കോവിഡ് ലോക്ഡൗൺ കാലത്ത് ബസ് ഉൾപ്പെടെയുള്ള പൊതുഗതാഗതം അനുവദിക്കില്ലെന്നു സർക്കാർ. കഴിഞ്ഞദിവസം പുറത്തിറക്കിയ ലോക്ഡൗൺ മാർഗനിർദേശങ്ങളുടെ ഉത്തരവിൽ 13.3–ാം ഖണ്ഡിക ഭേദഗതി വരുത്തി. ഇതുപ്രകാരം ഒരു വിധത്തിലുള്ള പൊതുഗതാഗത സംവിധാനങ്ങളും പ്രവർത്തിക്കില്ല.

ലോക്ക് ഡൗൺ മേയ് മൂന്നിന് ശേഷം നീട്ടിയില്ലെങ്കിൽ കേരളത്തിന്റെ നിലവിലെ സാഹചര്യം പരിഗണിച്ച് പൊതുഗതാഗത സംവിധാനത്തിൽ ഇളവ് വേണമെന്ന് സംസ്ഥാന സ‌ർക്കാർ കേന്ദ്രത്തോട് ആവശ്യപ്പെടും. കൊവിഡ് വ്യാപനം തടഞ്ഞു നിറുത്താനും മറ്റ് സംസ്ഥാനങ്ങളെക്കാൾ മെച്ചപ്പെട്ട സാഹചര്യം കേരളത്തിൽ നിലവിലുള്ളതുകൊണ്ടുമാണ് കെ.എസ്.ആർ.ടി.സി ബസുകളടക്കം ഓടിക്കുന്നതിൽ പ്രത്യേക ഇളവ് വേണമെന്ന് കേന്ദ്ര സർക്കാരിനോട് ആവശ്യപ്പെടാൻ സംസ്ഥാന ഗതാഗത വകുപ്പ് ഒരുങ്ങുന്നത്. 28ന് കേന്ദ്ര ഉപരിതല ഗതാഗത വകുപ്പ് മന്ത്രി നിതിൻ ഗഡ്‌കരി എല്ലാ സംസ്ഥാനങ്ങളിലെയും ഗതാഗത മന്ത്രിമാരുമായി വീഡിയോ കോൺഫറൻസ് വഴി ചർച്ച നടത്തുന്നുണ്ട്. ഈ യോഗത്തിൽ കേരളത്തിന്റെ ആവശ്യം കേന്ദ്രത്തെ അറിയിക്കുമെന്ന് ഗതാഗത വകുപ്പ് മന്ത്രി എ.കെ ശശീന്ദ്രൻ പറഞ്ഞു.

കൊവിഡ്-19 നിയന്ത്രണങ്ങള്‍ കഴിഞ്ഞ് സര്‍വീസിനിറക്കിയാലും നഷ്ടകണക്കാവുമെന്ന് തിരിച്ചറിഞ്ഞ് സ്വകാര്യ ബസുകള്‍ കൂട്ടത്തോടെ ഗ്യാരേജിലേക്ക്. നിലവിലെ പെര്‍മിറ്റ് അനുസരിച്ച് ബസില്‍ 46 പേര്‍ ഇരുന്നും 11 പേര്‍ നിന്നും യാത്ര ചെയ്യാം. എന്നാല്‍ നില്‍ക്കുന്ന യാത്രക്കാരുടെ എണ്ണം നോക്കാറില്ല. കൊവിഡിന്‍റെ പശ്ചാത്തലത്തില്‍ സീറ്റില്‍ ഒരാള്‍ എന്ന നിബന്ധന വന്നാല്‍ 20 പേര്‍ക്കെ യാത്ര ചെയ്യാന്‍ കഴിയു. ഭീതിമൂലം യാത്രക്കാരും ബസില്‍ കയറാന്‍ മടിച്ചേക്കും. ഈ ഘട്ടത്തില്‍ ഡീസല്‍ ചെലവും ജീവനക്കാരുടെ ശമ്പളവും പോലും കളക്ഷനായി ലഭിക്കില്ല. അതിനാല്‍ വണ്ടി നിയമപ്രകാരം നിര്‍ത്തിയിട്ട് ചെലവ് ചുരുക്കുകയാണ് ലക്ഷ്യം.

സാമൂഹിക അകലം പാലിക്കേണ്ടിവരുന്നത് വരെ ബസ് ചാര്‍ജ് വര്‍ധിപ്പിക്കണമെന്ന് ഗതാഗതവകുപ്പ് സര്‍ക്കാരിനോട് ശുപാര്‍ശ ചെയ്തു. ലോക്ഡൗണിന് ശേഷം സര്‍വീസ് നടത്തുമ്പോഴുള്ള നഷ്ടം കുറയ്ക്കാന്‍ ബസുകള്‍ക്ക് റോഡ് നികുതിയിലോ ഇന്ധനനികുതിയിലോ ഇളവ് നല്‍കണമെന്നും മുഖ്യമന്ത്രിയോട് ആവശ്യപ്പെട്ടിട്ടുണ്ട്.

മൂന്നിലൊന്ന് യാത്രക്കാരേ പാടുള്ളു എന്നിരിക്കെ ഒരു ബസ് ഒാടിയിരുന്ന സ്ഥാനത്ത് മൂന്ന് ബസുകള്‍ സര്‍വീസ് നടത്തേണ്ടിവരും. ഒരു ദിവസം 64 ലക്ഷം രൂപയുടെ നഷ്ടമുണ്ടാകും. ഒന്നുകില്‍ ഈ തുക സര്‍ക്കാര്‍ നല്‍കണം. അല്ലെങ്കില്‍ നഷ്ടം നികത്താന്‍ കഴിയുന്ന തരത്തില്‍ ടിക്കറ്റ് ചാര്‍ജ് കൂട്ടുകയും സംസ്ഥാന സര്‍ക്കാര്‍ ഈടാക്കുന്ന ഇന്ധന നികുതിയില്‍ ഇളവ് നല്‍കുകയും വേണം.

ബസ് ചാർജ്ജ് വർധന സർക്കാറിെൻറ അജണ്ടയിലില്ലെന്ന് ഗതാഗത വകുപ്പ് മന്ത്രി എ.കെ. ശശീന്ദ്രൻ. ചാർജ്ജ് വർധനക്ക് ഗതാഗത വകുപ്പ് ശിപാർശ നൽകിയിട്ടില്ല. വകുപ്പിന് ഏകപക്ഷീയമായി ചാർജ്ജ് വർധിപ്പിക്കാനുള്ള തീരുമാനമെടുക്കാനാവില്ല. ജസ്റ്റിസ് രാമചന്ദ്രൻ കമ്മിറ്റി റിപ്പോർട്ട് പരിഗണിച്ചാൽ മാത്രമേ ഇക്കാര്യത്തിൽ തീരുമാനമെടുക്കാനാവൂ. കെ.എസ്.ആർ.ടി.സി ജീവനക്കാരുടെ ശമ്പളം യഥാസമയം നൽകാൻ കഴിയുമെന്നാണ് പ്രതീക്ഷിക്കുന്നതെന്നും മന്ത്രി പറഞ്ഞു. ‘മീഡിയ വൺ‘ ചാനലിന് നൽകിയ പ്രതികരണത്തിലാണ് മന്ത്രി ഇക്കാര്യമറിയിച്ചത്.

കൊവിഡ് മാനദണ്ഡങ്ങൾ പാലിച്ച് എല്ലാവിധ സുരക്ഷാസംവിധാനങ്ങളും ഒരുക്കിയാവും പൊതുഗതാഗത സംവിധാനം ഏർപ്പെടുത്തുക. കേന്ദ്ര അനുമതി ലഭിച്ചാൽ കർശന നിയന്ത്രണങ്ങൾ തുടരുന്ന റെഡ് സോണുകളും ഹോട്ട് സ്പോട്ട് പ്രദേശങ്ങളെയും ഒഴിവാക്കിയാവും ബസുകൾ ഓടിക്കുക.നേരത്ത കർശന നിയന്ത്രണങ്ങളോടെ സംസ്ഥാനത്ത് പൊതുഗതാഗതം ആരംഭിക്കാമെന്ന് ധാരണയായിരുന്നെങ്കിലും കേന്ദ്ര സർക്കാർ അനുമതി നൽകിയിരുന്നില്ല. ലോക്ക് ഡൗണിന്റെ രണ്ടാംഘട്ടം കൂടി പിന്നിടുന്നതോടെ കൊവിഡ് നിയന്ത്രണത്തിൽ കേരളത്തിന് കാര്യമായ മുന്നേറ്റം ഉണ്ടാക്കാൻ കഴിയുമെന്ന വിലയിരുത്തലുണ്ട്.ലോക്ക് ഡൗൺ നിയന്ത്രണങ്ങളിൽ നിന്ന് പൊതുഗതാഗതത്തിന് ഇളവ് ആവശ്യപ്പെട്ട് കൊണ്ടുള്ള നിർദ്ദേശം സംസ്ഥാനം കേന്ദ്രത്തിന് മുന്നിൽ സമർപ്പിക്കുമെന്ന് ഗതാഗത മന്ത്രി പറഞ്ഞു.കേന്ദ്രമന്ത്രി വിളിച്ച യോഗത്തിന്റെ അജണ്ട നാളെ മാത്രമെ കിട്ടുകയുള്ളൂ. ലോക്ക്ഡൗൺ കഴിയുന്ന മുറയ്ക്ക് ഗതാഗത സംവിധാനത്തിൽ വരുത്തുന്ന ഇളവുകളെ സംബന്ധിച്ചാകും യോഗമെന്നാണ് സംസ്ഥാന സർക്കാർ കരുതുന്നത്. 28ലെ യോഗം കഴിയുന്നതോടെ കെ.എസ്.ആർ.ടി.സി ഉൾപ്പെടെയുളളവയുടെ സർവീസ് സംബന്ധിച്ച കാര്യങ്ങളിൽ കേന്ദ്ര സർക്കാർ വ്യക്തത വരുത്തമെന്നാണ് സർക്കാർ കണക്കുകൂട്ടലെന്ന് മന്ത്രി പറഞ്ഞു.