ദേവനന്ദയുടെ മരണത്തിൽ ദുരൂഹതകൾ മാറുന്നില്ല. ഫോറന്‍സിക് സംഘത്തിന്റെ പ്രാഥമിക നിഗമനം അനുസരിച്ച് കുട്ടി മുങ്ങിമരിച്ചത് വീടിന് സമീപത്തെ കുളിക്കടവിലായിരിക്കാമെനാണു പറയുന്നത് . മൃതദേഹം കണ്ടെത്തിയത് ബണ്ടിന് സമീപമാണെങ്കിലും പോസ്റ്മോർട്ടത്തിൽ കുട്ടിയുടെ വയറിൽ നിന്നും ലഭിച്ച ചെളിയും വെള്ളവും പരിശോധിച്ചപ്പോൾ മുങ്ങി മരണം സംഭവിച്ചത് അവിടെയല്ല എന്നാണ് ഫോറന്‍സിക് സംഘം പറയുന്നത്.

കുളിക്കടവില്‍ മുങ്ങിത്താഴ്ന്നകുട്ടി പുഴയിലെ നീരൊഴുക്ക് കാരണം പുഴയുടെ ആഴമേറിയ ഭാഗത്ത് എത്തിപ്പെട്ടതായിരിക്കാം . പുഴയിൽ അടിയൊഴുക്കുണ്ടായതു കാരണം മൃതദേഹം ഒഴുകി അവിടെ എത്താനുള്ള സാധ്യതയുണ്ട് ..തടയണയുടെ അടിയിലൂടെ ഒഴുകിയ മൃതദേഹം 300 മീറ്റര്‍ അകലെ പൊങ്ങിയെന്നും ഫോറന്‍സിക് സംഘം പറയുന്നു.വീടും പുഴയും വഴികളും വിശദമായി പരിശോധിച്ചശേഷമാണ് ഇത്തരമൊരു പ്രാഥമിക നിഗമനത്തിലേക്ക് ഫോറന്‍സിക് സംഘമെത്തിയത്.

കുട്ടിയുടെ വയറ്റില്‍ ചെളിയുടെ അംശം കൂടുതലായിരുന്നു. തടയണയ്ക്ക് സമീപത്ത് വെച്ചാണ് കുട്ടി പുഴയിലകപ്പെട്ടതെങ്കില്‍ വയറ്റിലെ ചെളിയുടെ അംശം ഇത്രത്തോളം ഉണ്ടാവില്ലായിരുന്നു. ഒപ്പം മൃതദേഹം മറ്റേതെങ്കിലും സ്ഥലത്ത് പൊങ്ങാനായിരുന്നു സാധ്യതയെന്നും ഫോറന്‍സിക് സംഘം കണ്ടെത്തി.
കുട്ടിയുടെ ആന്തരികാവയവങ്ങളിലുണ്ടായിരുന്ന ചെളിയും കുളിക്കടവിലെ ചെളിയും ഒന്നാണോ എന്നുളള പരിശോധനയും നടക്കുന്നുണ്ട്.

ദേവനന്ദയുടെ മരണത്തിലെ സംശയങ്ങള്‍ നീക്കാനായി ഫോറൻസിക്ക് പരിശോധന വേണമെന്ന് പൊലീസിന്റെ അഭ്യര്‍ഥനപ്രകാരം ആണ് സംഘം കഴിഞ്ഞദിവസം എളവൂരിലെ ദേവനന്ദയുടെ വീടിനുസമീപത്ത് പരിശോധന നടത്തിയത്. തിരുവനന്തപുരം മെഡിക്കല്‍ കോളേജില്‍ നിന്നുള്ള ഫോറന്‍സിസ് മെഡിസിന്‍ വിഭാഗം മേധാവി ഡോ. കെ ശശികലയുടെ നേതൃത്വത്തിലുള്ള സംഘമാണ് ഇവിടെ എത്തിയത്
ഫോറന്‍സിക് പരിശോധനയുടെ ഫലം ഉടന്‍തന്നെ അന്വേഷണ സംഘത്തിന് കൈമാറും. അതേസമയം പ്രദേശത്ത് ശിശുമനശാസ്ത്രജ്ഞരെ എത്തിച്ച് കൂടുതല്‍ പരിശോധന നടത്താനാണ് അന്വേഷണസംഘത്തിന്റെ തീരുമാനം.