രാത്രി കടയുടെ ഭിത്തി തുരന്ന് മോഷ്ടിച്ച കള്ളന്‍ പിറ്റേന്ന് പകല്‍ തൊഴിലാളിയായെത്തി ചുമര്‍ അടച്ച്‌ കൂലിവാങ്ങി കൂളായി സ്ഥലംവിടുകയും ചെയ്തു. മോഷണക്കേസില്‍ അറസ്റ്റിലായ രണ്ടത്താണി അച്ചിപ്ര മേലേതില്‍ അബ്ദുള്‍ സമദിനെ ചോദ്യം ചെയ്തപ്പോഴാണ് ഇക്കാര്യം വെളിപ്പെടുത്തിയത്. പുത്തനത്താണിയിലെ ഭാഗ്യധാരാ ലോട്ടറിക്കടയിലായിരുന്നു സംഭവം. മോഷ്ടാവ് തുരന്ന കടയുടെ ചുമര്‍ ശരിയാക്കാന്‍ ഒരാളെത്തേടിനടന്ന കടക്കാരന്‍ അതിനായി കണ്ടെത്തിയത് പുകയില്ലാത്ത അടുപ്പുണ്ടാക്കുന്ന അബ്ദുള്‍ സമദിനെയായിരുന്നു.

അബ്ദുള്‍ സമദ് ചുമരിലെ ദ്വാരമടച്ച്‌ കൂലിയും വാങ്ങി. കവര്‍ച്ചക്കേസുകളില്‍ അറസ്റ്റിലായി ജയിലിലായ സമദിനെ കല്‍പ്പകഞ്ചേരി സി ഐ ഷൈജു ചോദ്യംചെയ്യാനും തെളിവെടുപ്പിനുമായി കസ്റ്റഡിയിലെടുത്തപ്പോഴാണ് ഇക്കാര്യം വെളിപ്പെടുത്തിയത്. ചുമര്‍തുരന്ന് കടയുടെ അകത്തുകയറുക, തെളിവുനശിപ്പിക്കാനും വിരലടയാളം ലഭിക്കാതിരിക്കാനും കടയ്ക്കുള്ളില്‍ തീയിടുക എന്നിവ സമദിന്റെ തന്ത്രമാണ്.

പുത്തനത്താണിയിലും രണ്ടത്താണിയിലുമായി കടകള്‍ കുത്തിത്തുറന്നതിന് ആറുകേസുകള്‍ സമദിന്റെ പേരിലുണ്ട്. രണ്ടു ലോട്ടറിക്കടകള്‍ക്ക് പുറമെ, തുണിക്കട, ജൂവലറി എന്നിവിടങ്ങളിലാണ് സമദ് കവര്‍ച്ച നടത്തിയത്.