മടങ്ങിയെത്തുന്ന പ്രവാസികളുടെ ക്വാറന്റീന്‍ ദിനങ്ങളില്‍ ആശയക്കുഴപ്പം ഉണ്ടായതിനെത്തുടര്‍ന്ന് ചീഫ് സെക്രട്ടറി ബുധനാഴ്ച ഇറക്കിയ ഉത്തരവ് തിരുത്തി. മുഖ്യമന്ത്രി ബുധനാഴ്ച വാര്‍ത്താസമ്മേളനത്തില്‍ വ്യക്തമാക്കിയത് പ്രവാസികള്‍ 7 ദിവസം ഇന്‍സ്റ്റിറ്റിയൂഷനല്‍ ക്വാറന്റീനില്‍ കഴിയണമെന്നും രോഗമില്ലെങ്കില്‍ വീട്ടിലേക്കു പോയി 7 ദിവസംകൂടി ക്വാറന്റീനില്‍ കഴിയണമെന്നുമായിരുന്നു.

എന്നാല്‍ ചീഫ് സെക്രട്ടറിയുടെ പേരിലിറങ്ങിയ ഉത്തരവില്‍ കേരളത്തിലെത്തുന്ന പ്രവാസികള്‍ 14 ദിവസം ഇന്‍സ്റ്റിറ്റിയൂഷനല്‍ ക്വാറന്റീനില്‍ കഴിയണമെന്നായിരുന്നു ഉണ്ടായിരുന്നത്. ഇതേത്തുടര്‍ന്ന് മുഖ്യമന്ത്രി ചീഫ് സെക്രട്ടറിയോട് വിശദീകരണം തേടി. ഉദ്യോഗസ്ഥര്‍ ഉത്തരവ് തയാറാക്കിയപ്പോള്‍ പിഴവുണ്ടായെന്ന വിശദീകരണമാണ് ചീഫ് സെക്രട്ടറി നല്‍കിയതെന്നറിയുന്നു.

തുടര്‍ന്ന് കേന്ദ്ര ആഭ്യന്തര മന്ത്രാലയത്തോട് ആശയവിനിമയം നടത്തിയശേഷം ഇന്‍സ്റ്റിറ്റിയൂഷനല്‍ ക്വാറന്റീന്‍ 7 ദിവസമാക്കി വ്യാഴാഴ്ച വൈകിട്ടോടെ പുതിയ ഉത്തരവിറങ്ങി. പുതിയ ഉത്തരവ് തയാറാക്കേണ്ടതിനാലാണ് 14 ദിവസത്തെ ഇന്‍സ്റ്റിറ്റിയൂഷന്‍ ക്വാറന്റീന്‍ ഉത്തരവ് സംബന്ധിച്ച ചോദ്യങ്ങള്‍ക്ക് രാവിലെ ചീഫ് സെക്രട്ടറിക്ക് കൃത്യമായ മറുപടി പറയാന്‍ കഴിയാത്തത്.

ഡിപ്പാര്‍ച്ചറിനു മുന്‍പ് ടെസ്റ്റിങിനു വിധേയരാകാത്ത യാത്രക്കാര്‍ 14 ദിവസത്തേക്ക് ജില്ലാഭരണകൂടം സജ്ജമാക്കുന്ന ഇന്‍സ്റ്റിറ്റിയൂഷണല്‍ ക്വാറന്റീനില്‍ പോകണം. കോവിഡ് നെഗറ്റീവാണെന്ന് പരിശോധനാ ഫലം ലഭിച്ചവര്‍ നാട്ടിലെത്തിയാല്‍ 7 ദിവസത്തേക്ക് ഇന്‍സ്റ്റിറ്റിയൂഷണല്‍ ക്വാറന്റീനില്‍ പോകണം. 7 ദിവസം കഴിയുമ്പോഴും രോഗലക്ഷണങ്ങളില്ലെങ്കില്‍ 7ദിവസം വീട്ടില്‍ ക്വാറന്റീനില്‍ കഴിയണം. അതത് ജില്ലകളിലാണ് ഇന്‍സ്റ്റിറ്റിയൂഷണല്‍ ക്വാറന്റീനില്‍ കഴിയേണ്ടത്. യാത്രയ്ക്കുള്ള സൗകര്യം ജില്ലാ ഭരണകൂടം ഒരുക്കണം. ഇപ്രകാരമാണ് പുതിയ ഉത്തരവില്‍ പറയുന്നത്.