കേസ് തെളിയിക്കാൻ കേരളത്തിൽ ഇതുവരെ നടപ്പിലാക്കാത്ത പരീക്ഷണത്തിനൊരുങ്ങി ക്രൈം ബ്രാഞ്ച്. കത്തിക്കരിഞ്ഞ മൃതദേഹത്തിന്റെ മുഖം പുനഃസൃഷ്ടിക്കാനുള്ള നീക്കങ്ങളാണ് നടപ്പിലാക്കുന്നത്. കേരളത്തിൽ ഇതാദ്യമായാണ് ഇത്തരമൊരു പരീക്ഷണം നടപ്പിലാക്കുന്നത്.

രണ്ടര വർഷം മുമ്പ് കോഴിക്കോട് പോലൂരിനടത്ത് കത്തിക്കരി‌ഞ്ഞ മൃതദേഹം കണ്ടെത്തിയ സംഭവത്തിൽ അന്വേഷണം ശക്തമാക്കുന്നത്തിന്റെ ഭാഗമായാണ് ക്രൈംബ്രാഞ്ച് ഇത്തരമൊരു നടപടി സ്വീകരിക്കുന്നത്. വെസ്റ്റ്ഹില്‍ ശ്മശാനത്തില്‍ നിന്ന് മൃതദേഹം പുറത്തെടുക്കാനുള്ള നടപടികൾ ക്രൈംബ്രാഞ്ച് ആരംഭിച്ചിരിക്കുകയാണ് . ആധുനിക സാങ്കേതിക വിദ്യയുടെ സഹായത്തോടെ തലയോട്ടിയില്‍ നിന്ന് മുഖം പുനഃസൃഷ്ടിച്ച് മരിച്ചയാളെ കണ്ടെത്തനാണ് അന്വേഷണ സംഘത്തിന്‍റെ നീക്കം.

2017 സെപ്തംബർ പതിനാലിനാണ് പോലൂരിലെ ആളൊഴിഞ്ഞ പറമ്പിൽ നാൽപ്പത് വയസ്സ് പ്രായം തോന്നിക്കുന്ന പുരുഷന്‍റെ മൃതദേഹം കണ്ടെത്തിയത്. മുഖം കത്തി വികൃതമായതിനാൽ ആളെ തിരിച്ചറിയാനായിരുന്നില്ല . കഴുത്തിൽ പ്ലാസ്റ്റിക് കയർ മുറുകിയതാണ് മരണ കാരണമെന്ന് പോസ്റ്റ്മോർട്ടം റിപ്പോര്‍ട്ട് വന്നതോടെ കൊലപാതകമെന്ന നിഗമനത്തില്‍ ചേവായൂര്‍ പൊലീസ് അന്വേഷണം തുടങ്ങി. ഒരു വര്‍ഷം കഴിഞ്ഞിട്ടും അന്വേഷണം എങ്ങുമെത്താത്തതോടെ ക്രൈംബ്രാഞ്ച് ഏറ്റെടുക്കുകയായിരുന്നു . തുടര്‍ന്ന് ഇക്കഴിഞ്ഞ ജനുവരിയില്‍ മൃതദേഹം കണ്ട സ്ഥലത്ത് ഉത്തരമേഖലാ ഐജി ഇ ജെ ജയരാജന്‍റെ നേതൃത്വത്തിലുള്ള അന്വേഷണ സംഘം പരിശോധന നടത്തിയിരുന്നു. ദൃക്സാക്ഷികളുടെ മൊഴിയും ശേഖരിച്ചിരുന്നു.

ഇതിനുശേഷമാണ് ആധുനിക സാങ്കേതിക വിദ്യ ഉപയോഗിച്ച് മുഖം പുനഃസൃഷ്ടിക്കാനുള്ള ശ്രമം നടത്താന്‍ ക്രൈം ബ്രാഞ്ച് തീരുമാനിച്ചത്. തലയോട്ടി ഉപയോഗിച്ച് ഫേഷ്യല്‍ റീ കണ്‍സ്ട്രക്ഷന്‍ സോഫ്റ്റുവെയറിന്‍റെ സഹായത്തോടെ മുഖം പുനഃസൃഷ്ടിക്കുകയാണ് ലക്ഷ്യം. കേരളത്തില്‍ ആദ്യമായാണ് ഈ സാങ്കേതിക വിദ്യ ഉപയോഗിക്കുന്നത്. തുടര്‍ന്ന് രേഖാ ചിത്രം സമൂഹമാധ്യമങ്ങളിലൂടെയടക്കം പ്രചരിപ്പിക്കാനാണ് അന്വേഷണ സംഘത്തിന്‍റെ നീക്കം. ഇതിലൂടെ കൊല്ലപ്പെട്ടയാളുടെ വിവരങ്ങള്‍ ലഭിക്കാനാകുമെന്നാണ് കണക്കുകൂട്ടല്‍. ക്രൈംബ്രാഞ്ച് ഡിവൈഎസ്പി എം ബിനോയിയുടെ നേതൃത്വത്തിലാണ് അന്വേഷണം തുടരുന്നത്.

ഇത്തരമൊരു സാങ്കേതിക വിദ്യ ഉപയോഗിക്കുന്നതിലൂടെ മരണപ്പെട്ടയാളെ കണ്ടെത്താൻ സാധിച്ചാൽ പോലീസ് ഡിപ്പാർട്മെന്റിന് വലിയൊരു തുടക്കമാകും ഇതിലൂടെ ഉണ്ടാകുക. തെളിയിക്കപ്പെടാത്ത കുറ്റകൃത്യങ്ങൾ ഇതിലൂടെ തെളിയിക്കാനാകും. മാത്രമല്ല തിരിച്ചറിയാൻ കഴിയാത്ത മൃത ദേഹങ്ങൾ കണ്ടെത്തുകയാണെങ്കിൽ തുടരന്ന്വേഷണം സാധ്യമാക്കാനും ഇത്തരമൊരു സാങ്കേതിക വിദ്യയിലൂടെ സാധിക്കും. ഇതിലൂടെ അന്വേഷണ നടപടികൾ വേഗത്തിലാക്കാനും സാധിക്കും. മാത്രമല്ല മികച്ച രീതിയിൽ തന്നെ കുറ്റാന്വേഷണം നടത്താനും പൊലീസിന് കഴിയും.