ്ചരിച്ച വാഹനം തടഞ്ഞു നിർത്തിയത്. എന്നാല്‍, വാഹനം വരനായ റെനിറ്റിന്റെ സുഹൃത്തും അയല്‍വാസിയുമായ വ്യക്തിയുടേതായിരുന്നു. ഈ വാഹനത്തിന് മോട്ടോര്‍ വാഹന വകുപ്പ് 6000 രൂപ പിഴ ഈടാക്കിയ ശേഷമാണ് വിവാഹ സംഘത്തെ ഉദ്യോഗസ്ഥർ പോകാൻ അനുവദിച്ചത്.

മനസമ്മതത്തിന് പോകുന്ന വരനും കൂട്ടരുമാണെന്ന് അറിയിച്ചിട്ടും ഉദ്യോഗസ്ഥര്‍ വാഹനം വിട്ടുനല്‍കാന്‍ സമ്മതിച്ചില്ല . ഇതേതുടര്‍ന്ന് വാഹനത്തിലുണ്ടായിരുന്ന വരന്റെ സംഘവും ഉദ്യോഗസ്ഥരും തമ്മിൽ വാക്കുതർക്കവും നടന്നു. ഉദ്യോഗസ്ഥര്‍ വാഹനത്തിന്റെ താക്കോല്‍ പിടിച്ചുവാങ്ങിയെന്നും ദൃക്‌സാക്ഷികള്‍ വെളിപ്പെടുത്തി. എന്നാല്‍, ഉദ്യോഗസ്ഥര്‍ മനപ്പൂര്‍വം സമയം വൈകിപ്പിക്കുകയായിരുന്നെന്ന് വരനും ബന്ധുക്കളും ആരോപിക്കുന്നു. ഈ സമയത്ത് അതുവഴി പോയ മറ്റ് വാഹനങ്ങള്‍ ഉദ്യോഗസ്ഥര്‍ പരിശോധനക്കായി തടഞ്ഞില്ല എന്നും മനപ്പൂർവം ഇത്തരമൊരു പ്രശ്നമുണ്ടാക്കിയതാണെന്നും നാട്ടുകാരും ആരോപിച്ചു. പ്രശ്‌നപരിഹാരത്തിന് ശേഷം അരമണിക്കൂറോളം വൈകി 11.50-നാണ് വരനും കൂടെയുള്ളവരും പള്ളിയിലെത്തിയത്.