പരസ്യം നല്‍കി നോട്ടിരട്ടിപ്പ് തട്ടിപ്പ് നടത്തുന്ന സംഘം ചങ്ങരംകുളം പോലീസിന്റെ പിടിയിലായി. വളയംകുളം സ്വദേശിയുടെ പരാതിയില്‍ കണ്ണൂര്‍ ശ്രീകണ്ഠാപുരം തട്ടാപ്പറമ്പില്‍ ഷിബു(45) തലശ്ശേരി ഏറഞ്ചേരി വീട്ടില്‍ സുബിന്‍(40) എന്നിവരെയാണ് ചങ്ങരംകുളം സി.ഐ. ബഷീര്‍ ചിറക്കലിന്റെ നേതൃത്വത്തിലുള്ള അന്വേഷണസംഘം പിടികൂടിയത്. അഞ്ചുമാസം മുമ്പാണ് കേസിനാസ്പദമായ സംഭവം.

ബിസിനസില്‍ പങ്കാളിയാക്കാം എന്ന പരസ്യം നല്‍കി വളയംകുളം സ്വദേശി അബൂബക്കറില്‍നിന്ന് ഒരു കോടി രൂപ വാഗ്ദാനം ചെയ്ത് 15 ലക്ഷം രൂപ തട്ടിയെടുക്കുകയും പിന്നീട് പെരിന്തല്‍മണ്ണയില്‍വെച്ച്‌ ഒരു കോടി രൂപ ഉണ്ടെന്ന് പറഞ്ഞ് ബാഗില്‍ നിറയെ കടലാസുകെട്ടുകള്‍ നല്‍കി അബൂബക്കറിനെ കബളിപ്പിക്കുകയും ചെയ്തെന്നാണ് പരാതി. കേസില്‍ കൊട്ടാരക്കര സ്വദേശികളായ രണ്ടു പേര്‍ കൂടി പിടിയിലാവാനുണ്ടെന്ന് സി.ഐ. പറഞ്ഞു.

കാസര്‍കോട് തൃക്കരിപ്പൂരില്‍ ബീതിച്ചേരിയിലെ ക്വാര്‍ട്ടേഴ്സില്‍നിന്നാണ് അന്വേഷണസംഘം പ്രതികളെ കസ്റ്റഡിയില്‍ എടുത്തത്.

പിടിയിലായ തട്ടിപ്പുസംഘം സമാനമായ നിരവധി തട്ടിപ്പുകള്‍ നടത്തിയതായി പോലീസ് സംശയിക്കുന്നുണ്ട്. എ.എസ്.ഐ. സജീവ്, സി.പി.ഒമാരായ അരുണ്‍, സരിത എന്നിവരും അന്വേഷണസംഘത്തില്‍ ഉണ്ടായിരുന്നു.

പ്രതികളെ വ്യാഴാഴ്ച പൊന്നാനി ജുഡീഷ്യല്‍ മജിസ്ട്രേറ്റ് കോടതിയില്‍ ഹാജരാക്കും.