കടകള്‍ തുറക്കാം: കേരളത്തില്‍ ഹോട്‌സ്‌പോട്ടുകള്‍ ഒഴികെയുള്ള ഇടങ്ങളില്‍
കേരളത്തില്‍, കേന്ദ്ര നിര്‍ദേശങ്ങളുടെ അടിസ്ഥാനത്തില്‍ ഇളവുകള്‍ വ്യക്തമാക്കി ചീഫ് സെക്രട്ടറി ഉത്തരവിറക്കി. ഹോട്‌സ്‌പോട്ടുകള്‍ ഒഴികെയുള്ള സ്ഥലങ്ങളിലെ കടകള്‍ തുറക്കുമെന്നു മുഖ്യമന്ത്രി പിണറായി വിജയന്‍ അറിയിച്ചു.
മള്‍ട്ടി ബ്രാന്‍ഡ്, സിംഗിള്‍ ബ്രാന്‍ഡ് മാളുകള്‍ തുറക്കാന്‍ അനുമതിയില്ല. ഗ്രാമപഞ്ചായത്ത് പ്രദേശങ്ങളില്‍ ഷോപ്‌സ് ആന്‍ഡ് എസ്റ്റാബ്ലിഷ്‌മെന്റ് നിയമം അനുസരിച്ചു രജിസ്റ്റര്‍ ചെയ്ത മുഴുവന്‍ കടകളും തുറക്കാം. (തദ്ദേശ സ്ഥാപനങ്ങളില്‍നിന്നു ലൈസന്‍സ് വാങ്ങുന്ന എല്ലാ വ്യാപാരവാണിജ്യ സ്ഥാപനങ്ങളും ഷോപ്‌സ് ആന്‍ഡ് എസ്റ്റാബ്ലിഷ്‌മെന്റ് നിയമത്തിനുകീഴില്‍ വരും ഫാക്ടറീസ് ആക്ടിനു കീഴിലുള്ളവ ഒഴികെ). റസിഡന്‍ഷ്യല്‍, മാര്‍ക്കറ്റ് കോംപ്ലക്‌സുകളിലെ കടകളും തുറക്കാം.
മുനിസിപ്പാലിറ്റി, കോര്‍പറേഷന്‍ പരിധിക്കുള്ളില്‍ മള്‍ട്ടി ബ്രാന്‍ഡ്, സിംഗിള്‍ ബ്രാന്‍ഡ് മാളുകള്‍, മാര്‍ക്കറ്റ് കോംപ്ലക്‌സുകളിലെ കടകള്‍ എന്നിവ തുറക്കാന്‍ പാടില്ല. ഷോപ്‌സ് ആന്‍ഡ് എസ്റ്റാബ്ലിഷ്‌മെന്റ് നിയമം അനുസരിച്ചു റജിസ്റ്റര്‍ ചെയ്ത മറ്റെല്ലാ കടകളും തുറക്കാം. ഷോപ്പിങ് കോംപ്ലക്‌സുകളും തുറക്കാം.
തുറക്കുമ്പോള്‍ കട വൃത്തിയാക്കണം; അണുമുക്തമാക്കണം. പരമാവധി 50% ജീവനക്കാര്‍. എല്ലാവരും മാസ്‌ക് ധരിക്കണം. അകലം പാലിക്കണം.
പൊതുഗതാഗതം, ആരാധനാലയങ്ങള്‍, വിദ്യാഭ്യാസ സ്ഥാപനങ്ങള്‍, ചന്തകള്‍, സിനിമാ തിയറ്റര്‍, ഷോപ്പിങ് മാളുകള്‍ തുടങ്ങിയവയ്ക്കുള്ള നിയന്ത്രണം തുടരും. ഇത് മേയ് 3 കഴിഞ്ഞും നീട്ടിയേക്കും. ജിംനേഷ്യം, സ്‌പോര്‍ട്‌സ് കോംപ്ലക്‌സ്, സ്വിമ്മിങ് പൂള്‍, വിനോദ പാര്‍ക്കുകള്‍, ബാറുകള്‍, ഓഡിറ്റോറിയങ്ങള്‍, സമ്മേളന ഹാളുകള്‍ തുടങ്ങിയവയും പ്രവര്‍ത്തിക്കില്ല.
റെഡ് സോണ്‍ ജില്ലകളിലെ ഹോട്സ്‌പോട്ട് ഒഴികെയുള്ള സ്ഥലങ്ങളില്‍ ഈ ഇളവുകള്‍ അനുവദിക്കുന്നതു സംബന്ധിച്ച് അതത് കലക്ടര്‍മാര്‍ക്കു തീരുമാനിക്കാം. ഹോട്സ്‌പോട്ടില്‍ ഒരു ഇളവും ലഭിക്കില്ല. ബാര്‍ബര്‍ ഷോപ്പ്, റസ്റ്ററന്റ്, ജിംനേഷ്യം എന്നിവയ്ക്കുള്ള നിയന്ത്രണം തുടരും.
https://www.facebook.com/Malayalivartha
