ലോകത്തെയാകെ ഭീതിയിലാഴ്ത്തിയിരിക്കുകയാണ് കോവിഡ് 19. രോഗം പടരാനിരിക്കാനായി കർശന പ്രതിരോധ നടപടികൾ സ്വീകരിച്ചിരിക്കുകയാണ് ആരോഗ്യവകുപ്പ്. അതുകൊണ്ടുതന്നെ ഒറ്റകെട്ടായി രോഗത്തെ പമ്പകകടത്താം എന്ന പ്രതീക്ഷയിൽ തന്നെയാണ് സംസ്ഥാനം. കോവിഡ് 19കക്കൊപ്പം തന്നെ പക്ഷിപ്പനിയും സംസ്ഥാനത്തെ ഏറെ ആശങ്കയിലാക്കിയിരിക്കുകയാണ്.

മുൻകരുതൽ നടപടിയുടെ ഭാഗമായി കോഴിക്കോട് നഗരസഭ മേഖലയിൽ ഭക്ഷണപ്രേമികളുടെ ഇഷ്ട വിഭവമായ കോഴി ഇറച്ചി, ഷവർമ, കുഴിമന്തി എന്നിവയുടെ വിൽപന താൽക്കാലികമായി നിർത്തിവയ്ക്കാൻ ആരോഗ്യ വിഭാഗം നിർദേശം നൽകിയിരിക്കുകയാണ്. ഉദ്യോഗസ്ഥർ സ്ഥാപനങ്ങൾ പരിശോധിച്ചാണു ജാഗ്രതാ നിർദേശം നൽകിയത്. ഇതോടൊപ്പം വഴിയോരങ്ങളിൽ നടത്തുന്ന ഐസ് ഉപയോഗിച്ചുള്ള ശീതള പാനീയങ്ങൾ, പാനി പൂരി, കുൽഫി എന്നിവയുടെ വിൽപനയും താൽക്കാലികമായി തടഞ്ഞു. നഗരസഭ നടപടിയോടു പൂർണമായി സഹകരിക്കുമെന്നു വ്യാപാരികൾ ഉറപ്പു നൽകിയിട്ടുണ്ട്. ഇനി ഒരു അറിയിപ്പ് ഉണ്ടാകുന്നതു വരെ നിർദേശം അനുസരിച്ചു നഗരസഭയുമായി സഹകരിക്കണമെന്നു നഗരസഭ സെക്രട്ടറി പി.ആർ.ജയകുമാർ ആവശ്യപ്പെട്ടു. കോവിഡ്, പക്ഷിപ്പനി ജാഗ്രതയുടെ ഭാഗമായി നഗരസഭാധ്യക്ഷ കെ.കമറുലൈല വിളിച്ചു ചേർത്ത അടിയന്തര യോഗ തീരുമാന പ്രകാരമാണു നടപടി. പരിശോധനയിൽ ഹെൽത്ത് ഇൻസ്പെക്ടർ കെ.എം.സജി, ജെഎച്ച്ഐമാരായ സി.സജീഷ്, എം.ടി.വിനോയ്, പി.എം.സ്മിത എന്നിവർ പങ്കെടുത്തു.

നഗരത്തിലെ ഹോട്ടലുകൾ കോഴി വിഭവങ്ങൾ വിളമ്പുന്നതു തൽക്കാലം നിർത്തി എന്നുതന്നെ പറയാം. പക്ഷിപ്പനിയെക്കുറിച്ചുള്ള പേടി തന്നെയാണ് പ്രധാന കാരണം. നോൺ വെജിറ്റേറിയൻ ഹോട്ടലുകളിലെ പ്രധാന വിഭവമായ കോഴി ബിരിയാണി ഇപ്പോൾ എവിടെയും ഇല്ല. കോഴിയിറച്ചി ഇനി ഒരറിയപ്പുണ്ടാകും വരെ ഉപയോഗിക്കേണ്ടതില്ലെന്നുതന്നെയാണ് ഹോട്ടലുകാരുടെ തീരുമാനം. കോഴിയിറച്ചി വിഭവങ്ങൾ ഇല്ലാതായതോടെ പല ഹോട്ടലുകളിലും കച്ചവടം പകുതിയിൽ താഴെയായി. ഹോട്ടലുകളിൽ എത്തുന്നവരുടെ എണ്ണവും കുറഞ്ഞിട്ടുണ്ട്. കച്ചവടം കുറഞ്ഞതു കാരണം ചില ഹോട്ടലുകൾ പൂട്ടിയിട്ടുമുണ്ട്. ഇറച്ചിവിൽപന തടഞ്ഞതിനാൽ കോഴിക്കടകളും എല്ലാം പൂട്ടി. കോഴികളടക്കം പക്ഷികൾ ചത്തുവീഴാൻ തുടങ്ങിയതോടെ രോഗബാധയ്ക്കു സാധ്യതയുള്ള മേഖലകളിൽ വളർത്തുപക്ഷികളെ കൂട്ടമായി കൊന്നു കത്തിച്ചുകളയുകയാണ്.

അതേസമയം കോവിഡ് 19ന്റെ പശ്ചാത്തലത്തിൽ ആൾകൂട്ടം ഒഴിവാക്കണമെന്ന സർക്കാരിന്റെ കർശന നിർദേശം ഓൺലൈൻ വഴി ഭക്ഷണം ഓർഡർ ചെയ്യുന്നവരുടെ എണ്ണം വർധിപ്പിക്കുമെന്ന വിലയിരുത്തലിനും കനത്ത തിരിച്ചടിയാണ് ഉണ്ടായിരിക്കുന്നത്.

കോവിഡ് 19നും പക്ഷിപ്പനിക്കും പിന്നാലെ 30 ശതമാനത്തിലധികമാണ് ഓൺലൈൻ വഴി ഭക്ഷണം ഓർഡർ ചെയ്യുന്നതിൽ കുറവുണ്ടായത്. രണ്ട് ദിവസത്തിനിടെയാണ് ഇത്രയേറെ ഇടിവ്‌ സംഭവിച്ചിരിക്കുന്നത്. സ്വിഗ്ഗി, സൊമാറ്റോ അടക്കമുള്ള കമ്പനികൾ നല്ല ഓഫറുകൾ നൽകുന്നുണ്ടെങ്കിലും ഓർഡർ നൽകാൻ ഉപഭോക്താക്കൾ തയാറാകുന്നില്ലെന്ന് ഭക്ഷണ വിതരണക്കാർ പറയുന്നു. ഭക്ഷണം വിതരണം ചെയ്യാൻ എത്തുന്നവരിൽ നിന്ന് വൈറസ് പകരാൻ സാധ്യതയുണ്ടെന്ന ഭീതിയാണ് ഇതിൽ പിന്നിലെന്നും വിതരണക്കാർ ചൂണ്ടിക്കാട്ടുന്നു.

കർശന നിയന്ത്രണങ്ങൾ ഈ മാസം അവസാനം വരെ തുടരുമെന്നത് ഓൺലൈൻ ഭക്ഷണ വിതരണ വിപണിയെയും തൊഴിലാളികളെയും ചെറുതായൊന്നുമല്ല പ്രതിസന്ധിയിലാക്കുന്നത്. വരും ദിവസങ്ങളിൽ സംസ്ഥാനത്തെ ഹോട്ടലുകൾ അടച്ചിടുന്ന നിലയിലേക്ക് കാര്യങ്ങൾ പോകുമോ എന്നും ഓൺലൈൻ ഭക്ഷണ വിതരണക്കാർ ആശങ്കപ്പെടുന്നുണ്ട്.