തച്ചോളി ഒതേനന്‍ കുളിച്ച കുളം നവീകരിക്കുന്നു
കണ്ണൂര്‍ മാഹിയ്ക്കടുത്ത് വടക്കന്‍പാട്ടിലെ വീരനായകന്‍ ഒതേനന്‍ വേളി കഴിച്ച മുണ്ടവീട്ടിന്റെ കിഴക്ക് ഭാഗത്തുള്ള കുളം പിന്‍തലമുറയിലെ കുടുംബക്കാര്‍ ചേര്‍ന്ന് നവീകരിക്കുന്നു. പന്തക്കലിലെ മുണ്ടവീട്ടില്‍ തച്ചോളി ഒതേനന്‍ കുളിച്ച കുളം കാലപ്പഴക്കത്താല്‍ നശിക്കാന്‍ തുടങ്ങിയതോടെയാണ് ബന്ധുക്കള്‍ ഒത്തു ചേര്‍ന്ന് 8 ലക്ഷം രൂപ ചെലവില്‍ നവീകരിക്കുന്നത്.
പടിഞ്ഞാറ് ഭാഗത്ത് ഒതേനന്‍ അങ്കത്തിന് പോകുന്നതിനു മുന്‍പ് കച്ചമുറുക്കിയ കൂറ്റന്‍ ഏഴിമലയും ഇപ്പോഴും നിലവിലുണ്ട്. ഒതേനന്‍ കുളിക്കടവില്‍ ഇരിക്കാറുള്ള വലിയ ഒറ്റക്കല്ല് കാണുംവിധമാണ് നവീകരണം നടക്കുന്നത്.
കുളം നവീകരിക്കുന്നത് നാടിന്റെ ഇന്നലെകള്‍ പുതുതലമുറയ്ക്ക് കൈമാറാനുള്ള ശ്രമമായി മാറിക്കഴിഞ്ഞു. ചരിത്രത്തിന്റെ നേര്‍സാക്ഷ്യമാണ് മുണ്ടവീടും പരിസരവും. ഒതേനന്റെ ആയുധങ്ങള്‍ പില്‍ക്കാലത്ത് തച്ചോളി മാണിക്കോത്ത് വീട്ടിലേക്ക് കൈമാറി.
നിരവധി ഗവേഷക വിദ്യാര്‍ഥികള്‍ ഇതിനകം ഇവിടം സന്ദര്‍ശിച്ചതായി ഇളംതലമുറയിലെ എം.വി. ശിവാനന്ദന്‍ പറഞ്ഞു.
https://www.facebook.com/Malayalivartha
