ആലപ്പുഴയില്‍ പൊലീസ് റെയ്ഡില്‍ പിടികൂടിയ 40 കുപ്പി വിദേശ മദ്യം കാണാതായെന്ന് ആക്ഷേപം. കേസ് ഒതുക്കാന്‍ വന്‍തുക കൈക്കൂലി ആവശ്യപ്പെട്ടെന്നും ആരോപണം. സംഭവത്തെപ്പറ്റി സ്‌പെഷല്‍ ബ്രാഞ്ച് ഡിവൈഎസ്പി നല്‍കിയ റിപ്പോര്‍ട്ട് അടിസ്ഥാനമാക്കി വിശദ അന്വേഷണം നടത്താന്‍ ജില്ലാ പൊലീസ് മേധാവി ആലപ്പുഴ ഡിവൈഎസ്പിയെ ചുമതലപ്പെടുത്തി.

ഇഎംഎസ് സ്റ്റേഡിയത്തിനു സമീപത്തെ വീട്ടില്‍ ഒന്നാം തീയതി രാത്രിയായിരുന്നു റെയ്ഡ്. വിദേശ മദ്യം സൂക്ഷിച്ചിട്ടുണ്ടെന്ന് വിവരം ലഭിച്ചതിനെ തുടര്‍ന്ന് സൗത്ത് പൊലീസ് നടത്തിയ പരിശോധനയാണ് ആരോപണത്തിനും അന്വേഷണത്തിനും കാരണമായത്. തൊണ്ടിമുതലായി എടുത്ത മദ്യം കാണാതായെന്നും കേസ് ഇല്ലാതാക്കാന്‍ കൈക്കൂലി ചോദിച്ചെന്നുമുള്ള വിവരത്തെപ്പറ്റിയാണ് അന്വേഷണം.

സൗത്ത് സിഐ മുന്‍കൈയെടുത്ത് ലഹരിക്കെതിരെ രുപീകരിച്ച ഡാര്‍ക്ക് ഡെവിള്‍ സ്‌ക്വാഡ് എസ്‌ഐയുടെ നേതൃത്വത്തിലാണു പരിശോധന നടത്തിയത്.
വിവിധ രാജ്യങ്ങളില്‍നിന്നുള്ള വിലപിടിപ്പുള്ള മദ്യങ്ങളുടെ വലിയ ശേഖരം ഒരു വീട്ടിലുണ്ടെന്നും അവിടെ ബാര്‍ സംവിധാനം തന്നെ ഒരുക്കിയിട്ടുണ്ടെന്നും പൊലീസിനു സന്ദേശം ലഭിച്ചിരുന്നു.

റെയ്ഡിനു ശേഷം 40 കുപ്പി മദ്യം പെട്ടികളിലാക്കി പൊലീസ് കൊണ്ടുപോയതായി വീട്ടുകാരുടെ ബന്ധുക്കള്‍ അന്വേഷണ സംഘത്തിനു മൊഴി നല്‍കി. റെയ്ഡ് സംബന്ധിച്ചു സൗത്ത് പൊലീസ് കേസടുക്കുകയോ പിടിച്ചെടുത്ത മദ്യം സ്റ്റേഷനില്‍ എത്തിക്കുകയോ ചെയ്തില്ലെന്ന് ആക്ഷേപമുണ്ടായി. തുടര്‍ന്നാണു വിശദമായി അന്വേഷിക്കാന്‍ ജില്ലാ പൊലീസ് മേധാവി നിര്‍ദേശിച്ചത്.