വാനനിരീക്ഷകര്‍ക്ക് കൗതുകംപകരുവാൻ മാര്‍ച്ച്‌, ഏപ്രില്‍, മേയ് മാസങ്ങളില്‍ ഗ്രഹങ്ങള്‍ വിസ്മയക്കാഴ്ച . കാണുവാൻ തയ്യാറായി ഏവരും. വരും ദിവസങ്ങള്‍ മുതല്‍ ബുധന്‍, ശുക്രന്‍, ചൊവ്വ, വ്യാഴം, ശനി എന്നീ ഗ്രഹങ്ങളെ നഗ്നനേത്രംകൊണ്ട് കാണാനാണ് ഇപ്പോൾ അവസരമൊരുങ്ങുന്നത്. മേയ് അവസാനം വരെ ആകാശത്ത് ഇവ തെളിഞ്ഞുനില്‍ക്കുന്ന കാഴ്ച്ചയാണ് കാണാൻ സാധിക്കുന്നത്. അവധി നേരത്തേയെത്തിയതിനാല്‍ കുട്ടികള്‍ക്കും ഇത് സുവർണ്ണാവസരമാണ്. സന്ധ്യാസമയത്ത് ആകാശത്തിന്റെ പടിഞ്ഞാറുവശത്ത് പരമാവധി 48 ഡിഗ്രി ഉയരത്തിലാണ് ശുക്രനെ കാണാൻ സാധിക്കും . തുടര്‍ന്നുള്ള ദിവസങ്ങളില്‍ ശുക്രന്റെ ഉയരം കുറഞ്ഞുവരുന്ന കാഴ്ച്ചയും കാണാം . മേയ് അവസാനത്തോടെ ദൃഷ്ടിപഥത്തില്‍നിന്നും ഇത് മറയുകയും ചെയ്യും.

പിന്നീട് കിഴക്കന്‍ ചക്രവാളത്തിലായിരിക്കും ശുക്രന്‍ കാണപ്പെടുന്നത് . മാര്‍ച്ച്‌ 28നും ഏപ്രില്‍ 26നും ഇടയില്‍ ചന്ദ്രനെയും ശുക്രനെയും ഒന്നിച്ചും കാണാൻ സാധിക്കും. ബുധന്‍, ചൊവ്വ, വ്യാഴം, ശനി എന്നീ ഗ്രഹങ്ങളെ കിഴക്ക്, തെക്ക് ഭാഗത്തായി പുലര്‍ച്ചെ നാലുമുതല്‍ സൂര്യോദയംവരെ നഗ്നനേത്രംകൊണ്ട് നിരീക്ഷിക്കാന്‍ സാധിക്കും. 19 മുതല്‍ ചൊവ്വ, വ്യാഴം, ശനി എന്നീ ഗ്രഹങ്ങള്‍ വളരെ അടുത്തടുത്തായി നില്‍ക്കുന്നത് കാണാം. ചൊവ്വ ഏറ്റവും മുകളിലും വ്യാഴം മധ്യത്തിലും ശനി ഏറ്റവും താഴെയുമാണ് കാണുന്നത്. തുടര്‍ന്നുള്ള ദിവസങ്ങളില്‍ ചെറിയ സ്ഥാനവ്യത്യാസത്തോടെ മേയ് വരെ ഈ ഗ്രഹങ്ങള്‍ രാവിലെ ആകാശത്തിന്റെ കിഴക്കുഭാഗത്തു കാണാനും സാധിക്കും. ഏറ്റവും ചെറിയഗ്രഹമായ ബുധന്‍ ഈ ഗ്രഹത്രയങ്ങള്‍ക്ക് താഴെയായി 21നും 22നും ചന്ദ്രനോടൊപ്പം കാണാനാകുമെന്നും ഗവേഷകര്‍ വ്യക്തമാക്കി. ആകാശത്തെ അദ്ഭുതക്കാഴ്ചകള്‍ കാണാന്‍ പയ്യന്നൂര്‍ വാനനിരീക്ഷണകേന്ദ്രത്തില്‍ അവസരമൊരുക്കിയിട്ടുണ്ടെന്നും ഡയറക്ടര്‍ ഗംഗാധരന്‍ വെള്ളൂര്‍ പറഞ്ഞു. ഫോണ്‍: 9446680876