ഗുഡ്സ് ട്രെയിന് അമ്പലപ്പുഴ സ്റ്റേഷനില് പാളം തെറ്റി; മൂന്നു മണിക്കൂര് ഗതാഗതം തടസ്സപ്പെട്ടു
ആലപ്പുഴ വഴിയുള്ള ട്രെയിന് ഗതാഗതം ഇന്നലെ മൂന്നു മണിക്കൂറോളം തടസ്സപ്പെട്ടു. അമ്പലപ്പുഴ റെയില്വേ സ്റ്റേഷനു സമീപം ഗുഡ്സ് ട്രെയിന് പാളം തെറ്റിയതിനെ തുടര്ന്നായിരുന്നു ഇത്.
അമ്പലപ്പുഴ സ്റ്റേഷന്റെ ഒന്നാം പ്ലാറ്റ്ഫോമിനു സമീപം വച്ച് അമ്പലപ്പുഴ - ഹരിപ്പാട് ഇരട്ടപ്പാതയുടെ നിര്മാണത്തിനായി മെറ്റല് കയറ്റിയ ഗുഡ്സ് ട്രെയിനാണ് പാളം തെറ്റിയത്. ഉച്ചയ്ക്ക് 1.45-ന് ആയിരുന്നു അപകടം. ആളപായമില്ല.
11 ബോഗികളുള്ള ട്രെയിനിന്റെ അഞ്ചാമത്തെ ബോഗിയുടെ മുന്നിലെ രണ്ടു ചക്രങ്ങളാണ് പാളത്തില് നിന്നു തെന്നിമാറിയത്. അമ്പലപ്പുഴ സ്റ്റേഷന് പരിസരത്ത് സംഭരിച്ചിരുന്ന മെറ്റല് കയറ്റിയ വണ്ടി മുന്നോട്ടെടുത്ത് സ്റ്റേഷന് പ്ലാറ്റ്ഫോം പിന്നിട്ടപ്പോള് പാളംതെറ്റുകയായിരുന്നു. ഒന്നാമത്തെ പ്ലാറ്റ്ഫോമിനു സമീപത്തെ പാളത്തിലാണ് ട്രെയിന് കിടന്നത്. സിഗ്നല് തകരാറിലായതിനാല് സ്റ്റേഷനിലെ മറ്റു പാളങ്ങളിലൂടെയും ട്രെയിന് വിടാന് കഴിഞ്ഞില്ല.
വൈകിട്ട് 4.35-നാണ് റെയില്വേ സുരക്ഷാ വിഭാഗം ഉദ്യോഗസ്ഥരും എന്ജിനീയറിങ് വിഭാഗവും നടത്തിയ പരിശോധനകള്ക്ക് ശേഷം സ്റ്റേഷനിലൂടെ ട്രെയിന് കടത്തിവിട്ടു തുടങ്ങിയത്. 3.48-ന് അമ്പലപ്പുഴയിലെത്തിയ കായംകുളം - എറണാകുളം മെമു ആണ് ആദ്യം കടത്തിവിട്ടത്. മാരാരിക്കുളം സ്റ്റേഷനില് പിടിച്ചിട്ടിരുന്ന നേത്രാവതി എക്സ്പ്രസ് 5.30-നു ശേഷമാണ് അമ്പലപ്പുഴ സ്റ്റേഷന് കടന്നുപോയത്.
എറണാകുളത്തു നിന്ന് എത്തിച്ച റീറെയിലിങ് ഉപകരണത്തിന്റെ സഹായത്തോടെ ട്രെയിന് ഉയര്ത്തി തെന്നിമാറിയ ചക്രം പാളത്തിലേക്കു കയറ്റി. ആറു മണിയോടെയാണ് തീരദേശ പാതയില് ട്രെയിന് ഗതാഗതം സാധാരണ നിലയിലായത്.
റദ്ദാക്കിയതും തിരിച്ചുവിട്ടതുമായ ട്രെയിനുകള്
ഇന്നലത്തെ എറണാകുളം - ആലപ്പുഴ മെമു, എറണാകുളം - കായംകുളം പാസഞ്ചര്, എറണാകുളം - കൊല്ലം മെമു, കൊല്ലം - എറണാകുളം മെമു എന്നിവ റദ്ദാക്കി. കോഴിക്കോട്ടു നിന്നു തിരുവനന്തപുരത്തേക്കുള്ള ജനശതാബ്ദി എക്സ്പ്രസ് കോട്ടയം വഴി തിരിച്ചുവിട്ടു.
അറ്റകുറ്റപ്പണി: ട്രെയിനുകള് വൈകും
ഇടപ്പളളിക്കും ആലുവയ്ക്കുമിടയില് ട്രാക്ക് അറ്റകുറ്റപ്പണി നടക്കുന്നതിനാല് ഇന്നു മുതല് മാര്ച്ച് 5-വരെ രാത്രി 10-നും പുലര്ച്ചെ അഞ്ചിനും ഇടയിലുളള ചില ട്രെയിനുകള് എറണാകുളം-തൃശൂര് സെക്ഷനില് 15 മിനിറ്റ് വൈകും.
https://www.facebook.com/Malayalivartha