കനാലില്‍ മുങ്ങിത്താഴ്ന്നു കൊണ്ടിരുന്ന കുട്ടിയെ രക്ഷിച്ചത് സമപ്രായക്കാരന്‍!
മൂവാറ്റുപുഴയ്ക്കടുത്ത് മേതല ഹൈലെവല്‍ കനാലിന്റ ഭാഗമായ കുറ്റിലഞ്ഞി പാലത്തിനു സമീപം കനാലില്‍ വീണ 9 വയസ്സുകാരനെ, കനാലിലേക്കെടുത്തു ചാടി രക്ഷപ്പെടുത്തിയത് 10 വയസ്സുകാരന്‍.
ഓലിപ്പാറ പുതുക്കപ്പറമ്പില്‍ ഹസൈനാരിന്റെ മകന്‍ ബാദുഷ(9)യെയാണ് മദ്രസയില്‍ നിന്നു വീട്ടിലേക്കു മടങ്ങുകയായിരുന്ന ഓലിപ്പാറ ബാവു ഹസ്സന്റെ മകന്‍ അല്‍ഫാസ് ബാവു(10) രക്ഷപ്പെടുത്തിയത്.
പ്രധാന കനാലിന് അരികില്‍ നില്‍ക്കുകയായിരുന്ന ബാദുഷ ശക്തമായ ഒഴുക്കുണ്ടായിരുന്ന കനാലില്‍ അബദ്ധത്തില്‍ വീഴുകയായിരുന്നു. ആഴങ്ങളിലേക്കു മുങ്ങിത്താഴുകയായിരുന്ന ബാദുഷയെ സമീപവാസിയായ മുസ്തഫ ആദ്യം കണ്ടെങ്കിലും എന്തുചെയ്യണമെന്നറിയാതെ പകച്ചു പോയി. ബഹളം വച്ചതോടെ മദ്രസയില്‍ നിന്നു വീട്ടിലേക്കു മടങ്ങുകയായിരുന്ന അല്‍ഫാസ് കാണുകയും ബാദുഷയെ രക്ഷിക്കാന്‍ കനാലിലേക്കു ചാടുകയുമായിരുന്നു.
നെല്ലിക്കുഴി അല്‍അമല്‍ സ്‌കൂള്‍ അഞ്ചാം ക്ലാസ് വിദ്യാര്‍ഥിയായ അല്‍ഫാസ് ബാവു നീന്തി ബാദുഷയുടെ അടുത്തെത്തി ഒരു വിധത്തില്‍ ബാദുഷയെയും കൊണ്ട് കരയിലേക്കെത്തി. കുറ്റിലഞ്ഞി സര്‍ക്കാര്‍ സ്‌കൂള്‍ അഞ്ചാം ക്ലാസ് വിദ്യാര്‍ഥിയാണ് ബാദുഷ. സമപ്രായക്കാരനെ രക്ഷപ്പെടുത്താന്‍ കനാലിലേക്കെടുത്തു ചാടിയ അല്‍ഫാസിന് നാടിന്റെ നാനാഭാഗത്തു നിന്നും അഭിനന്ദന പ്രവാഹമാണ്.
https://www.facebook.com/Malayalivartha
