കൊറോണയെ നേരിടാനുള്ള പോരാട്ടത്തിലാണ് ലോകത്തെ മുഴുവനും. ഒറ്റക്കെട്ടായി പൊരുതാൻ ജനങ്ങൾക്കൊപ്പം എല്ലാ രാജ്യങ്ങളിലെയും സർക്കാരും കൂട്ടിനുണ്ട്. അനിയന്ത്രിതമായി പടർന്നുപിടിക്കുന്ന കൊറോണ ഭീഎത്തിയിൽ ലോകജനത ഓരോ ദിനവും തള്ളിനീക്കുമ്പോഴും കൈത്താങ്ങായി സർക്കാർ ഒപ്പം നിൽക്കുകയാണ് ജനങ്ങളോടൊപ്പം. വളരെ കാര്യക്ഷമമായ സംവിധാനങ്ങളാണ് കൊറോണ പ്രതിരോധത്തിനായി ഒരുക്കിയിരിക്കുന്നത്. മികച്ച ആരോഗ്യപ്രവർത്തകരും സജീവമായി തന്നെ രോഗത്തെ നേരിടാൻ മുന്പന്തിയിലുണ്ട്. അത്തരമൊരു വാർത്തയാണ് ഇപ്പോൾ മാധ്യമങ്ങളിൽ ശ്രദ്ധ നേടുന്നത്.

കൊറോണ വ്യാപനത്തിന്റെ പശ്ചാത്തലത്തിൽ ഇപ്പോൾ വിപണിയിൽ ഇപ്പോൾ ആവശ്യക്കാരേറെയുള്ളത് മാസ്ക്കിനാണ്. മാസ്ക്ക് ധരിക്കുന്നതിലൂടെ രോഗം പകരുന്നത് ഒരു പരിധിവരെ തടയാനാകുമെന്നാണ് ഡോക്ടർമാരും അഭിപ്രായപ്പെടുന്നത്. ഇക്കാരണങ്ങൾ കൊണ്ടുതന്നെ മാസ്ക്കിന് വിപണിയിൽ ഇപ്പോൾ ഉയർന്ന മൂല്യമാണുള്ളത്. എന്നാൽ ആവശ്യക്കാരേറിയപ്പോൾ മാസ്ക്കിനു വിപണിയിൽ ക്ഷാമവും നേരിടുകയാണ്. എന്നാലിനി മാസ്ക്ക് കിട്ടാനില്ലെന്ന പേടി വേണ്ട.

പൂജപ്പുര സെന്‍ട്രല്‍ ജയിലില്‍ തുണി മാസ്കുകള്‍ തയ്യാറാക്കി . കൊറോണ വൈറസ് ഭീതി വ്യാപിച്ചതോടെ സംസ്ഥാനത്ത് മാസ്കുകള്‍ക്ക് വലിയ തോതില്‍ ക്ഷാമം അനുഭവപ്പെട്ടിരുന്നു. മാസ്കിന് ആവശ്യക്കാരേറിയപ്പോള്‍ വിലയും കൂടി. പലയിടത്തും പല വിലയാണ് ഈടാക്കുന്നത്. ഈ സാഹചര്യത്തിലാണ് ജയിലുകളില്‍ മാസ്ക് നിര്‍മ്മാണം ആരംഭിച്ചത്. ജയിലില്‍ രണ്ടു ദിവസം കൊണ്ട് 2000 ത്തോളം മാസ്കുകളാണ് തയ്യാറാക്കിയത്. രാവും പകലുമായി ജയിലിലെ 20 ഓളം അന്തേവാസികളുടെ കഠിനശ്രമത്തിന്റെ ഫലമാണ് ചുരുങ്ങിയ സമയം കൊണ്ട് ഇത്രത്തോളം ഉണ്ടാക്കാന്‍ സാധിച്ചത്. രണ്ടു കളറുകളിലായി ടൂ ബൈ തുണികള്‍ ഉപയോഗിച്ചാണ് മാസ്കുകള്‍ തയ്യാറാക്കുന്നത്. ഒരുമീറ്റര്‍ തുണി കൊണ്ട് 10 ഓളം മാസ്കുകള്‍ നിര്‍മ്മിക്കാനാകും.

കൂടാതെ രണ്ടു ലെയറുകളിലായി വീണ്ടും ഉപയോഗിക്കാന്‍ പറ്റുന്ന തരത്തിലാണ് മാസ്കുകള്‍. ഇവയ്ക്ക് 10 രൂപയില്‍ താഴെയായിരിക്കും വിലയെന്ന് അധിക‌ൃതര്‍ അറിയിച്ചു. ദക്ഷിണ മേഖല ഡി.ഐ.ജി അജയകുമാ‌ര്‍, ജയില്‍ ജോയിന്‍ സൂപ്രണ്ട് ബിനോദ് ജോര്‍ജ്ജ്, ബി.സുനില്‍ കുമാര്‍, എഡിസ്റ്റര്‍ ജോയി എന്നിവരുടെ നേതൃത്വത്തിലാണ് മാസ്കുകള്‍ തയ്യാറാക്കുന്നത്. മാസ്ക് നിര്‍മ്മാണം ആരംഭിച്ചതോടെ ജയിലിലെ മറ്റ് തയ്യല്‍ യൂണിറ്റുകളുടെ പ്രവര്‍ത്തനം താത്കാലികമായി നിറുത്തിവച്ചു. കണ്ണൂര്‍, വിയ്യൂര്‍ ജയിലുകളിലും മാസ്ക് നിര്‍മ്മാണം ആരംഭിച്ചിട്ടുണ്ട്. നിര്‍മ്മാണം പൂര്‍ത്തികരിച്ച മാസ്കുകള്‍ ആവശ്യാനുസരണം ആരോഗ്യവകുപ്പിന് കൈമാറും.