കംപ്യൂട്ടര്‍ ഹാര്‍ഡ് ഡിസ്‌കുകളും ഇലക്ട്രോണിക് സാമഗ്രികളും കൊച്ചി കപ്പല്‍ശാലയില്‍ നിര്‍മാണത്തിലുള്ള വിക്രാന്ത് വിമാനവാഹിനി കപ്പലില്‍ നിന്നും മോഷണം പോയ സംഭവത്തില്‍ വിവരം കൈമാറുന്നവര്‍ക്കു ദേശീയ അന്വേഷണ ഏജന്‍സി (എന്‍ഐഎ) 5 ലക്ഷം രൂപ പാരിതോഷികം പ്രഖ്യാപിച്ചു.

നിര്‍മാണത്തിലുള്ള വിക്രാന്ത് കപ്പലിനുള്ളില്‍ മോഷണം നടന്നത് എന്നാണെന്നു കപ്പല്‍ശാല അധികാരികള്‍ക്കും അറിയില്ല. സെപ്റ്റംബര്‍ 14-നാണ് കൊച്ചി കപ്പല്‍ശാല അധികാരികള്‍ എറണാകുളം സൗത്ത് പൊലീസിനു പരാതി നല്‍കിയത്. എന്‍ഐഎ 2019 സെപ്റ്റംബറില്‍ അന്വേഷണം ഏറ്റെടുത്ത ശേഷം മോഷ്ടാവിനെ തിരിച്ചറിയാനുള്ള തെളിവുകളോ വിവരങ്ങളോ ലഭിക്കാതായതോടെയാണ് വിവരം കൈമാറുന്നവര്‍ക്ക് സമ്മാനം പഖ്യാപിച്ചത്.

എന്‍ഐഎ സെപ്റ്റംബര്‍ 27-ന് അന്വേഷണം ഏറ്റെടുത്ത ശേഷം 10,000 വിരലടയാളങ്ങള്‍ പരിശോധിച്ചു. 1,000 പേരുടെ മൊഴിയെടുത്തു. എന്നിട്ടും കേസിനു തുമ്പുകിട്ടിയില്ല. 5 വീതം ഹാര്‍ഡ് ഡിസ്‌കുകളും റാമും (റാന്‍ഡം ആക്‌സസ് മെമ്മറി), മൈക്രോ പ്രോസസര്‍, കേബിള്‍, മറ്റു യന്ത്രഭാഗങ്ങള്‍ എന്നിവയുമാണ് കാണാതെ പോയത്. ഇതിനു 2.10 ലക്ഷം രൂപ വിലമതിക്കും.

52 പേര്‍ക്കാണ് കപ്പലിനുള്ളില്‍ ഇവയിരിക്കുന്ന ഭാഗത്തു പ്രവേശനമുള്ളത്. ഇവരെ ചുറ്റിപ്പറ്റിയാണ് ഇതുവരെ അന്വേഷണം നീങ്ങിയത്. എന്നാല്‍ അതു ഫലം കാണാതായതോടെയാണ് അന്വേഷണത്തിനു സഹായിക്കുന്ന വിവരം നല്‍കുന്നവര്‍ക്ക് പാരിതോഷികം പ്രഖ്യാപിച്ചത്. എന്‍ഐഎയുടെ ഗിരിനഗര്‍ ഓഫിസില്‍ നേരിട്ടോ ഫോണ്‍, ഇമെയില്‍ വഴിയോ വിവരം കൈമാറാം. 0484 2349344, 9495506666, 9497715294, info.koc.nia@gov.in