പുതുതായി 6 പേര്‍ക്കു കൂടി കോവിഡ് 19 സ്ഥിരീകരിച്ചതോടെ ഇടുക്കി ആശങ്കയുടെ 'ഹൈ'റേഞ്ചില്‍. നിലവില്‍ 10 പേരാണ് രോഗം സ്ഥിരീകരിച്ച് ആശുപത്രി ഐസലേഷന്‍ വാര്‍ഡില്‍ കഴിയുന്നത്. ജില്ലയില്‍ ഇതുവരെ കോവിഡ് സ്ഥിരീകരിച്ചത് 20 പേര്‍ക്കാണ്. ഇതില്‍ 10 പേര്‍ രോഗമുക്തരായി. വിദേശത്തു നിന്ന് എത്തിയവര്‍, തമിഴ്‌നാട് ഉള്‍പ്പെടെയുള്ള മറ്റു സംസ്ഥാനങ്ങളില്‍ പോയി വന്നവര്‍, മറ്റു ജില്ലയില്‍ നിന്ന് എത്തിയവര്‍, ഇവരുമായി സമ്പര്‍ക്കം പുലര്‍ത്തിയവര്‍ എന്നിവര്‍ക്കാണു രോഗബാധ കണ്ടെത്തിയിട്ടുള്ളത്. ഏലപ്പാറയിലെ വനിതാ ഡോക്ടര്‍ക്കും ആശാ പ്രവര്‍ത്തകയ്ക്കും കോവിഡ് ബാധിച്ചത് സമ്പര്‍ക്കം വഴി. കഴിഞ്ഞ ദിവസം കോവിഡ് സ്ഥിരീകരിച്ച വീട്ടമ്മ 15ന് ഏലപ്പാറ ഗവ. ആശുപത്രിയില്‍ ചുമ ബാധിച്ച് എത്തിയിരുന്നു. ഇവരെ ചികിത്സിച്ചത് ഇപ്പോള്‍ കോവിഡ് ബാധിതയായ ഡോക്ടറാണ്. ഇവര്‍ക്കു ചീട്ട് എഴുതി നല്‍കിയത് ആശുപത്രിയിലെ ആശാ വര്‍ക്കറായിരുന്നു. ഡോക്ടറുടെ വീട്ടില്‍ മാതാവും 12 വയസ്സുള്ള മകനുമുണ്ട്. ആശാ പ്രവര്‍ത്തകയുടെ വീട്ടില്‍ മകനും മകളുമാണുള്ളത്. ഇവരും നിരീക്ഷണത്തിലാണ്.

സ്പെയിനില്‍ നിന്നു മടങ്ങിയെത്തിയ ഇരട്ടയാര്‍ നത്തുകല്ല് സ്വദേശിയായ യുവാവിന് ക്വാറന്റീന്‍ കാലാവധി പൂര്‍ത്തിയാക്കിയ ശേഷമാണ് കൊറോണ സ്ഥിരീകരിച്ചത്. അതും വിദേശത്തുനിന്നെത്തി 40 ദിവസത്തിനു ശേഷം. സ്പെയിനില്‍ പഠിച്ചുകൊണ്ടിരുന്ന യുവാവ് മാര്‍ച്ച് 15നാണ് നാട്ടില്‍ എത്തിയത്. തുടര്‍ന്ന് ആരോഗ്യ പ്രവര്‍ത്തകരെ ബന്ധപ്പെട്ടു. 28 ദിവസം ക്വാറന്റീനില്‍ കഴിഞ്ഞു.പിന്നീടും അധികം സമ്പര്‍ക്കം ഉണ്ടായിട്ടില്ല. ഇക്കാലയളവില്‍ രോഗലക്ഷണങ്ങള്‍ ഉണ്ടായില്ല. അതിനു ശേഷമാണ് മാര്‍ച്ചില്‍ വിദേശത്തു നിന്ന് എത്തിയ ഇരട്ടയാര്‍ പഞ്ചായത്ത് പരിധിയിലെ എല്ലാവരുടെയും സ്രവം പരിശോധനയ്ക്കു ശേഖരിച്ചത്. മാതാപിതാക്കളെയും നിരീക്ഷണത്തിലാക്കും. കുടുംബാംഗങ്ങളുടെ സ്രവം പരിശോധിക്കും.

രോഗം സ്ഥിരീകരിച്ചവരുടെ വിവരം
1. വണ്ടന്‍മേട് സ്വദേശി (24): മലപ്പുറത്ത് നിന്നു മാര്‍ച്ച് 23ന് പനി ലക്ഷണങ്ങളോടെ വീട്ടില്‍ എത്തി. ബൈക്കിലാണു വന്നത്. തുടര്‍ന്ന് വീട്ടില്‍ കഴിയുകയായിരുന്നു.
2. ഉപ്പുകണ്ടം സ്വദേശി (50): ഇരട്ടയാര്‍ പഞ്ചായത്തിലെ ഉപ്പുകണ്ടം സ്വദേശിയായ 50കാരന്‍ കഴിഞ്ഞ മാര്‍ച്ച് 15ന് ജര്‍മനിയില്‍ നിന്നു സ്‌പെയിനിലൂടെ അബുദാബി വഴി നാട്ടിലെത്തി. രോഗ ലക്ഷണങ്ങളൊന്നും ഇല്ലായിരുന്നു. വിദേശത്ത് നിന്നു വന്നതുകൊണ്ട് സാധാരണ രീതിയില്‍ സ്രവം പരിശോധിച്ചപ്പോഴാണു രോഗം സ്ഥിരീകരിച്ചത്.
3. വനിതാ ഡോക്ടര്‍ (41): ഏലപ്പാറ പിഎച്ച്‌സിയിലെ ഡോക്ടര്‍. മൈസൂരുവില്‍ നിന്നു വന്ന് രോഗബാധിതനായ വ്യക്തിയുടെ അമ്മയില്‍ നിന്നാണു ഡോക്ടര്‍ക്ക് രോഗം പകര്‍ന്നതെന്ന് കരുതുന്നു. കഴിഞ്ഞ ദിവസം രോഗം സ്ഥിരീകരിച്ച ഇവര്‍ ഏലപ്പാറ പിഎച്ച്‌സിയില്‍ ചികിത്സ തേടിയിരുന്നു.
4. ഏലപ്പാറ സ്വദേശി (54): ഇവര്‍ കഴിഞ്ഞ ദിവസം രോഗം ബാധിച്ച സ്ത്രീയുടെ വീട്ടില്‍ പാലും മുട്ടയും കൊടുക്കുന്നുണ്ടായിരുന്നു.
5. വണ്ടിപ്പെരിയാര്‍ സ്വദേശി(35): ഇയാള്‍ തമിഴ്‌നാട്ടിലെ തിരുനെല്‍വേലിയില്‍ പോയി ഏപ്രില്‍ 12 ന് വീട്ടില്‍ വന്നു.
6. 7 വയസ്സുകാരി: രോഗം സ്ഥിരീകിച്ച വണ്ടിപ്പെരിയാര്‍ സ്വദേശിയുടെ മകള്‍.