ലോക്ക് ഡൗണും കൊവിഡ് വ്യാപനവും കാരണം ആളും ആരവും ഒഴിഞ്ഞ കൂടാരത്തില്‍ പട്ടിണിയിലായി ഒരു കൂട്ടം സര്‍ക്കസ് കലാകാരന്മാരും മൃഗങ്ങളും. ലോക്ക്ഡൗണ്‍ കാരണം ദുരിതത്തിലായ മലപ്പുറം ജില്ലയിലെ കോട്ടക്കല്‍ പുത്തൂര്‍ പാടത്ത് താമസമാക്കിയ സര്‍ക്കസ് കലാകാരന്മാര്‍ക്ക് ലുലു ഗ്രൂപ്പ് ചെയര്‍മാന്‍ എംഎ യൂസഫലി സഹായഹസ്തവുമായി രംഗത്തെത്തിയത് ആശ്വാസമായിരിക്കുകയാണ്.

ഒരു മാസത്തെ ഭക്ഷണത്തിനുള്ള വസ്തുക്കളും മൂന്ന് ലക്ഷം രൂപയും സര്‍ക്കസ് മാനേജ്‌മെന്റിന് ലുലു ഗ്രൂപ്പ് പ്രതിനിധി കൈമാറി. ലോക്ക് ഡൗണ്‍ കാലത്ത് നൂറോളം കലാകാരന്മാരും പക്ഷിമൃഗാദികളും സര്‍ക്കസ് കൂടാരത്തില്‍ പ്രയാസം അനുഭവിച്ചുവരുന്ന വാര്‍ത്ത എംഎ യൂസഫലി അറിഞ്ഞത് മാധ്യമ വാര്‍ത്തകളിലൂടെയാണ്.

ഇതോടെ അദ്ദേഹത്തിന്റെ നിര്‍ദേശ പ്രകാരം ഒരുമാസത്തേക്കുള്ള ഭക്ഷണസാധനങ്ങളുമായി ലുലു ഗ്രൂപ്പിന്റെ വാഹനം പുത്തൂര്‍ പാടത്തുള്ള സര്‍ക്കസ് കൂടാരത്തിലേക്ക് പാഞ്ഞെത്തുകയായിരുന്നു. നിറകണ്ണുകളോടെയാണ് ലുലു ഗ്രൂപ്പിന്റെ സ്‌നേഹ സമ്മാനം കലാകാരന്മാര്‍ ഏറ്റുവാങ്ങിയത്. കൊടും ചൂടിലും സര്‍ക്കസ് അഭ്യാസങ്ങളിലൂടെ കാണികളെ രസിപ്പിച്ചിരുന്ന കലാകാരന്മാര്‍ ദുരിതത്തിലായത് അറിഞ്ഞ ലുലു ഗ്രൂപ്പ് ചെയര്‍മാന്‍ എംഎ യൂസഫലി പ്രശ്‌നത്തിന് പരിഹാരം കാണാന്‍ ജീവനക്കാരോട് നിര്‍ദേശിക്കുകയായിരുന്നു.

ഭക്ഷ്യവസ്തുക്കള്‍ക്ക് പുറമെ 3 ലക്ഷം രൂപയുടെ ധനസഹായവും ലുലു ഗ്രൂപ്പ് കൈമാറി. മൃഗങ്ങള്‍ക്കും പക്ഷികള്‍ക്കും ആവശ്യമുള്ള പ്രത്യേക ഭക്ഷണസാധനങ്ങളും ഇക്കൂട്ടത്തിലുണ്ട്.