കൊവിഡ് 19 വ്യാപനത്തെ തുടര്‍ന്ന് നീണ്ട കാത്തിരിപ്പിനൊടുവില്‍ ജന്‍മനാട്ടിലെത്തിയ 363 പ്രവാസികള്‍ വീടുകളിലും ക്വാറന്റൈന്‍ കേന്ദ്രങ്ങളിലേക്കും യാത്രയായി. 'വന്ദേഭാരത്' ദൗത്യത്തിന്റെ ആദ്യദിനം രണ്ട് വിമാനങ്ങളിലായാണ് ഇത്രയും പ്രവാസികള്‍ കേരളത്തിലെത്തിയത്. നെടുമ്പാശേരിയില്‍ എത്തിയ 5 പേരെയും കരിപ്പൂരില്‍ നിന്ന് 3 പേരെയും കൂടുതല്‍ നിരീക്ഷണങ്ങള്‍ക്കായി ഐസൊലേഷന്‍ കേന്ദ്രത്തിലേക്ക് മാറ്റി. പ്രവാസികള്‍ ഏഴ് ദിവസം നിരീക്ഷണത്തില്‍ കഴിയണം എന്നാണ് നിര്‍ദേശം.

ഇതില്‍ മൂന്നു പേരെയാണ് രോഗലക്ഷണങ്ങള്‍ പ്രകടമാക്കിയതിനെ തുടര്‍ന്ന് എറണാകുളം കളമശേരി മെഡിക്കല്‍ കോളജ് ആശുപത്രിയിലേയ്ക്ക് മാറ്റിയതായി വിവരം. ഒരാളെ ആസ്റ്റര്‍ മെഡി സിറ്റിയിലേയ്ക്ക് കൊണ്ടു പോയി. ഇദ്ദേഹം അവിടെ ചികിത്സയിലുള്ള ആളാണ് എന്നാണ് സൂചന. കളമശേരി എസ്‌സിഎംഎസ് ഹോസ്റ്റലില്‍ 16 പേരെ എത്തിക്കുമെന്നാണ് ഒടുവില്‍ ലഭിച്ച വിവരം. അതേസമയം രോഗലക്ഷണം പ്രകടമാക്കിയ രോഗികളുടെ കാര്യത്തില്‍ കൃത്യമായ എണ്ണം അടുത്ത ദിവസം മാത്രമെ അറിയാന്‍ സാധിക്കൂ. ഗര്‍ഭിണികളെയും കുട്ടികളെയും ഉള്‍പ്പടെയുള്ളവരെ സ്വകാര്യ വാഹനങ്ങളിലും ടാക്‌സികളിലുമായി വീടുകളിലേയ്ക്ക് അയച്ചിട്ടുണ്ട്.

49 ഗര്‍ഭിണികളും നാലു കൈക്കുഞ്ഞുങ്ങളും ഉള്‍പ്പെടെ 181 യാത്രക്കാരാണ് വിമാനത്തിലുണ്ടായിരുന്നത്. അടിയന്തര ചികിത്സയ്ക്കായി വന്ന 16 പേരും സംഘത്തിലുണ്ടായിരുന്നു. ഇവരെയും ഗര്‍ഭിണികളെയും കുട്ടികളെയും വീടുകളിലേയ്ക്ക് അയച്ചു. മറ്റുള്ളവര്‍ക്ക് അതതു ജില്ലകളിലാണു ക്വാറന്റീന്‍. ഉറ്റവരുടെ മരണവുമായി ബന്ധപ്പെട്ട് നാട്ടിലേക്കു വന്ന 30 പേരും സംഘത്തിലുണ്ട്. യാത്രക്കാരില്‍ 25 പേരാണ് എറണാകുളം ജില്ലക്കാര്‍. ഇവരെ കളമശ്ശേരി എസ്‌സിഎംഎസ് കോളജ് ഹോസ്റ്റലിലേക്കു മാറ്റിയത്. ആരോഗ്യ പരിശോധനകള്‍ക്കായി നെടുമ്പാശേരിയില്‍ ഡോക്ടര്‍മാര്‍ ഉള്‍പ്പെടെ 18 അംഗ സംഘത്തെയാണു നിയോഗിച്ചിരുന്നത്. പൊലീസ്, റവന്യു ഉദ്യോഗസ്ഥരും പ്രവര്‍ത്തനങ്ങള്‍ ഏകോപിപ്പിച്ചു. പുറത്തു നിന്നുള്ള ആരെയും വിമാനത്താവള ടെര്‍മിനലിലേക്കു പ്രവേശിപ്പിച്ചില്ല. ഗര്‍ഭിണികള്‍ക്കും രോഗികള്‍ക്കും സ്വന്ത ഇഷ്ടപ്രകാരം ടാക്‌സിയിലൊ സ്വന്തമായി വരുത്തിയ കാറിലോ യാത്ര ചെയ്യാന്‍ അവസരം നല്‍കി.